Stjórnendur Kaupþings sem dæmdir voru í Al Thani málinu, þeir Sigurður Einarsson fyrrverandi stjórnarformaður, Hreiðar Már Sigurðsson, fyrrverandi forstjóri, og Magnús Guðmundsson, fyrrverandi forstjóri Kaupþings í Lúxemborg, geta ekki fengið reynslulausn úr fangelsisvist á meðan mál sem beinast gegn þeim hafa ekki verið til lykta leidd í dómskerfinu. Þessir þrír stjórnendur eru allir ákærðir í málum sem bíða þess að verða til lykta leidd. Hreiðar Már og Magnús í þremur málum, en Sigurður í tveimur. Þá staðfesti Ólafur Þór Hauksson, sérstakur saksóknari, í samtali við Kjarnann að nokkur mál til viðbótar, sem tengdust Kaupþingi og athöfnum stjórnenda bankans, væru enn á rannsóknarstigi og ekki ljóst enn hvort þau myndu leiða til ákæru.
Fordæmalaus lögbrot áttu sér í starfsemi Kaupþings skömmu fyrir hrun, í tengslum við viðskipti Al Thani með 5 prósent hlut í bankanum, samkvæmt dómi Hæstaréttar.
Í Al Thani málinu voru allir ákærðu, Hreiðar Már Sigurðsson, Sigurður Einarsson, Magnús Guðmundsson og Ólafur Ólafsson, dæmdir sekir í Hæstarétti, en málið tengdist kaupum Mohammed Sheikh Bin Kalifa Al Thani, frænda Emírsins frá Katar, á fimm prósenta hlut í Kaupþingi í lok september 2008. Hreiðar Már fékk fimm og hálfs árs fangelsi, Sigurður fjögur ár, Ólafur fjögur ár og Magnús fjögur og hálft ár. Ólafur var dæmdur fyrir markaðsmisnotkun en hinir þrír fyrir umboðssvik til viðbótar við markaðsmisnotkun.
Samkvæmt lögum og reglum um reynslulausn er mögulegt fyrir fanga að fá hana þegar helmingur refsingar hefur tekin út með afplánun, en það fer eftir tilteknum skilyrðum þó, meðal annars um góða hegðun í fangelsi og að fleiri máli hjá lögreglu eða dómstólum beinist ekki að viðkomandi.
Aðalmeðferð framundan - alvarlegar sakir
Framundan er aðalmeðferð í markaðsmisnotkunarmáli sem beinist að Kaupþingsfólki, samtals níu starfsmönnum. Hún fer fram í Héraðsdómi Reykjavíkur 21. apríl til 22. maí. Ákærðu er gefið að sök að hafa ýmist komið í veg fyrir eða hægt á lækkun á verði hlutabréfa í Kaupþingi, frá hausti 2007 og fram að falli bankans haustið 2008, og aukið seljanleika þeirra með „kerfisbundnum“ og „stórfelldum“ kaupum, eins og segir í ákæru, í krafti fjárhagslegs styrks bankans. Hreiðar Már, Sigurður og Magnús eru allir ákærðir í málinu.
Hreiðar, Magnús og Sigurður eru svo einnig ákærðir í CLN-málinu en þar er þeim gefið að sök að hafa misnotað stöðu sína sem stjórnendur bankans í lánveitingum til nokkurra félaga sem voru í eigu viðskiptavina bankans. Lánin voru svo notuð til að kaupa skuldatryggingar á Kaupþing banka, eða svokölluð Credit Linked Notes, með það að markmiði að lækka álagið og freista þess að opna fyrir fjárveitingar til bankans á markaði.
Þriðja málið sem er fyrir dómstólum, og beinist að Kaupþingsstjórnendum, er Marple-málið svonefnda, en Hreiðar Már og Magnús eru ákærðir í því ásamt Guðnýju Örnu Sveinsdóttur, fyrrverandi fjármálastjóra bankans, og Skúla Þorvaldssyni, fjárfesti og fyrrverandi stórs hluthafa Kaupþings. Ákært er fyrir fjárdrátt, þegar færðir voru átta milljarðar króna úr sjóðum Kaupþings til félagsins Marple, sem var í eigu Skúla Þorvaldssonar, án þess að heimild væri fyrir því.
Ólafur Ólafsson, fjárfestir, segist ekki ætla að stinga hausnum í sandinn heldur hefja afplánun í fangelsi þegar kall um það berst. Fleiri mál beinast að Sigurður Einarssyni, sem sést hér við hlið Ólafs.
Hámark níu ára fangelsi
Heimild er í hegningarlögum að auka við refsingu sem þegar hefur komið fram með dómi, og bæta við hana allt að helmingi, ef menn hafa ítrekað verið dæmdir fyrir lögbrot. Níu ára fangelsi er að það mesta sem Kaupþingsmenn geta fengið, þegar allt er tekið, og ef sakfellt verður í öðrum málum. Í ljósi fordæmis úr Al Thani málinu, gæti sú staða komið upp að refsiramminn yrði fullnýttur áður en málin yrðu til lykta leidd í dómskerfinu sem að þeim beinast. Þá kæmi til mats á því, hjá embætti sérstaks saksóknara, hvort það væri þess virði að fara fram með málin af fullum þunga í dómskerfinu og leiða þau til lykta.
