1. Hildur Þórðardóttir er fædd árið 1967 og er 48 ára gömul. Hún á tvo syni.
2. Hún er rithöfundur og hefur gefið út fjórar sjálfshjálparbækur undanfarin ár og eina hljóðbók. Hún er menntaður tískumarkaðsfræðingur og þjóðfræðingur.
3. Hildur segist aldrei hafa verið tengd stjórnmálaflokki eða verið í pólitík. Hún er í þjóðkirkjunni.
4. Hún segist standa fyrir friði í samfélaginu og vill brúa bilið á milli þings og þjóðar. Hún vill taka allt það besta úr öllum stefnum svo öllum líði vel. Hildur vill að vestræn heilbrigðisvísindi notist meira við austrænar lækningar, eins og heilun eða orkulækningar meðfram alls konar öðrum lækningum, eins og fram kom í NOVA spjallinu við hana um daginn.
5. Hildur hélt úti bloggi um tíma, áður en hún fór í forsetaframboð, þar sem hún skrifaði meðal annars að orsakir krabbameins ætti rætur að rekja til orkustöðvarinnar og meint brjóstakrabbamein muni bara finna sér annan farveg ef ekkert verði að gert. Konur fái þá bara lungnakrabbamein í staðinn fyrir hjartaáfall ef ekkert verði að gert. „Genarannsóknir eru á villigötum því það eru engin gen sem valda sjúkdómum,“ skrifaði Hildur. Á sömu síðu lýsti hún þegar hún upplifði 200 ára gamla ástarsorg vegna makamissis úr fyrra lífi í Englandi. Hún hefur nýlega sagt að áhugi hennar á fyrri lífum sé einungis áhugamál.
6. Hildur á fjölbreyttan starfsferil að baki og hefur unnið sem skrifstofustjóri á lögmannsstofu, skrifað leikrit, unnið hjá Listasafni Reykjavíkur og verið sjálfboðaliði hjá Rauða krossinum, á kaffistofu Samhjálpar og Hugarafli.
7. Hún vill setja siðareglur fyrir forsetaembættið og verði hún forseti ætlar hún að gera það eitt af sínum fyrstu verkum, nái hún kjöri. Hún vill koma auðlindum í þjóðareign.
8. Í Forsetagrillinu hjá NOVA kom einnig fram að Hildur er mikill dýravinur og elskar sérstaklega hunda. Hún má þó ekki hafa hundinn sinn, Pílu, hjá sér þar sem hún býr í blokk þar sem má ekki hafa hunda.
9. Undanfarna mánuði hefur Hildur verið með í kring um 200 þúsund krónur á mánuði í laun.
10. Hún talar mörg tungumál; íslensku, ensku, þýsku og dönsku og getur bjargað sér á spænsku og ítölsku.
