Fáir af þeim sautján sem greindust með COVID-19 innanlands í gær voru í sóttkví. Alls greindust 20 tilfelli í gær því þrjú til viðbótar greindust í landamæraskimun.
Flestir sem eru sýktir eru í aldurshópnum 18-29 ára eða samtals 40 manns. RÚV segist hafa heimildir fyrir því að búið sé að rekja annað hópsmitið sem verið hefur í gangi hér á landi til veitingastaðar í Reykjavík.
Víðir Reynisson, yfirlögregluþjónn hjá ríkislögreglustjóra, sagði í hádegisfréttum RÚV að veikindi fólksins væru misjöfn en að mögulega yrðu einhverjir lagðir inn.
Einstaklingar sem dvöldu í Vestmannaeyjum um verslunarmannahelgina hafa nú greinst með COVID-19 og af þeim sökum eru tæplega 50 manns komin í sóttkví í Eyjum.
Sóttvarnalæknir sagði á fundi almannavarna í gær að ekki væri að svo stöddu tímabært að herða samfélagslegar aðgerðir. Það kann nú að breytast því Víðir sagði í fréttum RÚV að það væri nú til skoðunar. Fyrst yrði hins vegar að kanna hvort að hertari aðgerðir hefðu komið í veg fyrir þau smit sem komið hafa upp síðustu daga. Sagði hann engar fregnir hafa borist af brotum á samkomubanni. Líklegra væri að 2 metra reglan væri ekki virt.
Víðir sagði ekki lengur um hópsmit að ræða. „Ég held að við séum að tala um faraldur. Við erum komin í faraldur. Eins og í vetur erum við að sjá smit koma upp um allt land.“
