Virði Valitor komið niður í 11,7 milljarða – Hefur lækkað um fjóra milljarða á árinu

Rekstur Valitor heldur áfram að vera erfiður. Fyrirtækið tapaði fjórum milljörðum á fyrstu níu mánuðum ársins 2019 og tekjur drógust saman um fjórðung milli ára. Fyrirtækið er til sölu en verðmiðinn heldur sífellt áfram að lækka.

Þórður Snær Júlíusson 31. október 2019

Viðar Þorkelsson er forstjóri Valitor, sem byggir starfsemi sína á grunni VISA Ísland, sem stofnað var 1983. Hann hefur stýrt fyrirtækinu frá árinu 2010.

Valitor Holding, dótturfélag Arion banka sem á greiðslumiðlunarfyrirtækið Valitor, er nú metið þá 11,7 milljarða króna í bókum bankans. Það er 4,1 milljarði króna lægri verðmiði en var á fyrirtækinu um síðustu áramót. Þetta kemur fram í uppgjöri Arion banka fyrir þriðja ársfjórðung ársins 2019 sem var birt eftir lokun markaða í gær.

Valitor hefur verið flokkað sem eign til sölu frá því á síðasta ársfjórðungi 2018.

Tekjur Valitor hafa dregist saman um 1.240 milljónir króna á fyrstu níu mánuðum ársins 2019 þegar miðað er við sama tímabil í fyrra, og voru tæplega 3,6 milljarðar króna nú. Það er samdráttur í tekjum um rúman fjórðung á einu ári. Munar þar mestu um að þjónustutekjur drógust saman um 1,2 milljarða króna.

Á sama tíma hefur rekstrarkostnaður aukist úr 5,9 milljörðum króna í tæpleg 7,8 milljarða króna, eða um 31 prósent.

Sex milljarða tap frá byrjun síðasta árs

Tap Valitor á þessu ári kemur í framhaldi af 1,9 milljarða króna tapi í fyrra. Samanlagt tap fyrirtækisins frá byrjun árs 20189 nemur því sex milljörðum króna. Árið 2017 skilaði Valitor 940 milljón króna hagnaði.

Benedikt Gíslason, bankastjóri Arion banka, sagði í tilkynningu til Kauphallar Íslands í gær, þar sem fjallað er um umtalsverðar niðurfærslur á virði eigna sem eru til sölu, að í tilfelli Valitor sé ástæðan vegna fjárfestingar í alþjóðlegri starfsemi og „gjaldfærsla kostnaðar vegna skipulagsbreytinga.“

En ein helsta ástæðan fyrir tapinu er þó sú að einn stærsti viðskiptavinur Valitor, Stripe, hætti færsluhirðingarviðskiptum sínum við Valitor um mitt ár 2018, líkt og Kjarninn greindi frá í mars í fyrra að stæði til. Þessi ákvörðun Stripe leiddi til þess, samkvæmt afkomutilkynningu frá Valitor sem send var út fyrr á þessu ári, að velta fyrirtækisins fluttist frá Valitor sem „hafði talsverð áhrif á vöxt tekna og viðskipta Valitor á árinu.“

Greiddu háar skaðabætur

Hluti af tapinu í ár er tilkomið vegna þess að Valitor samdi um að greiða atacell og Sunshine Press Productions, félagi tengt Wikileaks, 1,2 milljarða króna fyrr á þessu ári í skaðabætur.

Landsbankinn, sem er í eigu íslenska ríkisins, greiddi alls 426 milljónir króna af af þeim bótum. Ástæða þess að Landsbankinn greiddi hluta skaðabótanna er sú að bankinn átti 38,62 prósent í Valitor þegar broti var gegn ofangreindum félögum. Þegar Landsbankinn seldi Arion banka hlut sinn í Valitor í desember 2014 var kveðið á um það í kaupsamningi að hann myndi halda Arion banka skaðlausum í málinu í hlutfalli við seldan eignarhlut. Því greiddi Landsbankinn Arion banka 426 milljónir króna þegar sátt lá fyrir í málinu, í samræmi við það samkomulag. Valitor, dótturfélag Arion banka, greiddi svo bæturnar.