Tyrk­land fang­elsar fleiri blaða­menn en nokkur önnur þjóð í heimi, en landið hefur að geyma um þriðj­ung allra blaða­manna heims sem eru á bak við lás og slá. Þetta kemur fram í nýrri her­ferð Amnesty International fyrir frjálsri fjöl­miðlun í Tyrk­land­i. 

Sam­kvæmt Amnesty er tján­ing­ar­frelsi í Tyrk­landi í stöðugri og vax­andi hættu, en allt frá valda­ránstil­raun tyrk­neska hers­ins í júlí 2016 eiga fræði­menn, blaða­menn og rit­höf­undar sem eru gagn­rýnir á stjórn­völd þar í landi hættu á lög­sókn, hót­un­um, áreiti og rit­skoð­un. 

Í kjöl­far valda­ránstil­raun­ar­innar setti rík­is­stjórnin á neyð­ar­lög í land­inu sem leiddi meðal ann­ars til lok­unar á 180 fjöl­miðl­um. Í her­ferð Amnesty er aðgerðum tyrk­neskra stjórn­valda lýst sem „dauða blaða­mennsku.“Þar er einnig kraf­ist enda­loka neyð­ar­stjórn­ar­innar í Tyrk­landi auk lausnar fang­els­aðra blaða­manna og þeirra sem sitja í varð­haldi fram að rétt­ar­höld­um. 

Krist­inn Hrafns­son blaða­maður bendir á ákallið í stöðu­upp­færslu á Face­book og segir árangur rit­skoð­un­ar­stefnu tyrk­nesku rík­is­stjórn­ar­innar mega sjá í úrslitum kosn­inga helg­ar­inn­ar. Kjarn­inn fjall­aði um þau úrslit fyrr í dag, en þar fékk flokkur Recep Tayyip Erdogan, for­seta Tyrk­lands, 52,5 pró­sent atkvæða og var hann því end­ur­kjör­inn. 

Tyrk­land og EFTA-­ríkin und­ir­rit­uðu upp­færðan frí­versl­un­ar­samn­ing á milli sín í Skaga­firði í morgun, en þar héldu Guð­laugur Þór Þórð­ar­son utan­rík­is­ráð­herra og Nihat Zey­bekci, efna­hags­mála­ráð­herra Tyrk­lands, tví­hliða fund. Á fund­inum var meðal ann­ars rætt um mann­rétt­indi og mál Hauks Hilm­ars­sonar sem tal­inn er hafa fallið í hern­aði Tyrkja í Afr­in-hér­aði fyrr á þessu ári.