Áslaug Arna Sig­ur­björns­dóttir dóms­mála­ráð­herra átti fund með Har­aldi Johann­es­sen rík­is­lög­reglu­stjóra í morg­un. Hún segir að Har­aldur muni sitja áfram í emb­ætti eins og staðan er núna. Hún segir að fyrst fremst þurfi að tryggja að lög­gæsla virki í land­inu þrátt fyrir van­trausts­yf­ir­lýs­ing­ar. 

Átta af níu lög­­­reglu­­stjórum í land­inu lýstu því yfir í gær að þeir van­treysta Har­aldi Johann­es­­sen rík­­is­lög­­reglu­­stjóra og vilja hann burt úr emb­ætt­i en sam­kvæmt þeim var kornið sem fyllti mæl­inn við­­tal sem Har­aldur veitti Morg­un­­blað­inu, þar sem hann sagði óánægju innan lög­­regl­unnar meðal ann­­ars mega rekja til þess að hann væri að taka á spill­ingu innan lög­­regl­unn­­ar. 

Rík­is­stjórnin kom saman til fundar í Stjórn­ar­ráð­inu í morgun þar sem mál­efni rík­is­lög­reglu­stjóra voru meðal ann­ars rædd. Áslaug Arna ræddi stutt­lega við frétta­menn eftir fundinn. 

„Ég átti fund með rík­is­lög­reglu­stjóra í morg­un. Ég bind vonir við að það sam­tal muni halda áfram. Ég hef nú þegar sett af stað vinnu í ráðu­neyt­inu sem fór af stað strax í síð­ustu viku. Það var sent bréf til lög­reglu­stjóra, rík­is­lög­reglu­stjóra, lög­reglu­manna og ann­arra hlut­eig­andi og sé fram á að þeirri vinnu miði hratt áfram og muni ljúka hratt,“ sagði Áslaug Arna að fundi lokn­um.

Aðspurð sagði hún að Har­aldur mundi sitja áfram í emb­ætti rík­is­lög­reglu­stjóra eins og staðan er núna. „Fyrst og fremst þarf að tryggja að lög­gæsla virki í land­inu þrátt fyrir van­trausts­yf­ir­lýs­ing­ar,“ sagði Áslaug Arna. Að öðru leyti vildi hún ekki tjá sig um hvað kom fram á fundi þeirra Har­ald­ar.