Björgólfur Jóhannsson, starfandi forstjóri Samherja, segir að fyrirtækið telji að endurnýjuð kyrrsetning verksmiðjutogarans Heinaste standist ekki namibísk lög. Það muni grípa til ráðstafana til að hnekkja henni fyrir namibískum dómstólum ef nauðsyn krefur. Þetta kemur fram í tilkynningu frá Samherja í dag.
Fram kom í fréttum í síðustu viku að Heinaste hefði verið kyrrsettur á ný á grundvelli laga um skipulagða glæpastarfsemi. Einungis er heimilt að beita slíkri kyrrsetningu ef rökstuddur grunur er um að til standi að fjarlægja umrædda eign.
Eitt skip eftir í Namibíu
Í tilkynningu Samherja segir að af þeim þremur skipum sem stundar hafa veiðar í namibískri lögsögu undanfarið ár, Geysir, Heinaste og Saga, sé aðeins eitt eftir í Namibíu og sé þar um að ræða verksmiðjutogarann Heinaste. Markmiðið hafi verið að hafa skipið áfram í Namibíu í því skyni að selja það eða leigja áfram til namibískra aðila sem stunda útgerð í landinu svo verja mætti störf þeirra sjómanna sem hafa verið í áhöfn skipsins.
„Aðeins aðilar sem hafa verið sakfelldir geta þurft að þola haldlagningu á eignum sínum samkvæmt namibískum lögum. Eigandi Heinaste hefur ekki verið ákærður eða sakfelldur fyrir refsiverða háttsemi. Samherji hafði áður lýst yfir ánægju með að mál vegna Heinaste og skipstjóra þess hefði verið leitt til lykta fyrir dómi í Walvis Bay hinn 5. febrúar síðastliðinn. Skipstjórinn játaði sök í þremur ákæruliðum um að hafa stundað veiðar á svæði þar sem sjávardýpt var minni en 200 metrar sem gengur í berhögg við þau skilyrði sem gilda um rétthafa úthlutaðs kvóta sem Heinaste var að veiða í umrætt sinn.
Skipstjórinn var sektaður en dómstóllinn hafnaði kröfu namibíska ríkisins um haldlagningu skipsins því ekki þótti sannað að eigandi þess, Heinaste Investments (Pty) Ltd., sem Samherji á ráðandi hlut í, hefði ekki gripið til allra viðeigandi úræða til að koma í veg fyrir að skipið væri notað á ólögmætan hátt. Af þessari ástæðu var það niðurstaða dómstólsins að afhenda bæri eiganda Heinaste þau skipsgögn sem höfðu verið haldlögð,“ segir í tilkynningunni.
Namibíska lögreglan vísvitandi hunsað dómsúrskurðinn
Björgólfur segir enn fremur að forsvarsmenn fyrirtækisins hafi áhyggjur af því að namibíska lögreglan hafi vísvitandi hunsað dómsúrskurðinn og neitað að skila pappírum skipsins til eiganda þess eins og dómstóllinn hafi fyrirskipað að ætti að gera. Þetta muni seinka áformum um endurráðningu áhafnar skipsins til hagsbóta fyrir namibískt samfélag.
