Þegar kemur að mikilvægi góðs handþvottar á tímum kórónuveirunnar beita yfirvöld ýmsum ráðum til að koma skilaboðunum til sem flestra. Heilbrigðisyfirvöld í Víetnam ákváðu að fá vinsæla listamenn til að breiða út boðskapinn með kímni og hressleika að vopni.
Myndbandið sem listamennirnir vinsælu Min og Erik gerðu hefur hlotið lof og kallað fram bros á vörum margra. Í því er mikilvægri fræðslu um útbreiðslu veirunnar skæðu komið á framfæri í teiknimynd og grípandi lag félaganna leikið undir. Einnig er farið yfir mikilvægar forvarnaraðgerðir og þar er handþvottur efst á blaði.
Viðlagið hljómar nokkurn veginn svona á íslensku:
„Við skulum þvo okkur um hendurnar, nudda, nudda, nudda, nudda þeim saman / ekki snerta augu, nef og munn með höndunum / forðastu fjölmenni til að berjast gegn kórónuveirunni!“
Myndbandið hefur fengið mjög mikið áhorf á YouTube frá því að það var gefið út 23. febrúar.
En þar með er ekki öll sagan sögð.
Stuttu eftir að lagið var gefið út tók þekktur víetnamskur dansari, Quang Đăng, sig til og samdi dans við það. Hann birti svo myndband af dansinum á Instagram og viðbrögðin hafa ekki látið á sér standa.
Í dansinum eru tekin sex spor í takti við forvarnirnar sem yfirvöld hvetja fólk til að nýta til að verjast veirunni og aðstoða þannig við að hefta útbreiðslu hennar. Quang Đăng lætur ekki þar við sitja heldur hvetur til áskorunar undir myllumerkinu: #GhenCovyChallenge
Biður hann fólk að læra dansinn, taka upp myndband af sér að dansa og deila á samfélagsmiðlum. Þannig vonast hann til þess að hinar einföldu forvarnarráð komist til skila til sem flestra.
Víetnman virtist um tíma hafa náð góðum tíma á útbreiðslu veirunnar. Eftir að fyrstu tilfellin greindust, sem öll voru rakin til Kína, fannst ekkert nýtt tilfelli í þrjár vikur. Um helgina bættust þó fjögur við og eru þau talin tengjast ferðafólki frá Suður-Kóreu. Aðeins tuttutu tilfelli hafa þó greinst í Víetnam frá upphafi.
