Fólk sem sýktist af COVID-19 er farið að finna verulega fyrir langtímaáhrifum sjúkdómsins. Stuttar gönguferðir verða eins og að klífa Everest-fjall. Fólk lýsir „heilaþoku“ sem geri þeim erfitt að muna og einnig erfitt að lesa, skrifa og tala. Einnig finnur það fyrir stöðugri þreytu, er andstutt og verkjar í vöðva. Einföldustu heimilisstörf verða því erfið. Og að snúa aftur til vinnu hefur reynst sumum ómögulegt.
Í Evrópu, þar sem faraldurinn gekk yfir fyrr en í Bandaríkjunum, eru læknar farnir að sjá langtímaeinkennin koma í ljós og bjóða fólki upp á endurhæfingu.
„Það sem kemur mér mest á óvart er að jafnvel sjúklingar sem þurftu ekki að leggjast inn á gjörgæslu eru mjög veikburða. Það finnast engin merki um vandamál í tengslum við hjarta-, æða- eða lungnakerfið en þeir eiga engu að síður erfitt með að ganga upp nokkrar tröppur,“ hefur CNN eftir Piero Clarvio, yfirmanni endurhæfingarmiðstöðvar fyrir COVID-sjúklinga í Genóa á Ítalíu. Hann segir flesta þeirra sem enn hafa ekki náð sér vera þróttlausa. Það geri fólki erfitt fyrir að snúa aftur til vinnu.
Er faraldur kórónuveirunnar hóf að breiðast út um heiminn var talið að hann legðist verst á eldra fólk. Hins vegar er það aðallega yngra fólk sem hefur verið að sýkjast síðustu vikur og mánuði. Og þrátt fyrir ungan aldur glímir það við eftirköstum mörgum mánuðum eftir að hafa sýkst.
Í frétt CNN segir að nú séu vísbendingar um að COVID-19 sé ekki aðeins sjúkdómur sem leggist á öndunarfærin heldur á öll líffæri og geti því skaðað lungu, nýru, lifur, hjarta, húðina og taugakerfið svo dæmi séu tekin.
Í nýrri rannsókn sem gerð var við Háskólann í Texas kemur í ljós að um einn af hverjum fimm sem sýkjast af COVID fá alvarleg einkenni.
