„Það á að slátra manni fyrir að upplýsa um grimmdarverk og glæpi. Fyrir að opinbera sannleikann.“ Þetta sagði ritstjóri Wikileaks, Kristinn Hrafnsson, á Facebook í gær en tilefnið eru réttahöld yfir Julian Assange, stofnanda Wikileaks.
Í réttarhöldunum verður úrskurðað um hvort Assange verði framseldur til Bandaríkjanna, þar sem hann á yfir höfði sér allt að 175 ára langa fangelsisvist fyrir njósnir. Úrskurðar er að vænta þann 4. janúar næstkomandi.
Kristinn kom hingað til lands fyrir nokkrum dögum eftir að hafa varið heilum mánuði í réttarsal í London. Hann segist hafa átt í mesta basli með ná utan um þá „skefjalausu grimmd“ sem hann hafi orðið vitni að. Enn hafi hann ekki náð að komast að kjarna „þess viðbjóðs sem er í gangi undir holu og ógeðfelldu yfirskyni sýndarmennsku réttlátrar málsmeðferðar í svokölluðu réttarrríki“.
Árið 2010 birti Wikileaks 470.000 trúnaðarskjöl frá bandaríska hernum um utanríkisþjónustu og stríðin í Afganistan og Írak. Síðar birti Wikileaks 250.000 önnur skjöl. Bandarísk stjórnvöld telja að um alvarlegt lögbrot og njósnir sé að ræða en Wikileaks segir upplýsingarnar eiga erindi við almenning.
Kristinn hafa tekið þátt í þessum verkum sem Assange er ákærður fyrir og leit hann á það sem blaðamennsku til að þjóna þeim æðstu gildum sem felast í því sem hann gerði að lífsstarfi.
„Ég gefst ekki upp því of mikið er í húfi en ég hef verið vanmáttugur og orðlaus,“ skrifar hann.
Örfáir komust að í réttarsalnum
Fáir komust að í almannarýminu í réttarsalnum, að sögn Kristins. „Þangað fengu bara fimm að komast á hverjum degi, pabbi Julians, bróðir hans, frændi og frænka og einstaka stuðningsmaður. Líklegast þykir mikil gæska í því fólgin að hleypa ættingjum að aftökustaðnum þar sem lífið er tekið af fólki undir formfestu og réttlæti hinnar snyrtilegu og hvassbrýndu fallaxar.“
Hann segir að vonandi komi hann þessu almennilega í orð síðar. Þegar svellandi reiðin dvíni eilítið.
Kristinn endar færsluna á að segja að það hafi verið lítið sem ekkert sem þeir Assange gátu rætt þennan mánuð í réttarsalnum. „Á lokastundu kvaddi ég hann með því að leggja krepptan hnefann utan á skothelda glerið sem aðskildi mig og hann, fangann í búrinu, fyrir að upplýsa um stríðsglæpi, pyntingar og ógeð. Hann lagði hnefann á móti mínum fyrir innan þykkt glerið. Orðlaus tenging,“ skrifar hann.
Það eru nokkrir dagar síðan ég kom til Íslands eftir að hafa varið heilum mánuði í réttarsal í London. Hef átt í mesta...
Posted by Kristinn Hrafnsson on Friday, October 9, 2020
