Engin eining um kosningar í haust

Margir þingmenn Framsóknarflokksins hefðu viljað og vilja enn að kosið verði á næsta ári. Nokkrir þingmenn Sjálfstæðisflokksins telja það hafa verið óþarft að flýta kosningum.

Sigurður Ingi og Bjarni Benediktsson sögðu strax að kjörtímabilið yrði stytt um eitt þing. Þeir eru enn á því.
Sigurður Ingi og Bjarni Benediktsson sögðu strax að kjörtímabilið yrði stytt um eitt þing. Þeir eru enn á því.
Auglýsing

Mjög skiptar skoð­anir eru meðal stjórn­ar­þing­manna um það hvort rétt hafi verið að boða til kosn­inga í haust. Eftir að Sig­mundur Davíð Gunn­laugs­son, for­maður Fram­sókn­ar­flokks­ins, lýsti efa­semdum sínum um kosn­ingar í haust hafa nokkrir fylgt í kjöl­farið á opin­berum vett­vangi. Kjarn­inn hafði sam­band við þing­menn Fram­sókn­ar­flokks og Sjálf­stæð­is­flokks um mál­ið. Flestir fram­sókn­ar­menn sem náð­ist í voru þeirrar skoð­unar að ekki hefði þurft að flýta kosn­ing­um. Sú ákvörðun hafi bara verið tekin til að róa ástandið í sam­fé­lag­inu á örlaga­ríkum tím­um. „Sterk löngun fram­sókn­ar­manna er að ljúka verk­inu sem sett var upp sem 4ja ára plan,“ segir Sig­rún Magn­ús­dóttir umhverf­is­ráð­herra til dæm­is. 

Byrj­aði með Ásmundi 

Það hefur verið ljóst frá því skömmu eftir að rík­is­stjórn­ar­sam­starfið var end­ur­nýjað í apríl að ekki eru allir í stjórn­ar­lið­inu ánægðir með þær mála­lyktir að boða til kosn­inga í haust. Ásmundur Einar Daða­son, þing­flokks­for­maður Fram­sókn­ar­flokks­ins, byrj­aði þessa umræðu fyrir nokkrum vik­um. Ásmundur Einar hóf strax í apríl að tala um að verið væri að „skoða mögu­leik­ann“ á því að kjósa í haust. Svo sagði hann að það liggi í raun ekk­ert á að kjósa, og að kosn­ingar eigi ekki að fara fram fyrr en mik­il­vægum verk­efnum sé lok­ið. Til­gang­ur­inn var mögu­lega sá að kanna við­brögðin við því að hætta við að halda kosn­ing­arnar í haust. 

Bæði Sig­urður Ingi Jóhanns­son for­sæt­is­ráð­herra og Bjarni Bene­dikts­son fjár­mála­ráð­herra sögðu hins vegar strax í kjöl­farið að ekki stæði til að breyta þeim áætl­unum að kjósa í haust. Það voru jú líka þeir tveir sem kynntu þá fyr­ir­ætl­un, þegar þeir greindu frá áfram­hald­andi stjórn­ar­sam­starfi flokk­anna í byrjun apr­íl. 

Auglýsing

„Við ætlum að stíga við­bót­ar­skref til að mæta kröfum um að virkja lýð­ræðið í land­inu til þess að koma til móts við þá stöðu sem hefur myndast, og hyggj­umst stefna að því að halda kosn­ingar í haust, stytta kjör­tíma­bilið um eitt lög­gjaf­ar­þing. Nákvæm dag­setn­ing á kosn­ing­unum mun ráð­ast á fram­vindu þing­mála,“ sagði Bjarni Bene­dikts­son þá. Þegar Sig­urður Ingi var spurður að því hvort ein­ing hafi verið um ákvarð­an­irnar sem teknar voru sagði hann „al­gjör­lega.“ Það virð­ist hins vegar ljóst að svo var ekki og svo er ekki. Þetta á ekki síst við í hans flokki. 

„Sterk löng­un“ að klára fjögur ár 

Sigrún segir að loforð um kosningar hafi verið gefið til að róa ákveðið andrúmsloft. Sig­mundur Davíð tók svo við kefl­inu af Ásmundi Ein­ari þegar hann steig aftur í sviðs­ljósið eftir sjö vikna frí um síð­ustu helgi. Hann tal­aði um að menn hefðu haft „ein­hverjar hug­mynd­ir“ um kosn­ingar í haust. „Það er rétt að þeir [Sig­urður Ingi og Bjarni] sögðu að þeir væru reiðu­búnir til að ræða það að kosn­ingar færu fram snemma og nefndu haustið í því sam­hengi. En þeir voru mjög skýrir með það að þetta yrði ef, og ein­ungis ef, að öll mál næðu að klár­ast.“ 

Fleiri tóku í sama streng og gera það í svörum við fyr­ir­spurn Kjarn­ans. Þó má ljóst vera af orðum Bjarna Bene­dikts­son­ar, sem vitnað er til hér að ofan, að því var alltaf lofað frá byrjun að það yrðu kosn­ingar í haust og kjör­tíma­bilið stytt um eitt lög­gjaf­ar­þing. Margir fyr­ir­var­anna sem settir hafa verið komu eftir á. 

