Sjálf­stæð­is­flokkur og Fram­sókn­ar­flokkur hafa kom­ist að sam­komu­lagi um meiri­hluta­sam­starf í Múla­þingi, nýju sveit­ar­fé­lagi á Aust­ur­landi. Odd­vitar flokk­anna munu und­ir­rita og kynna mál­efna­samn­ing á raf­rænum fundi klukkan 14:30 í dag.

Við­ræður á milli flokk­anna tveggja hafa staðið yfir frá því 22. sept­em­ber, en kosið var til sveit­ar­stjórnar í nýja sveit­ar­fé­lag­inu 19. sept­em­ber. Sjálf­stæð­is­flokkur fékk mest fylgi í kosn­ing­un­um, tæp 29 pró­sent atkvæða og fjóra full­trúa í ell­efu manna bæj­ar­stjórn, en Fram­sókn­ar­flokk­ur­inn fékk tæp 19 pró­sent og tvo full­trúa í bæj­ar­stjórn. Saman eru flokk­arnir því með eins manns meiri­hluta og um 48 pró­sent atkvæða á bak við sig.

Sjálf­stæð­is­flokk­ur­inn hafði tvo val­kosti til mynd­unar tveggja flokka meiri­hluta í sveit­ar­fé­lag­inu, að ræða við Fram­sókn eða Aust­ur­list­ann, fram­boð félags­hyggju­fólks í nýja sveit­ar­fé­lag­inu, sem fékk tæp 27 pró­sent atkvæða og þrjá full­trúa í bæj­ar­stjórn.

Fram­boð Vinstri grænna og Mið­flokks­ins náðu svo hvort um sig einum full­trúa inn í bæj­ar­stjórn, með rúm 13 og tæp 11 pró­sent atkvæða. Mið­flokks­menn hafa sagt að Klaust­ur­málið hafi spillt fyrir sér í kosn­inga­bar­átt­unni, eins og Kjarn­inn sagði frá í gær.

Kynja­hlut­föll innan meiri­hlut­ans gagn­rýnd

Nokkur kergja hefur verið í her­búðum Aust­ur­list­ans vegna þeirrar ákvörð­unar sjálf­stæð­is­manna að ganga til við­ræðna við Fram­sókn­ar­flokk­inn.

Hildur Þór­is­dóttir odd­viti Aust­ur­list­ans sagði í sam­tali við Aust­ur­frétt eftir að sú ákvörðun lá fyrir að verið væri að snið­ganga vilja kjós­enda með því að tvö stærstu fram­boðin ræddu ekki saman og gagn­rýndi einnig að ein­ungis ein kona yrði í meiri­hluta sveit­ar­stjórnar ef raunin yrði sú að Sjálf­stæð­is­flokk­ur­inn og Fram­sókn mynd­uðu meiri­hluta.

Fréttir af sam­stjórn allra flokka á Akur­eyri urðu einnig til þess að Aust­ur­list­inn viðr­aði þá hug­mynd að sama fyr­ir­komu­lag yrði tekið upp í sveit­ar­fé­lag­inu, en það náði ekki upp á pall­borð­ið.

Sveit­ar­fé­lagið Múla­þing varð til með sam­ein­ingu Borg­ar­fjarð­ar­hrepps, Djúpa­vogs­hrepps, Fljóts­dals­hér­aðs og Seyð­is­fjarð­ar­kaup­staðar og mun ný sveit­ar­stjórn sitja fram til vors­ins 2022, er nýja sveit­ar­fé­lagið dettur inn í hinn hefð­bundna kosn­inga­takt sveit­ar­stjórn­ar­stigs­ins.

Enn á eftir að stað­festa að Múla­þing verði form­lega nafn sveit­ar­fé­lags­ins, en það nafn varð hlut­skarp­ast í ráð­gef­andi íbúa­kosn­ingu í sveit­ar­fé­lag­inu sem fram fór með­fram for­seta­kosn­ing­unum í sum­ar.