Davíð Helgason kemur nýr inn á lista Forbes yfir milljarðamæringa heimsins en auður hans er metinn á einn milljarð Bandaríkjadala, tæplega 127 milljarða króna sem setur hann í sæti 2674 á lista Forbes. Davíð er einn af stofnendum hugbúnaðarfyrirtækisins Unity en samkvæmt umfjöllun Viðskiptablaðsins frá því í desember á síðasta ári átti hann 10,4 milljónir hluta í félaginu eða um fjögur prósent. Heildarvirði þess hlutar er í dag yfir milljarður dala, en hlutabréfaverð Unity stendur í rúmum 102 dölum þegar þetta er skrifað.
Vöxtur Unity hefur verið mjög mikill og hraður á undanförnum misserum. Félagið var skráð í kauphöll í september á síðasta ári og nam útboðsgengi félagsins 52 Bandaríkjadölum á hlut. Verð bréfa félagsins reis hratt á fyrstu mánuðunum eftir skráningu og fór það hæst í rúma 172 dali á hvert bréf skömmu fyrir síðustu jól. Hlutabréfaverðið stendur eins og er í rúmum 102 dölum á hlut, eins og áður sagði, sem þýðir að heildarvirði félagsins er um 28,4 milljarðar dala. Samkvæmt áðurnefndri umfjöllun Viðskiptablaðsins fór Unity í gegnum fjármögnunarumferð á árinu 2019 en virði félagsins var þá metið á um sex milljarða dala.
Unity var sett á laggirnar árið 2004 í Kaupmannahöfn. Nokkrir af þekktustu snjallsímaleikjum heims nota tæknilausnir frá Unity, til að mynda Pokemon Go, Among Us og Overcooked. Davíð starfaði sem forstjóri félagsins allt til ársins 2014 og situr enn í stjórn félagsins. Samkvæmt Forbes hefur hann snúið sér í auknum mæli að sprotafjárfestingum eftir að hann hætti sem forstjóri félagsins.
Björgólfur Thor ríkari í ár en neðar á lista
Björgólfur Thor Björgólfsson hefur um langa hríð einn Íslendinga átt sæti á lista Forbes. Fyrir hrun, árin 2007 og 2008 voru eignir hans metnar á 3,5 milljarða Bandaríkjadala áður en hann tók dýfu á listanum árið 2009 þegar eignir hans voru metnar á einn milljarð dala. Hann datt í kjölfarið út af listanum en hefur átt þar sæti síðan árið 2015.
Á nýjasta listanum eru eignir Björgólfs metnar á 2,2 milljarða dala sem er aukning um tíu prósent frá því í fyrra þegar eignir hans voru metnar á tvo milljarða. Engu að síður færist Björgólfur niður listann hann situr nú í 1444. sæti listans en í fyrra var hann númer 1063 á listanum yfir auðugasta fólk heims.
Af fjárfestingareignum Björgólfs sem Forbes tiltekur eru hlutir í svissneska samheitalyfjafyrirtækinu Xantis og í síleska fjarskiptafyrirtækinu WOM. Þá er Björgólfur einnig sagður hafa fjárfest í rafmyntum og í sprotafyrirtækjunum Zwift, Deliveroo og Stripe. Samkvæmt heimasíðu Novator, fjárfestingafélags sem er að mestu í eigu Björgólfs, fjárfesti félagið í Zwift og Deliveroo árið 2016 og í Stripe árið 2019.
Kunnugleg nöfn í efstu sætum
Síðasta ár hefur verið giftusamt fyrir auðmenn heimsins enda hefur fjölgað verulega á lista Forbes yfir þá einstaklinga sem eiga eignir sem metnar eru á milljarð dala eða meira. Fjöldi milljarðamæringa á listanum er nú 2.755 og fjölgar um 660 nöfn á listanum frá því í fyrra. Eignir hópsins eru metnar á 13,1 billjón Bandaríkjadala, þ.e. rúmlega 13 þúsund milljarða dala. Í fyrra námu heildareignir auðmanna á lista Forbes 8 billjónum dala. Bandaríkjamenn eru fyrirferðamestir á listanum eftir sem áður en þaðan koma 724 milljarðamæringanna á listanum. Næst á eftir kemur Kína, þar með talið Hong Kong og Makaó, en þaðan koma 698 milljarðamæringar.