Gunnar Bragi Sveins­son, sjáv­ar­út­vegs- og land­bún­að­ar­ráð­herra, sagði nán­ast um leið og Sig­mundur Dav­íð, bara í við­tali á öðrum fjöl­miðli, Hring­braut, að hann hafi alltaf verið og sé enn mót­fall­inn því að kjósa fyrr.

Sig­rún Magn­ús­dóttir umhverf­is­ráð­herra segir það vera sterka löngun hjá fram­sókn­ar­mönnum „að ljúka verk­inu sem sett var upp sem 4ja ára plan.“ Hún segir að það hafi verið á örlaga­ríkum þremur dög­um, þegar mikið gekk á, sem sagt hafi verið að kosið verði í haust ef tak­ist að koma for­gangs­málum rík­is­stjórn­ar­innar í höfn. Þetta hafi verið sagt til að róa ákveðið and­rúms­loft. 

Hún segir að öll hennar vinna í ráðu­neyt­inu miði engu að síður við kosn­ingar í haust, en henni þyki sárs­auka­fullt að geta ekki fylgt úr hlaði verk­efnum eins og Ramma­á­ætl­un. 

Lýð­ræð­is­legra að kjósa á næsta ári

„Per­sónu­lega finnst mér ekki tíma­bært að ákveða kjör­dag,“ segir Elsa Lára Arn­ar­dótt­ir. Hún segir að horfa þurfi til þeirra verk­efna sem rík­is­stjórnin var kosin til að vinna að, eins og hús­næð­is­mál, verð­trygg­ing­ar­mál og end­ur­bætur á almanna­trygg­ing­ar­kerf­inu og fæð­ing­ar­or­lofi. „Þetta eru þau brýnu verk­efni sem horfa þarf til og klára. Þegar þeim er lokið er tíma­bært að ganga til kosn­inga. Hvort sem það er í haust eða síð­ar.“

 Silja Dögg Gunn­ars­dóttir segir að hún hefði kosið að lof­orð um kosn­ingar í haust hefði ekki verið gefið á sínum tíma. Ástæð­an: „ár­angur rík­is­stjórn­ar­innar er fram­úr­skar­andi góður og ég hefði viljað sjá þessa rík­is­stjórn klára fjög­urra ára kjör­tíma­bil.“ 

Willum Þór Þórs­son segir að búið sé að bregð­ast mynd­ar­lega við upp­lýs­inga­leka Panama­skjal­anna, með starfs­hópi og skýrslu. „Þessi rík­is­stjórn hefur mynd­ar­legan meiri­hluta, rétt­kjör­inn, og er með fjöl­mörg mik­il­væg mál í far­vatn­inu. Tím­inn til þess að klára mik­il­væg mál er mjög knappur með til­liti til kosn­inga í haust.“ 

„Mér finnst það lýð­ræð­is­legra og eðli­legra að þessi meiri­hluti fái að klára þau verk­efni sem og þann tíma sem hann var kos­inn til,“ segir Har­aldur Ein­ars­son. Hins vegar sé búið að gefa vænt­ingar um kosn­ingar í haust. „Það var gert á örlaga­tímum og á miklu hrað­i,“ segir hann, en vegna vænt­ing­anna muni hann styðja kosn­ingar í haust. 

„Ég tel að rétt­ast væri að kjósa vorið 2017 eins og ráð var fyrir gert við síð­ustu kosn­ing­ar,“ segir Líneik Anna Sæv­ars­dótt­ir. Hún virði hins vegar það sam­komu­lag að ganga til kosn­inga í haust ef vel gangi að klára mál. 

Sjálf­stæð­is­menn vilja standa við lof­orð en fannst sumum óþarfi að gefa það

„Það hefur ekk­ert breyst varð­andi það sem við for­sæt­is­ráð­herra höfum áður sagt að stefnt er að kosn­ingum í haust,“ sagði Bjarni Bene­dikts­son í byrjun vik­unn­ar, spurður um málið á Alþing­i. „Ég tek hins vegar fram að ég skil vel að skiptar skoð­anir séu um þessi efni. Við sáum það líka á könn­unum sem gerðar voru á sínum tíma meðal lands­manna. Það voru skiptar skoð­anir í þjóð­fé­lag­inu hvort kjósa ætti núna í vor eða í haust eða síð­ar, þannig að það kemur út af fyrir sig ekki á óvart. En við lögðum af stað í þessu end­ur­nýj­aða stjórn­ar­sam­starfi með þá hugs­un. Það hefur ekki verið rætt okkar í milli og stendur ekki til að gera breyt­ingar á því.“ 

Ragn­heiður Rík­harðs­dótt­ir, þing­flokks­for­maður Sjálf­stæð­is­flokks­ins, vill líka standa við það að kosið verði í haust, og Har­aldur Bene­dikts­son sömu­leið­is. Jón Gunn­ars­son seg­ist ein­fald­lega styðja nið­ur­stöðu for­ystu­manna rík­is­stjórn­ar­inn­ar. 

