Samherji vinnur nú að því að gera Heinaste út í Namibíu og er unnið að því að finna viðeigandi lausnir í samráði við namibísk stjórnvöld. Að minnsta kosti tímabundið verður þetta fólgið í leigu á Heinaste til namibískra aðila sem stunda útgerð í landinu. Þetta kemur fram í tilkynningu frá Samherja sem birtist í dag.
Þá segist fyrirtækið leggja ríka áherslu á að finna lausnir sem henta namibískum áhafnarmeðlimum skipsins, namibísku samfélagi og minnihlutaeigendum eignarhaldsfélags Heinaste.
Arngrímur Brynjólfsson skipstjóri á skipinu Heinaste, sem Samherji gerði út við strendur Namibíu, var dæmdur í gær til að greiða 7,9 milljónir króna í sekt eða sæta tólf ára fangelsisvist vegna ólöglegra veiða, að því er fram kom í frétt The Namibian Sun. Kröfu ákæruvaldsins um að fá að leggja hald á fiskiskipið Heinaste sem hann stýrði var vísað frá dómi. Samkvæmt heimildum Kjarnans hefur kyrrsetningu skipsins verið aflétt.
Samstæðan hefur óverulegra hagsmuna að gæta í landinu
Í tilkynningu Samherja kemur fram að fyrirtækið hafi um nokkra hríð unnið að því að draga úr starfsemi sinni í Namibíu með það fyrir augum að hætta rekstri í landinu en frá því hefur áður verið greint í fjölmiðlum.
„Nú er svo komið að samstæðan hefur óverulegra hagsmuna að gæta í landinu miðað við umfang starfseminnar áður. Af þeim þremur skipum sem hafa stundar veiðar í namibískri lögsögu undanfarið ár, Geysir, Heinaste og Saga, er aðeins eitt eftir í Namibíu og er þar um að ræða verksmiðjutogarann Heinaste,“ segir í yfirlýsingunni.
Björgólfur Jóhannsson, starfandi forstjóri Samherja, segir við tilefnið það vera mjög ánægjulegt að mál vegna skipsins Heinaste og skipstjóra þess hafi verið leitt til lykta fyrir dómi í Namibíu á miðvikudag. Þetta skapi ný tækifæri í rekstri skipsins og vilji fyrirtækið að þau verði nýtt í Namibíu.
Fréttir af sjómönnum í óvissu
Fram kom í fjölmiðlum þann 3. febrúar að Geysir, skip í eigu Samherja sem verið hefur verið veiðar í Namibíu, hefði verið siglt frá Namibíu. The Namibian Sun greindi frá því í Twitter-færslu að skipið hefði yfirgefið landið og skilið yfir 100 sjómenn eftir í óvissu. Miðillinn hélt því fram að sjómennirnir hefðu ekki fengið að vita neitt í aðdraganda þess að skipið sigldi á brott utan þess að þær upplýsingar fengjust að það myndi snúa til baka þegar það fengi úthlutað nýjum fiskveiðikvóta.
Á föstudaginn í síðustu viku var greint frá því í miðlinum New Era að skipið Saga, sem siglir undir merkjum dótturfélags Samherja á Kýpur og hefur um árabil veitt hrossamakríl í lögsögu Namibíu, hefði fyrirvaralaust siglt frá landinu. Þá fengu sjómennirnir á Sögu, sem eru um 120 talsins, sms-skilaboð um að þeir þyrfti að sækja eigur sínar um borð án tafar vegna þess að skipið væri á leið til Kanaríeyja í viðgerð.
Samkvæmt Samherja er skipið Saga sem stendur á leið í slipp vegna tímabærs viðhalds og lagfæringa sem hefðu staðið til lengi. Geysir er sem stendur við veiðar í Máritaníu þar sem ekkert af dótturfyrirtækjum Samherja fékk úthlutað kvóta fyrir skipið í Namibíu.
Segjast ætla að standa við skuldbindingar sínar
Í yfirlýsingunni kemur jafnframt fram að áður en Samherjasamstæðan muni alfarið hætta starfsemi í Namibíu muni dótturfyrirtæki samstæðunnar í landinu uppfylla allar skyldur gagnvart skipverjum sem hafa unnið fyrir þessi fyrirtæki. Fulltrúar Samherja hafi fundað með þeim sjómönnum sem eiga í hlut og fulltrúum stéttarfélaga þeirra. Samherji muni leitast við að veita eins mörgum þeirra áframhaldandi vinnu og mögulegt sé. Þá einkum þeim sem tengjast Heinaste.
„Eins og áður hefur komið fram munu fyrirtækin sem um ræðir standa við skuldbindingar sínar gagnvart öllum starfsmönnum í samræmi við gildandi lög og reglur,“ segir Björgólfur.
„Röngum upplýsingum verið dreift um eðli starfsemi Samherja í landinu“
Að lokum kemur fram hjá Samherja að undanfarið ár hafi fyrirtækið unnið fullnaðarsigur fyrir namibískum dómstólum í deilumálum gagnvart þarlendum samningsaðilum samstæðunnar.
„Undanfarna mánuði hafa sumir þessara aðila reynt að notfæra sér ásakanir á hendur Samherja í áróðursskyni til framdráttar sínum málstað. Í tengslum við slíka herferð hefur röngum upplýsingum verið dreift um eðli starfsemi Samherja í landinu. Samherjasamstæðan hyggst ekki leiða ágreining um slíkt til lykta á opinberum vettvangi og mun gæta hagsmuna sinna vegna samningsbundinna atriða eftir þar til bærum leiðum. Það er mat Samherja að samstæðan hafi staðið við, eða sé við það að standa við, allar skuldbindingar sínar í Namibíu.
Allar ákvarðanir, sem tengjast því að Samherji er að hætta rekstri í Namibíu, verða teknar í nánu samráði við þar til bær stjórnvöld. Greint verður opinberlega frá framvindu málsins jafnóðum,“ segir í yfirlýsingunni.
