Fyrstu við­brögð Don­alds Trump, for­seta Banda­ríkj­anna, við yfir­heyrslum leyni­þjón­ustu­nefndar Banda­ríkja­þings yfir James Comey, fyrr­ver­andi for­stjóra banda­rísku alrík­is­lög­regl­unn­ar FBI, í gær komu á Twitter í morg­un.

Trump seg­ist þar alltaf hafa verið í fullum rétti „þrátt fyrir svo margar falskar stað­hæf­ingar og lygar“. Don­ald Trump rak James Comey úr stöðu for­stjóra FBI í byrjun maí og skýrði brot­vikn­ing­una með yfir­lýs­ingum um að Comey hafi staðið sig illa í starfi sínu.

Í vitn­is­burði Comey fyrir banda­ríska þing­inu í gær kom fram að þó að Trump hafi aldrei bein­línis farið fram á að FBI myndi hætta rann­sókn sinni á afskiptum Rússa af for­seta­kosn­ing­unum síð­ast­liðið haust og óeðli­legum tengslum sam­starf­sam­anna Trumps við rúss­neska emb­ætt­is­menn, þá hafi for­set­inn gefið það sterkt í skyn á einka­fundum sínum með Comey.

Comey sagð­ist í yfir­heyrsl­unum hafa byrjað að skrá sam­töl sín við for­set­ann hjá sér, enda þótti hann fund­irnir vera óeðli­legir og þess eðlis að í fram­tíð­inni gæti hann þurft að verja sig og lög­gæslu­stofn­un­ina sem hann starf­aði fyrir gegn árásum úr Hvíta hús­inu.

Don­ald Trump virð­ist vera að bregð­ast við umfjöllun morg­un­þátt­ar­ins Fox and Fri­ends á Fox News-­sjón­varps­stöð­inni banda­rísku þar sem fjallað var um yfir­heyrsl­una yfir Comey.

Í lokin heldur Trump á lofti þeirri gagn­rýni sem kom fram í gær af hálfu tals­manna Hvíta húss­ins sem und­ir­strikar að Comey lak minn­is­blöðum sínum til fjöl­miðla, eftir að Trump hót­aði því að gera hljóð­upp­tökur af einka­fundum þeirra tveggja opin­ber­ar.

„...and WOW, Comey is a lea­ker!“