Líkt og í fyrra trónir Jeff Bezos, stofnandi og stærsti eigandi Amazon á toppi listans. Auðæfi hans eru metin á 177 milljarða dala sem er töluvert stökk frá því í fyrra er auður hans var metinn á 113 milljarða. Amazon hefur vegnað vel á síðasta ári en verð hlutabréfa félagsins hefur hækkað um rúmlega 60 prósent á síðustu tólf mánuðum.
Einn af hástökkvurum listans, í það minnsta hlutfallslega, er Elon Musk sem vermir annað sæti. Eignir hans nema 151 milljarði dala en í fyrra nam auður hans 24,6 milljörðum. Hann hoppar úr 31. sæti listans í fyrra. Musk á rúmlega 21 prósent í bílaframleiðandanum Tesla en hlutabréf félagsins hafa rúmlega fimmfaldast í verði á síðustu tólf mánuðum.
Í þriðja sæti listans situr Bernard Arnault og fjölskylda hans. Hann situr á sama stað á listanum þrátt fyrir að auður hans hafi ríflega tvöfaldast frá því að listinn var síðast gefinn út Arnault og fjölskylda hans eiga mörg af þekktustu lúxusvörumerkjum heims, til að mynda Louis Vuitton. Á eftir honum á listanum koma nokkur kunnugleg nöfn, Bill Gates, Mark Zuckerberg og Warren Buffet.
Ríkasta konan á listanum er Francoise Bettencourt Meyers, eignir hennar nema tæplega 74 milljörðum dala sem setur hana í 12. sæti á lista þeirra ríkustu. Francoise Bettencourt og fjölskylda hennar eiga ríflega þriðjung í snyrtivöruframleiðandanum L’oréal. Næsta konan á eftir Bettencourt er Alice Walton sem situr í 17. sæti listans með eignir upp á tæplega 62 milljarða dala en hún er einn stærsti eigandi verslunarkeðjunnar Walmart ásamt bræðrum sínum Jim og Rob sem koma næstir á eftir Alice á auðmannalista Forbes.
Jim Ratcliffe ríkasti Bretinn
Samkvæmt umfjöllun Forbes um evrópska milljarðamæringa þá var nokkur fjölgun í þeirra hópi á síðasta ári, eru alls 628 í ár samanborið við 511 í fyrra. Eignir hópsins eru metnar á þrjár billjónir dala, einni billjón dala meira en í fyrra. Áðurnefndur Bernard Arnault er ríkastur Evrópumanna. Næstur á listanum er Amancio Ortega frá Spáni en eignir hans nema 77 milljörðum dala svo hann rétt nær að vera hálfdrættingur Bernard Arnault. Þar á eftir kemur áðurnefnd Francoise Bettencourt Meyers, ríkasta kona heims.
Ríkasti maður Norðurlandanna er hinn sænski Stefan Persson en hann á rúmlega þriðjung í fataverslanakeðjunni H&M. Auður hans óx um tæp 60 prósent á árinu, úr 13,5 milljörðum dala árið 2020 í 21,3 milljarða dala. Svíþjóð er það land Norðurlandanna sem á flesta milljarðamæringa á lista Forbes, alls 41 talsins. Fjöldi norskra milljarðamæringa á listanum er tólf, Danir eiga tíu milljarðamæringa á listanum og Finnar sjö.
Efstur á lista yfir ríkustu Bretana er James Ratcliffe stofnandi jarðolíuefnafyrirtækisins Ineos en Jim, eins og hann er iðulega kallaður, hefur látið til sín taka hér á landi á undanförnum árum. Eignir hans nema 17 milljörðum Bandaríkjadala sem gerir Ratcliffe 113. ríkasta mann heims. Á síðustu árum hefur hann keypt jarðir á Austur- og Norð-Austurlandi, til að mynda í Þistilfirði, í Vopnafirði auk þess sem hann keypti meirihluta af jörðinni Grímsstöðum. Eignarhald Ratcliffe á jörðum hérlendis er í gegnum félagið Dylan S.A. sem er móðurfélag um 20 annarra félaga sem eiga jarðir á Íslandi. Ratcliffe hefur sagt að stórfelld uppkaup hans á jörðum hér á landi séu hluti af yfirstandandi aðgerðum til verndar íslenska laxastofninum.
