Íslandsbanki birti tilkynningu í Kauphöll Íslands sem er tímasett 19:35 í kvöld þar sem greint er frá því að umsjónaraðilar söluferlis á að minnsta kosti 20 prósent hlut í bankanum hafi þegar móttekið áskriftir fyrir þeirri lágmarksstærð. Miðað við dagslokagengi þá var virði þess hlutar að minnsta kosti 48,8 milljarðar króna. Tilkynnt var um að söluferlið væri hafið klukkan 16:11 í dag og því tók rúma þrjár klukkutíma að finna kaupendur að hlutnum.
Almennum fjárfestum stendur ekki til boða að taka þátt í viðskiptunum heldur var ákveðið að sölufyrirkomulagið yrði með tilboðsferli til innlendra og erlendra hæfra fagfjárfesta. Það þýðir að almenningi býðst ekki að kaupa hlut.
Ákvörðun um útboðsgengi og endanlegan hlut sem seldur verður mun á endanum verða í höndum Bjarna Benediktssonar, fjármála- og efnahagsráðherra en tilkynnt verður um hana fyrir opnun markaða í fyrramálið.
Ætla að selja eftirstandandi hlut fyrir lok næsta árs
Markaðsvirði Íslandsbanka við lokun markaða í dag var 244 milljarðar króna. Ríkissjóður seldi 35 prósent hlut fyrir aðeins hærri upphæð, 55,3 milljarða króna, í fyrrasumar. Markaðsvirði þess hlutar nú er um 85,4 milljarðar króna og hann því hækkað um rúmlega 30 milljarða króna frá því að ríkissjóður seldi.
Hlutur ríkissjóðs mun fara niður í að minnsta kosti 45 prósent eftir söluferlið sem sett var á stað í dag.
Tilkynnt var um það síðdegis á föstudag að Bjarni hefði ákveðið að hefja framhald sölumeðferðar á hlutum í Íslandsbanka í samræmi við tillögu Bankasýslu ríkisins frá 20. janúar síðastliðnum. Ráðherrann sendi Bankasýslunni bréf um ákvörðunina þann dag.
Mikill hagnaður í fyrra og stefnt á tugmilljarða útgreiðslur
Íslandsbanki hagnaðist um 23,7 milljarðar króna á árinu 2021. Arðsemi eigin fjár var 14,2 prósent og sem var vel yfir tíu prósent markmiði bankans. Kostnaðarhlutfall bankans lækkaði úr 54,3 prósent í 46,2 prósent milli ára.
Eigið fé Íslandsbanka var 203,7 milljarðar króna um síðustu áramót og eiginfjárhlutfall bankans 25,3 prósent. Útlán til viðskiptavina Íslandsbanka jukust um 7,9 prósent á síðasta ári. Þá aukningu má að mestu rekja til aukinna umsvifa á húsnæðismarkaði. Vaxtamunur bankans var 2,4 prósent. Hreinar vaxtatekjur voru 34 milljarðar króna og hækkuðu um tvö prósent milli ára. Þóknanatekjur hækkuðu hins vegar um 22,1 prósent og voru samtals 12,9 milljarðar króna.
Á grundvelli þessarar afkomu var ákveðið að greiða hluthöfum sínum 11,9 milljarða króna í arð. Þar af fóru 65 prósent til stærsta einstaka eigandans, íslenska ríkisins, eða rúmlega 7,7 milljarðar króna. Þeir sem eiga 35 prósent hlut í bankanum fengu svo samanlagt tæpa 4,2 milljarða króna í arðgreiðslu. Auk þess stefnir stjórn bankans að því að greiða út 40 milljarða króna í umfram eigið fé á næstu 12-24 mánuðum. Sú vegferð hófst með því að aðalfundur bankans samþykkti að hefja endurkaup á bréfum fyrir 15 milljarða króna á næstu mánuðum.
Almenningur á móti sölu
Skoðanakannanir hafa ítrekað sýnt að ekki sé meirihlutavilji hjá almenningi fyrir því að selja eignarhluti ríkisins í bönkum. Í hvítbók um fjármálakerfið sem birt var í lok árs 2018 var ein helsta niðurstaðan að traust þyrfti til svo fjármálakerfið myndi virka sem skyldi. Í könnun sem gerð var við gerð Hvítbókarinnar kom fram að 61,2 prósent landsmanna væri jákvæður gagnvart því að íslenska ríkið sé eigandi viðskiptabanka. Einungis 13,5 prósent þeirra voru neikvæðir gagnvart því og 25,2 prósent höfðu ekki sérstaka skoðun á því.
Í könnun sem Gallup gerði snemma á síðasta ári fyrir ASÍ kom fram að kjósendur eins flokks, Sjálfstæðisflokks, væru fylgjandi sölu Íslandsbanka. Kjósendur allra annarra flokka voru að meirihluta á móti henni. Um 56 prósent landsmanna voru á móti henni og 23 prósent þeirra fylgjandi.
Í könnun sem Gallup gerði um traust til helstu stofnana samfélagsins og birt var í byrjun mánaðar kom fram að bankakerfið nýtur næst minnst trausts af þeim sem spurt var um, en 23 prósent landsmanna sögðust bera traust til þess. Traustið dróst saman milli ára.
