Starf forstjóra Barnaverndarstofu hefur verið auglýst laust til umsóknar á vef félagsmálaráðuneytisins. Forstjóri Barnaverndarstofu stýrir starfi stofnunarinnar og heyrir undir félags- og barnamálaráðherra. Bragi Guðbrandsson lét af starfi forstjóra í febrúar í fyrra eftir að hafa tekið sæti í Barnaréttarnefnd Sameinuðu þjóðanna fyrir Íslands hönd og tekið að sér sérverkefni á vegum velferðarráðuneytisins.
Forstjóri skipaður til fimm ára í senn
Heiða Björg Pálmadóttir, hefur gegnt starfi forstjóra Barnaverndarstofu tímabundið eftir að Bragi fór í leyfi. Félags- og barnamálaráðherra skipar forstjóra Barnaverndarstofu til fimm ára í senn en umsóknarfrestur er til 28. janúar 2018.
Í tilkynningu frá Félagsmálaráðuneytinu segir að ráðuneytið vinni nú að heildarendurskoðun á barnaverndarlöggjöf og framkvæmd þjónustunnar við börn og samkvæmt tilkynningunni geta breytingar orðið í kjölfarið sem hafa áhrif á starfsemi Barnaverndarstofu.
Í lok febrúar á síðasta ári tilkynnti ráðuneytið að eftirlit með öllu barnaverndarstarfi í landinu yrði endurskoðað og ráðist yrði í heildarendurskoðun barnaverndarlaga. Þá verði settar skýrar formkröfur um samskiptahætti stjórnvalda sem gegna hlutverki á sviði barnaverndar. Í tilkynningunni um frumvarpið kom fram að fyrirhugaðar breytingar á sviði barnaverndar séu að hluta til liður í viðbrögðum ráðuneytisins til að endurheimta traust í kjölfar kvartana frá formenn barnaverndarnefndanna vegna samskipta við Barnaverndarstofu og forstjóra hennar en þeim sé einnig ætlað að bæta stjórnsýslu málaflokksins og stuðla að þróun nýrra úrræða í barnavernd.
Barnaverndarstofa vinnur að samhæfingu barnaverndarstarfs í landinu
Hlutverk Barnaverndarstofu er að vinna að samhæfingu og eflingu barnaverndarstarfs í landinu og er félagsmálaráðherra til ráðgjafar um stefnumótun í málaflokknum, samkvæmt vef félagsmálaráðuneytisins. Jafnframt fer Barnaverndarstofa með leiðbeiningar um túlkun og framkvæmd barnaverndarlaga og fræðslu og ráðgjöf fyrir barnaverndarnefndir í landinu. Enn fremur hefur Barnaverndarstofa eftirlit með störfum barnaverndarnefnda.
Barnaverndarstofa annast meðal annars leyfisveitingar til fósturforeldra, tekur ákvarðanir og veitir barnaverndarnefndum liðsinni í fósturmálum, fer með yfirstjórn heimila og stofnana sem ríkinu ber að sjá til að séu tiltæk og hlutast til um að slík heimili og stofnanir verði sett á fót. Stofan hefur yfirumsjón með vistun barna á þessum heimilum og stofnunum.
