Ótt­inn við hryðju­verk hefur á síð­ustu árum haft mikil áhrif í ferða­mennsk­unn­i. Í nýrri könnun sem fyr­ir­tæk­ið IPK International gerði, og 50 þús­und manns tóku þátt í, sögðu 40% þátt­tak­enda að hryðju­verkaógnin hefði áhrif á hvert ferð­ast væri. Tyrk­land, Egypta­land og lönd Norð­ur­-Afr­íku hafa orðið verst úti og af stór­borgum Par­ís, Ist­an­búl og Kaíró. 

Könnun sem evr­ópsk ­ferða­mála­sam­tök­um létu gera fyrir rúmu ári síðan leiddi í ljós að sífellt fleiri Evr­ópu­búar ferð­ast. Og hjá þeim sem á annað borð ferð­ast til ann­arra landa er það ekki lengur ein utan­lands­ferð annað eða þriðja hvert ár, nú eru það iðu­lega tvö, jafn­vel þrjú, ferða­lög árlega. Sól­ar­ferð­ir, óbyggða­ferð­ir, veiði­ferð­ir, golf­ferð­ir, skíða­ferð­ir,borg­ar­ferðir, sér­stakar göngu- og reið­hjóla­ferð­ir, sigl­ingar með skemmti­ferða­skipum eða skút­um, kletta­klif­ur, o.s.frv, o.s.frv. Mögu­leik­arnir eru nær óþrjót­andi.

Að verða „vin­sælt ferða­manna­land“ er oft­ast árangur margra ára eða jafn­vel ára­tuga aug­lýs­inga­starfs. Slík land­kynn­ing kostar mikið fé, og þol­in­mæði. Þekktur danskur ferða­fröm­uður sagði ein­hverju sinni að land­kynn­ing væri lang­hlaup, „marg­falt mara­þon“ eins og hann komst að orði. Mörg lönd verja miklum fjár­munum í að kynna land og þjóð enda eftir miklu að slægj­ast.

Ferða­mennskan skapar miklar tekj­ur, því hafa Íslend­ingar kynnst vel á allra síð­ustu árum. Á Íslandi hefur mark­visst kynn­ing­ar­starf, ásamt hag­stæðu gengi (fyrir ferða­menn) ráðið mestu um mikla aukn­ingu þeirra sem landið heim­sækja. Því til við­bótar hefur Ísland notið góðs af því að ferða­fólk leitar sífellt að ein­hverju nýju og ekki síst stöð­um, sem fáir hafa heim­sótt. Fram­andi er það stundum kall­að. Þótt mörgum Íslend­ingum þyki nóg um ferða­manna­straum­inn, sem hef­ur marg­faldast á örfáum árum, er hóp­ur­inn sem heim­sækir Ísland lít­ill, sam­an­borið við mörg önnur lönd. Tekjur Íslend­inga af ferða­mönnum hafa líka marg­faldast, í hlut­falli við ferða­manna­fjöld­ann. 

Frakk­land fjöl­sóttasta ferða­manna­landið

Um langt ára­bil hefur Frakk­land verið fjöl­sóttasta ferða­manna­land heims. Sam­kvæmt upp­lýs­ing­um World Statistic stofn­un­ar­innar heim­sóttu 83 millj­ónir ferða­fólks Frakk­land á síð­ast­liðnu ári. 75 millj­ónir lögðu leið sína til Banda­ríkj­anna, 65 millj­ónir til Spán­ar, 56 millj­ónir fóru til Kína. Í fimmta sæti yfir vin­sæl­ustu ferða­manna­löndin árið 2015 var Ítal­ía, þangað fóru 48 millj­ón­ir, Tyrk­land heim­sóttu 40 millj­ón­ir, 33 millj­ónir fóru til Þýska­lands og sami fjöldi til Bret­lands. Til Rúss­lands lögðu 30 millj­ónir leið sína og í tíunda sæti yfir fjöl­sótt­ustu ferða­manna­lönd ver­aldar er Mexíkó, þangað fóru 29 millj­ón­ir. World Statistic getur þess sér­stak­lega varð­andi Mexíkó að stór hluti þess­ara 29 millj­óna séu Banda­ríkja­menn sem fari oft í viku yfir landa­mær­in.  

