Lands­menn virð­ast í auknum mæli sækja í úti­vist þetta sum­ar­ið. Spreng­ing hefur orðið í bók­unum á ferðum hjá Ferða­fé­lagi Íslands og sam­kvæmt nýlegri könnun Ferða­mála­stofu ætla níu af hverjum tíu að ferð­ast inn­an­lands í sum­ar.

Starfs­fólk Ferða­fé­lags Íslands finnur vel fyrir auknum áhuga á ferðum félags­ins í sum­ar. Sést það meðal ann­ars í því að félags­mönnum hefur fjölgað um rúm­lega 300 á síð­ustu vik­um. Fjöldi félaga nálg­ast 10.000 og hafa þeir aldrei verið fleiri. Þá hefur selst upp í margar ferðir félags­ins og það þurft að bæta við ferð­um.

„Þegar ljóst var hversu mik­ill áhugi var á ferðum félags­ins um miðjan apr­íl, þá kom ferða­nefndin aftur saman og bætt var við ferðum og verk­efn­um. Segja má að við­bót nýrra ferða og bók­anir nemi þegar um 30% aukn­ingu og eigum við þó enn eftir að bæta við ferðum og munum gera það á næstu tveimur vik­um.“ segir Páll Guð­munds­son, fram­kvæmda­stjóri Ferða­fé­lags­ins, í sam­tali við Kjarn­ann. 

„Í ljósi þessa mikla áhuga þá höfum við bætt við starfs­fólki í sum­ar­störf í afgreiðslu sem er auð­vitað mjög ánægju­legt miðað við hvað staðan er víða þung í atvinnu­líf­in­u,“ bætir hann við.

Hall­dór Hreins­son eig­andi Fjalla­kof­ans hefur ekki farið var­hluta af auknum áhuga land­ans á úti­vist. „Frá nið­ur­fell­ingu sam­komu­banns er þetta líkt og skrúfað hafi verið frá krana,“ segir Hall­dór um aðsókn­ina í úti­vist­ar­vör­ur.

Að hans mati er ljóst að sam­komu­bann og aukin inni­vera sem henni fylgdi hafi aukið áhuga fólks á úti­vist. „Við erum að taka á móti mikið af fjöl­skyldum sem eru að stíga upp úr sóf­anum og ætla að ferð­ast inn­an­lands af því að þau kom­ast ekki til sól­ar­landa. Þetta er jákvæð þróun í þeirri merk­ingu að við­kom­andi ein­stak­lingar og fjöl­skyldur kynn­ast land­inu og hvort öðru betur í svona ferða­lög­um.“

Hall­dór bendir á að mesta aukn­ingin sé þó í sölu fjalla­skíða. „Þetta er búið að fjór­fald­ast núna miðað við eðli­legt árferði, bara á síð­ustu mán­uðum og maí er búinn að vera klikk­að­ur,” segir Hall­dór sem telur margt fólk vera að stíga sín fyrstu skref í þeirri teg­und úti­vist­ar.

Þeir Páll og Hall­dór eru báðir sann­færðir um að fækkun erlendra ferða­manna muni auka áhuga Íslend­inga fyrir því að heim­sækja þá ferða­manna­staði sem almennt eru vin­sæl­ast­ir. „Vegna mik­ils fjölda ferða­manna á þekktum ferða­manna­stöðum und­an­farin ár höfum við Íslend­ingar víða hörfað af þeim svæðum og leitað ann­að. Nú er því kær­komið tæki­færi að heim­sækja þessa staði á ný,” segir Páll.