Starfsfólk framboðs Donalds J. Trump, Bandaríkjaforseta, var í sambandi við rússneska leyniþjónustumenn endurtekið á undanförnu ári í aðdraganda forsetakosninganna í Bandaríkjunum, 8. nóvember í fyrra. Þetta kemur fram í New York Times og er vitnað til fjögurra núverandi og fyrrverandi embættismanna í Bandaríkjunum en fyrir liggja gögn um símtölin, tímasetningu þeirra og úr hvaða tækjum var hringt.
Ekki liggja hins vegar fyrir upplýsingar um hvert efni símtalanna var og þá hefur Hvíta húsið ekki staðfest fréttirnar, en þeim hefur heldur ekki verið hafnað. Trump heldur hins vegar áfram að gagnrýna leka frá stjórnkerfi landsins í Washington DC og nota Twitter til þess.
Michael Flynn sagði í gær af sér sem þjóðaröryggisráðgjafi eftir að hann viðurkenndi að hafa greint varaforseta Bandaríkjanna, Mike Pence, ranglega frá efni samtala sem hann átti við sendiherra Rússlands í Bandaríkjunum, Sergei Kislyak. Hann ræddi meðal annars við hann viðskiptaþvinganir gagnvart Rússum, en því hafði hann áður neitað.
Bandaríska alríkislögreglan FBI hefur Flynn nú til rannsóknar vegna tengsla hans við Rússa og þeirra samskipta sem hann átti við Rússa.
Samkvæmt New York Times og Washington Post skoða bandarískar leyniþjónustur nú hvort framboð Trumps hafi unnið með Rússum að tölvuárásum á Demókrataflokkinn, þar á meðal tölvupósta Hillary Clinton og kosningastjóra hennar, með það fyrir augum að ýta undir líkur á því að Trump ynni í kosningunum.
