Valitor Hold­ing, dótt­ur­fé­lag Arion banka sem á greiðslu­miðl­un­ar­fyr­ir­tækið Valitor, tap­aði 2,8 millj­örðum króna á fyrstu sex mán­uðum árs­ins. Bók­fært virði félags­ins, sem er til sölu, er nú 13,2 millj­arðar króna en var 15,8 millj­arðar króna um síð­ustu ára­mót. Það hefur því lækkað um 2,6 millj­arða króna á síð­ustu sex mán­uð­um. Þetta kemur fram í árs­hluta­reikn­ingi Arion banka sem birtur var í gær­kvöld­i. 

Va­litor Hold­ing tap­aði 1,9 millj­­arði króna í fyrra. Félagið hafði skilað um 940 milljón króna hagn­aði ári áður. 

Einn stærsti við­­skipta­vinur Valitor, Stripe, hætti færslu­hirð­ing­­ar­við­­skiptum sínum við Valitor um mitt ár 2018, líkt og Kjarn­inn greindi frá í mars í fyrra að stæði til. Þessi ákvörðun Stripe leiddi til þess, sam­­kvæmt afkomutil­kynn­ingu frá Valitor sem send var út fyrr á þessu ári, að velta fyr­ir­tæk­is­ins flutt­ist frá Valitor sem „hafði tals­verð áhrif á vöxt tekna og við­­skipta Valitor á árin­u.“

Arion banki ætlar sér að selja Valitor á næstu tólf mán­uðum og hefur ráðið alþjóð­­lega bank­ann Citi til að veita sölu­ráð­­gjöf. 

Lands­bank­inn borg­aði 426 millj­ónir af skaða­bótum Valitor

Valitor samdi fyrr á þessu ári um að greiða Datacell og Suns­hine Press Prod­uct­ions, félagi tengt Wiki­leaks, 1,2 millj­arða króna fyrr á þessu ári í skaða­bæt­ur. Sú greiðsla beit fast í rekstur félags­ins. 

Landsbankinn, sem er í eigu íslenska rík­is­ins, greiddi alls 426 millj­ónir króna af af þeim bót­um. Ástæða þess að Lands­bank­inn greiddi hluta skaða­bót­anna er sú að bank­inn átti 38,62 pró­sent í Valitor þegar broti var gegn ofan­greindum félög­um. Þegar Lands­bank­inn seldi Arion banka hlut sinn í Valitor í des­em­ber 2014 var kveðið á um það í kaup­samn­ingi að hann myndi halda Arion banka skað­lausum í mál­inu í hlut­falli við seldan eign­ar­hlut. Því greiddi Lands­bank­inn Arion banka 426 millj­ónir króna þegar sátt lá fyrir í mál­inu, í sam­ræmi við það sam­komu­lag. Valitor, dótt­ur­fé­lag Arion banka, greiddi svo bæt­urn­ar. Nei­kvæð áhrif þess á efna­hags­reikn­ing Arion banka voru um 600 millj­ónir króna á fyrri hluta árs að teknu til­liti til skatta.

Fjallað er um sam­komu­lagið í árs­hluta­reikn­ingum bæði Lands­bank­ans og Arion banka. Í reikn­ingi Arion banka segir að Suns­hnie Press Prod­uct­ion hafi fengið greitt 1.140 millj­ónir króna í bætur en Datacell 60 millj­ónir króna. Nú standa yfir deilur á milli þeirra félaga um hlut­deild Datacell, sem vill hærri hluta heild­ar­upp­hæð­ar­inn­ar. 

Lok­uðu greiðslu­gátt

Málið á rætur sínar í að Wiki­leaks tók við styrkjum fyrir starf­­­semi sína í gegnum greiðslu­­­gátt sem Datacell og Suns­hine ­Press Prod­uct­ion ráku. Greiðslu­­­gáttin var opnuð 7. júlí 2011 en degi síðar sleit Valitor ­samn­ingnum fyr­ir­vara­­­laust. Með dómi árið 2013 komst Hæst­i­­­réttur að því að rift­unin hafi veri ólög­­­mæt, og hefur síðan verið deilt um skað­ann og skaða­bætur vegna fyrr­­­nefndrar aðgerð­­­ar. 

Gátt­in var alls lokuð í 617 daga og dóm­kvaddir mats­­menn mátu tjónið á 3,2 millj­­arða króna en dóm­­­ar­ar í mál­inu töldu að veik­­­leik­ar væru á þeim for­­­send­um sem ­töl­fræð­i­­leg­ir út­­­reikn­ing­ar mats­­­manna byggð­ust á og því væri ekki unnt að leggja nið­­ur­­­­stöðu mats­­­gerð­­ar­­inn­ar til grund­vall­ar sem sönn­un­­­ar­­­gagn um um­­­fang tjóns­ins. Krafa um vexti og drátt­­­ar­vexti aft­ur í tím­ann kom ekki til álita en krafa Datacell og ­Suns­hine ­Press Prod­uct­ion í mál­inu hljóð­aði upp á 8,1 millj­­arð króna.

Valitor sendi frá sér til­­kynn­ingu í kjöl­far dóms­ins í apríl og sagði félagið að nið­­ur­­staða Hér­­aðs­­dóms kæmi mjög á óvart og að fyr­ir­tækið myndi fara yfir dóms­n­ið­­ur­­stöð­una og vænt­an­­lega áfrýja mál­inu til Lands­rétt­­ar. Í kjöl­farið náð­ist sátt milli deilu­að­ila um greiðslu á 1,2 millj­arði króna í skaða­bæt­ur.