Peningastefnunefnd Seðlabanka Íslands hefur ákveðið að halda stýrivöxtum bankans óbreyttum og verða þeir því áfram 5,75 prósent. Samkvæmt yfirlýsingu peningastefnunefndar var hagvöxtur í fyrra mjög nærri febrúarspá Seðlabankans. Þar segir einnig: „Vísbendingar það sem af er ári gefa jafnframt til kynna að horfur fyrir þetta ár hafi lítið breyst og að útlit sé einnig fyrir kröftugan hagvöxt á næstu misserum.Verðbólga mældist 2,2% í febrúar og hefur aukist um ríflega 1 prósentu frá því sem hún var fyrir ári. Sem fyrr vegast þar á innlendur verðbólguþrýstingur og innflutt verðhjöðnun á alþjóðlegum vörumörkuðum. Áfram er útlit fyrir að verðbólga verði undir markmiði fram eftir ári en horfur eru óvissar, m.a. varðandi innflutningsverðlag.
Alþjóðleg verðlagsþróun og sterkari króna hafa veitt svigrúm til að hækka vexti hægar en áður var talið nauðsynlegt. Það breytir hins vegar ekki því að miðað við spá Seðlabankans er líklegt að auka þurfi aðhald peningastefnunnar frekar á næstu misserum í ljósi vaxandi innlends verðbólguþrýstings. Hve mikið og hve hratt það gerist ræðst af framvindunni."
Stýrivextir voru hækkaðir nokkuð á síðari hluta ársins 2015 en hafa nú verið óbreyttir frá því að þeir voru hækkaðir í 5,75 prósent í nóvember í fyrra. Stýrivextir á Íslandi eru mun hærri en víða í öðrum löndum í kringum okkur. Seðlabanki Evrópu tilkynnti til að mynda í síðustu viku að hann hefði ákveðið að lækka stýrivexti sína úr 0,05 prósent í núll.
Stýrivextir eru tæki sem stjórnvöld nota til að hafa áhrif á markaðsvexti. Því hærri sem stýrivextirnir eru því hærri eru markaðsvextir sem almenningi og fyrirtækjum bjóðast hjá lánastofnunum. Stýrivextir eru hækkaðir til að reyna að hafa áhrif á verðbólgu og gengi íslensku krónunnar, og þar með hagvöxt.
