Bjóða hækkun upp á 20.000 krónur á mánuði

Tilboð Samtaka atvinnulífsins til verkalýðsfélaganna hljóðar upp á að laun upp að 600.000 krónum hækki um 20.000 krónur á mánuði hvert ár samningsins.

Ritstjórn Kjarnans 15. febrúar 2019

Halldór Benjamín Þorbergsson, framkvæmdastjóri SA.

Tilboð Samtaka atvinnulífsins til verkalýðsfélaganna hljóðar upp á að laun upp að 600.000 krónum hækki um 20.000 krónur á mánuði hvert ár samningsins. Gert er ráð fyrir þriggja ára samningi og að laun umfram það hækki um 2,5 prósent. Þetta kemur fram í frétt RÚV í dag.

Í fréttinni kemur jafnframt fram að ekki sé gert ráð fyrir breytingum á vinnutíma í tilboðinu. Fulltrúar Eflingar, VR, Verkalýðsfélags Akraness og Verkalýðsfélags Grindavíkur ráði nú ráðum sínum og munu koma með gagntilboð á samningafundi sem hófst fyrir hádegi í dag.

Efling leggur fram gagntilboð

Eins og kom fram í frétt Kjarnans í gærkvöldi þá gerðu Samtök atvinnulífsins stéttarfélögum tilboð í vikunni um þriggja ára kjarasamninga að gefnum vissum forsendum, en nú hefur samninganefnd Eflingar samþykkt að leggja fram gagntilboð í dag. „Þar er komið til móts við kauphækkunarboð Samtaka atvinnulífsins, með því skilyrði að yfirvöld setji fram og standi við skattkerfisbreytingar,“ segir í frétt á vef Eflingar.

Stjórn Eflingar og samninganefnd samþykktu svo ályktun um skattastefnu, þar sem fyrsta skrefið fælist í þeim skattatillögum sem Stefán Ólafsson og Indriði H. Þorláksson hafa mótað í nýútgefinni skattaskýrslu sinni.

Þar er lagt til að tekjuskattar á 90 prósent almennings myndu lækka, en að tekjuhæstu fimm prósentin myndu borga meira. Stjórnin og samninganefndin krefjast þess að aðgerðirnar sem skýrslan leggur til verði innleiddar „strax á næstu fjárlögum, og að skattbyrði tekjulægstu hópa verði með öllu aflétt eigi síðar en árið 2021.“

Fólk orðið óþolinmótt

Drífa Snædal, forseti Alþýðusambands Íslands, fjallar um stöðu mála í kjaraviðræðunum í föstudagspistli sínum. Þar segir hún að vikan hafi einkennst af viðræðum við stjórnvöld og óteljandi öðru samtölum, jafnt formlegum sem óformlegum, um hvernig hægt yrði að ná sem bestum kjarabótum í viðræðunum sem nú standa yfir. „Næsta vika ber vonandi í skauti sér skýrari mynd af stöðunni og hvers er að vænta bæði frá stjórnvöldum og atvinnurekendum. Fólk er auðvitað orðið óþolinmótt og það er vel skiljanlegt, ferlið hefur tekið lengri tíma en ætlunin var en vonandi verður útkoman þeim mun betri og heildarmyndin fyllri.“

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 416 Færslan var síðast uppfærð: 15. febrúar 2019, kl. 13:31
Færslan birtist fyrst: 15. febrúar 2019, kl. 11:53

Fréttinni hefur verið breytt eftir uppfærslu á frétt RÚV. Upphaflega stóð að tilboð SA til verkalýðsfélaganna hljóðaði upp á að laun upp að 600.000 krónum myndu hækka um 20.000 krónur á ári í þriggja ára samningi. Hið rétta er að tilboðið hljóðar upp á að laun upp að 600.000 krónum hækki um 20.000 krónur á mánuði hvert ár samningsins, ekki á ári.