Banka­reikn­ingar í eigu Sacky Shang­hala, fyrr­ver­andi dóms­mála­ráð­herra Namib­íu, og Tam­son Hatukulipi, kall­aður Fitty, hafa verið frystir í tengslum við rann­sókn á ætl­aðri mútu­þægni þeirra. Fitty er tengda­sonur Bern­hard Esau, fyrr­ver­andi sjáv­ar­út­vegs­ráð­herra Namib­íu. 

Þetta kemur fram í prentút­gáfu The Namibian sem kemur út á morgun en hægt er að lesa á net­síðu mið­ils­ins. 

Þar segir einnig að menn­irnir tveir hafi farið til Cape Town í Suð­ur­-Afr­íku nýverið og hafi enn ekki snúið aftur til Namib­íu. 

Í frétta­skýr­inga­þætt­inum Kveik, sem sýndur var á þriðju­dag, kom fram að að Fitty hefði kynnt  lyk­il­­stjórn­­endur Sam­herja svo fyrir tengda­­föður sín­um og þeir tveir, ásamt Shangala og James Hatukulipi, hafi síðan myndað kjarn­ann í hópi valda­manna í Namibíu sem tók við mútu­greiðslum frá Sam­herja fyrir ódýrt aðgengi að hrossa­makríl­skvóta í land­in­u. 

Í Kveik kom fram að greiðslur Sam­herja til hóps­ins hefðu numið að minnsta kosti 1,4 millj­örðum króna. 

Bæði Shang­hala og Esau sögðu af sér ráð­herra­emb­ætti á mið­viku­dag, innan við sól­ar­hring eftir að Kveiks­þátt­ur­inn var sýnd­ur. James Hatukulipi hefur auk þess þurft að segja af sér sem for­stjóri fjár­fest­inga­fé­lags og Þor­steinn Már Bald­vins­son hefur stigið tíma­bundið til hliðar sem for­stjóri Sam­herj­a. 

Málið er nú til rann­sóknar í þremur lönd­um: Namib­íu, Íslandi og í Nor­egi. Grunur er um að auk mútu­greiðslna hafi Sam­herji stundað umfangs­mikla skatta­snið­göngu og pen­inga­þvætt­i.