Origo, sem er skráð á íslenskan hlutabréfamarkað, gerði í gærkvöldi skuldbindandi kaupsamning við Diversis Tempo Holdings II LLC, félags á vegum bandaríska tæknifjárfestingarsjóðsins Diversis Capital, um sölu á öllum tæplega 40 prósent eignarhlut félagsins í Tempo fyrir 195 milljónir Bandaríkjadala, eða 27,7 milljarða króna.
Heildarvirði Tempo í viðskiptunum er áætlað um 600 milljónir Bandaríkjadala, eða 85,4 milljarðar króna, og söluhagnaður Origo, að teknu tilliti bókfærðs virðis og kostnaðar, er áætlaður 22,2 milljarðar króna.
Til samanburðar má nefna að markaðsvirði Origo í heild var 30,1 milljarður króna við lokun markaða í gær. Söluhagnaðurinn af Tempo er því næstum 74 prósent af markaðsvirði félagsins. Origo velti tæplega 9,3 milljörðum króna á fyrri hluta ársins 2022 og hagnaðist um 561,6 milljónir króna. Eigið fé félagsins var 8,9 milljarðar króna í lok júní síðastliðins. Að viðbættum væntum söluhagnaði mun eigið fé Origo fara upp í um 31,1 milljarð króna.
Stærstu hluthafar Origo eru lífeyrissjóður verzlunarmanna, Birta lífeyrissjóður, Stapi lífeyrissjóður og Lífsverk. Saman eiga þessir fjórir sjóðir um 37,7 prósent hlut. Stærsti einkafjárfestirinn í Origo er Frigus II, í eigu Ágústs og Lýðs Guðmundssona, fyrrverandi aðaleigenda Exista og stærstu eigenda Bakkavarar, og Sigurðar Valtýssonar, fyrrverandi forstjóra Exista sem á 4,25 prósent hlut.
Stofnað 2009 og margfaldast í virði á fjórum árum
Tempo var stofnað árið 2009, af starfsfólki TM Software, sem þá var dótturfélag Nýherja, og varð fljótt leiðandi hugbúnaðarfyrirtæki sem þróaði verkefnastýringar- og viðskiptahugbúnað (B2B) fyrir JIRA kerfið frá Atlassian. Um hreint íslenskt hugvitsfyrirtæki er því að ræða.
Vöxturinn á tekjum vegna Tempo var um 50 prósent á ári fyrstu árin. Snemma árs 2015 var Tempo búið að vaxa svo mikið að ákveðið var að aðskilja reksturinn frá TM Software og setja hann inn í sérstakt fyrirtæki. Ári síðar, 2016, var greint frá því að ráðgjafar hefðu verið ráðnir til að undirbúa söluferli. Kjarninn fjallaði ítarlega um vegferð Tempo á þessum árum.
Í tilkynningunni sem send var til Kauphallar í gær er haft eftir Hjalta Þórarinssyni, stjórnarformanni Origo að nú væri komið að ánægjulegum tímamótum eftir langa samfylgd. „Stórt skref var tekið í nóvember 2018 þegar Origo seldi meirihluta í félaginu til Diversis Capital í þeim tilgangi að fá meðfjárfesta með alþjóðlega reynslu til að hraða vexti félagsins og auka virði fyrir hluthafa Origo. Sú vegferð sem Origo lagði upp með þá hefur að fullu gengið eftir og rúmlega það, og hefur virði Tempo áttfaldast frá því haustið 2018. Arðsemi Origo af þessum viðskiptum er frábær og hluthafar Origo innleysa hér mikil verðmæti.”
Jón Björnsson, forstjóri Origo, segir á sama stað að sala á meirihluta í félaginu til Diversis Capital árið 2018 hafi reynst mjög góð ákvörðun hjá stjórnendum Origo. „Árangur Diversis með Tempo hefur farið fram úr væntingum. Tempo stendur nú á ákveðnum krossgötum í sinni vegferð eftir kaup á tveimur nýjum félögum sem meira en tvöfaldar stærð félagsins.
Vegferð Tempo sýnir skýrt hvað frábært starfsfólk, íslenskt hugvit, stuðningur eigenda og stjórnvalda getur búið til mikil verðmæti í hugbúnaðargeiranum. Origo heldur áfram að þróa lausnir sem breyta leiknum líkt og Tempo hefur gert og vonum við að fleiri hugbúnaðarvörur geti átt jafn farsælan feril og Tempo.“