,Ég er fylgj­andi því að ganga til kosn­inga í haust.  Ég tel að mínum flokki verði vel tekið í þeim kosn­ing­um,“ segir Elín Hirst um mál­ið. Vil­hjálmur Árna­son segir að að sjálf­sögðu eigi að kjósa í haust, enda hafi þing­störf gengið vel und­an­far­ið. „Rétt­kjörin stjórn­völd eiga að sitja út sitt kjör­tíma­bil en mið­að við þær aðstæður sem voru uppi tel ég að for­ustu­menn ­stjórn­ar­flokk­anna hafi tekið hár­rétta ákvörðun með því að ­boða til kosn­inga í haust og við þá ákvörðun á að standa.“ 

Brynjar Níels­son taldi á sínum tíma að það væri ekki nauð­syn­legt að flýta kosn­ing­um. Það hafi þó verið nið­ur­staðan og hann eigi ekki von á öðru en að við það verði stað­ið. Sig­ríður And­er­sen segir að það verði að vera mjög sér­stakar ástæður til að rjúfa þing áður en umboð þeirra sam­kvæmt stjórn­ar­skránni renni út. „Það er umhugs­un­ar­efni hvort að slíkar aðstæður hafi verið fyrir hendi þegar hug­mynd um kosn­ingar í haust var fyrst nefnd.“ 

Ásmundur Frið­riks­son seg­ist hafa viljað klára sína vakt til fjög­urra ára og að það hafi verið ástæðu­laust að boða til þing­kosn­inga í haust. 

Skiptir Kjarninn þig máli?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Við erum til staðar fyrir lesendur og fjöllum um það sem skiptir máli.

Ef Kjarninn skiptir þig máli þá máttu endilega vera með okkur í liði.

Já takk, ég vil styrkja Kjarnann!
Ingunn Reynisdóttir
Í þágu hestsins
Kjarninn 22. janúar 2022
Þorkell Helgason
Aukið vægi útstrikana í komandi sveitarstjórnarkosningum
Kjarninn 22. janúar 2022
Ráðherrar þeirrar ríkisstjórnarinnar sem sat að völdum þegar eftirlaunalögin voru samþykkt.
Tíu hlutir sem hægt væri að gera fyrir kostnað vegna eftirlauna ráðherra og þingmanna
257 fyrrverandi þingmenn og 46 fyrrverandi ráðherrar fá eftirlaun á grundvelli umdeildra eftirlaunalaga sem voru í gildi á árunum 2003 til 2009. Alls kostaði þetta 876 milljónir króna í fyrra. Hér eru tíu hlutir sem hægt væri að gera fyrir það fé á ári.
Kjarninn 22. janúar 2022
Jepplingur á ferð í Laugarnesi í Reykjavík. Bílar af þessari stærðargráðu og stærri hafa orðið æ algengari á götunum undanfarin ár.
Bílarnir á götunum þyngjast og þyngjast
Nýskráðir fólksbílar á Íslandi árið 2021 voru að meðaltali um 50 prósentum þyngri en bílarnir voru árið 1990. Þetta er alþjóðleg þróun – sem sumir segja að sé helst leidd af bílaframleiðendum sem vilja selja almenningi stærri og dýrari bíla ár frá ári.
Kjarninn 22. janúar 2022
Nokkrir valkostanna sem eru til skoðunar gera ráð fyrir jarðgöngum í gegnum Reynisfjall og að vegurinn liggi meðfram Víkurfjöru.
Sér ekki hvað nýr valkostur um Mýrdal á að leysa
Oddviti Mýrdalshrepps telur að nýjum valkosti Vegagerðarinnar við færslu hringvegarins í Mýrdal myndi fylgja umtalsvert meira jarðrask en láglendisvegi og jarðgöngum.
Kjarninn 22. janúar 2022
Tæknivarpið
Tæknivarpið
Tæknivarpið – Microsoft kaupir Blizzard og frábær CES
Kjarninn 22. janúar 2022
Katrín Jakobsdóttir forsætisráðherra.
Stefnt að því að koma Íslandi í efstu sætin á Regnbogakortinu
Forsætisráðherra hefur lagt fram framkvæmdaáætlun í málefnum hinsegin fólks í 17 liðum fram í samráðsgátt stjórnvalda. Á meðal aðgerða er að stjórnendur hjá ríkinu og lögreglumenn fái fræðslu um málefni hinsegin fólks.
Kjarninn 21. janúar 2022
N1 Rafmagn er dótturfélag N1, sem er eitt dótturfélaga Festi hf., sem er að uppistöðu í eigu íslenskra lífeyrissjóða.
N1 reiknar með því að útskýra rafmagnsendurgreiðslur betur eftir helgi
N1 Rafmagn, sem áður hét Íslensk orkumiðlun, hefur verið orkusali til þrautavara frá 1. júní 2020. Fyrirtækið hefur ekki útskýrt hvers vegna það hyggst einungis endurgreiða neytendum mismun tveggja taxta frá 1. nóvember 2021.
Kjarninn 21. janúar 2022
Meira eftir höfundinnÞórunn Elísabet Bogadóttir
Meira úr sama flokkiFréttaskýringar
None