Eins og alþjóð veit ræðst það rétt fyrir klukkan sex í dag hvort íslenska karla­lands­liðið í fót­bolta kemst áfram í sextán liða úrslit á Evr­ópu­mót­inu í Frakk­landi. Mörg íslensk fyr­ir­tæki hafa brugðið á það ráð að loka fyrr en venju­lega vegna leiks­ins, sem byrjar klukkan fjögur að íslenskum tíma. 

Það er hins vegar ekki bara á Íslandi sem spennan magn­ast fyrir síð­asta leiknum í riðl­in­um. Íslenska liðið hefur heillað fjöl­marga upp úr skónum og allir sem fylgj­ast með mót­inu yfir höfuð verða með athygl­ina á leiknum á eft­ir. 

Danir komu sínu liði ekki á mótið en hafa margir hverjir lýst yfir stuðn­ingi við hið íslenska í stað­inn. Segja má að fjöl­miðl­arnir fari þar fremstir í flokki, og í dag lýsir danska rík­is­út­varp­ið, DR, því yfir í mynd­bandi á Face­book-­síðu sinni að „í dag erum við öll Íslend­ing­ar.“ 

Danska blaðið Politi­ken hefur gengið öðrum lengra, og hefur allt Evr­ópu­mótið haft íslenska fán­ann í haus vef­síðu sinn­ar. Þar birt­ast svo mis­mun­andi skila­boð og í dag eru þau ein­föld: Auf wieder­sehen Østrig, eða bless Aust­ur­rík­i. 

Auk þess hefur Politi­ken fengið íslenskan kór til þess að syngja íslenska þjóð­söng­inn, til þess að kenna les­endum að syngja með. „Nú hefur þú tæki­færi til að læra hann - svo þú getir hrópað með þegar leik­ur­inn gegn Aust­ur­ríki verður flaut­aður á,“ segir í frétt­inn­i. 

Ekki nóg með þetta heldur ætlar Politi­ken alla leið á Íslands­bryggju í kvöld, að því er segir í annarri frétt. Fjöl­mið­ill­inn ætlar að mæta á svæðið klukku­tíma fyrir leik og gefa fólki íslenska fána.