Í fjöl­sótt­ustu lönd­unum eru það iðu­lega borg­irnar sem draga til sín hlut­falls­lega flesta ferða­lang­ana, í Frakk­landi Par­ís, Nice, Le Mans, í Banda­ríkj­un­um New York, Los Ang­eles, San Francisco, Las Vegas. Á Spáni, þriðja fjöl­sóttasta ferða­manna­land­inu var dreif­ingin meiri ef svo mætti segja: Barcelona, Madrid, Majorka, Costa del Sol, Sevilla, Val­encia svo það helsta sé nefnt. Í Kína voru það stór­borg­irn­ar Beijing og Shang­hai sem flestir lögðu leið sína til en á Ítal­íu, fimmta fjöl­sóttasta land­inu var dreif­ingin mjög mikil enda á Ítalía 51 nafn á menn­ing­arminja­skrá Sam­ein­uðu þjóð­anna. Í Tyrk­landi skipt­ust millj­ón­irnar 40 sem heim­sækja landið á milli sögu­staða, sól­ar­stranda og stór­borg­ar­inn­ar Ist­an­búl. Í Þýska­landi og Bret­landi vógu Berlín og London þyngst þótt í þessum löndum færi ferða­fólk víða um. Í Rúss­landi voru það Moskva og St. Pét­urs­borg sem drógu til sín flesta úr hópi þeirra 30 millj­óna sem landið sóttu heim í fyrra. 

Hryðju­verkaógnin og ferða­mennskan

Eins og fram kom í upp­hafi pistils­ins hefur ótt­inn við hryðju­verk veru­leg áhrif þegar að því kemur að velja hvert skuli haldið þegar leggja á land undir fót. Margir veigra sér við að heim­sækja lönd og borgir þar sem hryðju­verka­menn hafa látið til sín taka. 

Matthias Fekl að­stoð­ar­ferða­mála­ráð­herra Frakk­lands sagði fyrir nokkrum dögum í við­tali að ferða­mönnum í París hefði fækkað um tugi pró­senta að und­an­förnu, sam­an­borið við síð­ustu ár. Hann sagði að nýt­ing hót­el­her­bergja í síð­ari hluta júlí­mán­aðar hefði ein­ungis verið 32%, á sama tíma í fyrra og hitteð­fyrra var nýt­ingin yfir 70%. Það eru einkum ferða­menn frá Banda­ríkj­un­um, Asíu, einkum Jap­an, og löndum við Persaflóa sem hafa hætt við ferðir til Par­ísar en ferða­menn frá þessum löndum búa að jafn­aði á dýr­ari hót­elum og eyða meiri pen­ingum en ferða­menn frá öðrum lönd­um. Ótt­inn við hryðju­verk er ástæð­an. Sam­dráttur í ferða­mennsku hefur mikil áhrif, í Frakk­landi hafa t.d. fleiri en tvær millj­ónir manna við­ur­væri sitt af ferða­mennsku. Í Brus­sel í Belgíu fækk­aði ferða­mönnum um 40% í júlí­mán­uði síð­ast­liðnum miðað við sama tíma í fyrra. Hryðju­verkin á Zaventem flug­velli í mar­s, þar sem 32 létu­st, er talin helsta ástæðan þess­arar miklu fækk­un­ar. Ekki eru til­tækar tölur um fækkun ferða­manna í Tyrk­landi, Egypta­landi og löndum í Norð­ur­-Afr­íku en í þessum löndum hefur ferða­fólki fækkað mjög mik­ið. Evr­ópskar ferða­skrif­stof­ur, og flug­fé­lög, hafa brugð­ist við með því að fækka ferðum og draga úr sæta­fram­boð­i. 

Eftir mikla fjölgun kín­verskra ferða­manna til Evr­ópu und­an­farin ár virð­ist nú hafa hægt nokkuð á þeim straumi. Ferða­mála­sér­fræð­ingar segja það beina afleið­ingu ótt­ans við hryðju­verk.

Mikil aukn­ing til Spánar og Portú­gals

Sér­fræð­ingar um ferða­mál segja að þrátt fyrir að dregið hafi úr straumi ferða­manna til þeirra landa sem nefnd hafa verið hér að framan sé jákvætt að almennt virð­ist ekki hafa dregið úr ferða­lög­um. Fólk velur önnur lönd. Þeim sem ferð­uð­ust til Spánar fjölg­aði um 12% á fyrri helm­ingi þessa árs, miðað við sama tíma í fyrra og í Portú­gal er fjölg­unin á sama tíma 13%. Á Spáni hefur verð á gist­ingu hækkað tals­vert að und­an­förnu og danskur ferða­mála­fræð­ingur sagði að spænskir hót­el­eig­endur megi ekki láta stjórn­ast af græðgi. Ef verð hækk­i allt of ­mikið sé hætta á að ferða­menn leiti ann­að.

Ísland örugg­asta land í heimi 

Nýlega birti alþjóð­leg stofn­un, Institute for Economics and Peace, skýrslu þar sem lagt er mat á, með mörgum og flóknum aðferð­um, öryggi fólks í löndum heims­ins. Á þessum lista trónir Ísland á toppn­um, Dan­mörk er í öðru sæti, í þriðja sæti er Aust­ur­ríki, Nýja-­Sjá­land í fjórða sæti og í fimmta sæti Portú­gal. Finn­land er í ell­efta sæti, Sví­þjóð í því fjórt­ánda og Nor­egur er neðst Norð­ur­land­anna í 17. sæti. Þetta hlýtur að telj­ast ánægju­leg nið­ur­staða fyrir Íslend­inga.