Hagvöxtur í Bandaríkjunum, stærsta þjóðarhagkerfi heimsins, var 2,9 prósent á þriðja ársfjórðungi þessa árs, og töluvert fyrir ofan flestar spár, sem höfðu gert ráð fyrir 2 til 2,5 prósent hagvexti. Þetta er mesti hagvöxtur sem mælst hefur í Bandaríkjunum í tvö ár.
Beðið var eftir þessum tölum með nokkurri eftirvæntingu enda er þetta síðasta uppfærða mælingin á hagvexti sem birtist fyrir forsetakosningarnar 8. nóvember. Búist er við því að Demókratar muni nýta sér þessar tölur til að koma þeim upplýsingum á framfæri við kjósendur, að Demókrötum sé best treystandi fyrir stjórnun efnahagsmála, og þar með eigi að kjósa Hillary Clinton sem næsta forseta.
![](https://pbs.twimg.com/media/Cv5IOLMWgAA7Ua8.jpg:large)
Eins og mál standa nú, þegar 10 dagar eru til kosninga, þá hefur Hillary forystuna í flestum könnunum. Vefurinn FiveThirtyEight telur 81,6 prósent líkur á að Hillary vinni, en 18,4 prósent að Trump hafi sigur. Líkurnar voru meira Hillary í hag, fyrir nokkrum vikum, en ennþá eru þær þó afgerandi Hillary í hag.
Á öðrum ársfjórðungi var hagvöxturinn töluvert minni, eða 1,4 prósent. Um þessar mundir mælist atvinnuleysi í Bandaríkjunum rúmlega 5 prósent.