Sir Keir Star­mer, for­maður breska Verka­manna­flokks­ins, hefur ákveðið að víkja for­vera sín­um, Jer­emy Cor­byn, úr flokkn­um. Frá þessu er greint í breskum fjöl­miðlum í dag. Á­stæðan er við­brögð Cor­byns við nýrri skýrslu frá mann­rétt­inda­sam­tök­unum EHRC, sem skoð­aði ásak­anir um gyð­inga­andúð innan flokks­ins.

Sam­tökin komust að þeirri nið­ur­stöðu að flokk­ur­inn, undir stjórn Cor­byns, væri ábyrgur fyrir póli­tískum afskiptum af kvört­unum um gyð­inga­andúð frá félags­mönn­um, láðst að þjálfa starfs­fólk flokks­ins sem tók á móti slíkum kvört­unum á við­eig­andi hátt og sömu­leiðis gerst sekur um áreitni.

Í frétt Guar­dian af þessu máli segir að Cor­byn hafi brugð­ist við skýrsl­unni í morgun með þeim orðum að mál tengd gyð­inga­andúð innan Verka­manna­flokks­ins hefðu verið blásin upp í póli­tískum til­gangi, bæði af and­stæð­ingum innan flokks og utan og fjöl­miðl­um.

Cor­byn sagði þó jafn­framt að hver sá sem segði að enga gyð­inga­andúð væri að finna innan flokks­ins hefði rangt fyrir sér og að hann von­að­ist til þess að flokk­ur­inn myndi inn­leiða ráð­legg­ingar frá skýrslu­höf­undum hratt og örugg­lega, þrátt fyrir að hann væri ekki sam­mála öllum nið­ur­stöð­un­um.

For­gangs­mál hjá Star­mer að upp­ræta gyð­inga­andúð

Deildar mein­ingar hafa komið fram um umfang vand­ans og alvar­leika hans á und­an­förnum miss­erum, en Keir Star­mer hefur gert það að for­gangs­máli hjá sér frá því hann tók við for­mennsku fyrr á árinu að taka á gyð­inga­andúð innan flokks­ins með fest­u.

Hann hefur sagt nið­ur­stöður skýrsl­unnar skammar­legar fyrir Verka­manna­flokk­inn.

Tveimur tímum eftir að honum var gert kunn­ugt um ofan­greind ummæli Cor­byn vék hann for­vera sínum úr flokkn­um, eftir að Cor­byn hafði neitað að draga orð sín, um að vand­inn hefði verið blás­inn upp, til baka.

Fram kemur í frétt Guar­dian að brott­vísun Cor­byn úr flokknum sé tíma­bund­in, að minnsta kosti þar til að rann­sókn á mál­inu fari fram. Cor­byn segir í yfir­lýs­ingu á Twitter að hann muni berj­ast gegn þess­ari ákvörðun flokks­for­yst­unn­ar, sem sé rammpóli­tísk.