Banda­ríska sjón­varps­kon­an, Ellen DeGener­es, hefur heldur betur vakið athygli vestan hafs fyrir brand­ara sem hún sagði í þætti sínum á dög­unum sem hún birtir frá heim­ili sínu. Hún er eins og fjöl­margir aðrir landar hennar í sótt­kví en kór­ónu­veiran hefur herjað af miklum krafti á Banda­ríkin und­an­farnar vik­ur. 

Ellen sagði að það að vera í sótt­kví væri eins og að vera í fang­elsi. „Það er aðal­lega vegna þess að ég hef verið í sömu föt­unum í tíu daga og allir hér inni eru sam­kyn­hneigð­ir,“ sagði hún en Ellen býr með eig­in­konu sinni, leikkon­unni Portiu de Rossi, í glæsi­villu í Kali­forn­íu. 

Mike Sington, einn stjórn­enda NBCUni­ver­sal, tísti um brand­ara Ellenar á Twitter og má með sanni segja að hann hafi fengið mis­jöfn við­brögð. Mynd­bandið hefur verið tekið af Youtu­be-­reikn­ingi Ellenar síðan gagn­rýnin komst í hámæli í gær. 

Gagn­rýnin gekk meðal ann­ars út á það að 27 millj­óna doll­ara villan sem hún býr í svip­aði nú ekki beint til fang­els­is. Umræðan á sam­fé­lags­miðlum beind­ist jafn­framt að þeim starfs­mönnum í Banda­ríkj­unum sem ekki hafa tæki­færi til að vera heima í sótt­kví á COVID-­tímum og þurfa að vinna – og setja sig þar af leið­andi í hætt­u. 

Ellen hefur á sam­fé­lags­miðlum reynt að vera jákvæð í far­aldr­inum en í færslu á Instagram fyrir um þremur vikum sagði hún að þeir tímar sem nú standa yfir væru krefj­andi en að mik­il­vægt væri að muna að allir væru í þessu sam­an. „Deilið ást, verið almenni­leg og haldið áfram að synda,“ skrif­aði hún. 

Fólkið á lægstu laun­unum í mestu hætt­unni

Starfs­menn í skyndi­bita­iðn­að­inum hafa verið sagðir ómissandi í far­aldr­inum í Banda­ríkj­un­um. Það hefur þó ekki linað áhyggjur þeirra og ótta um heils­una. Fram hefur komið í fréttum að starfs­menn skyndi­bita­keðj­anna McDon­ald's, Taco Bell og Jack in the Box hafa haft miklar áhyggjur af heilsu sinni vegna óvið­un­andi ráð­staf­ana varð­andi sótt­hreinsun og ann­að. 

„Ég nán­ast baða mig í spritt­i,“ sagði starfs­maður McDon­ald's í sam­tali við vef­miðil Business Insider í lok mars. „Ég ótt­ast að ég sé eins og her­maður í fremstu víg­línu, dæmd til að vera fyrst í röð­inni til að fara. Vegna osta­ham­borg­ara.“

Fram kemur í frétt Business Insider að skyndi­bita­keðjur vinni nú að því að bæta örygg­is­ráð­staf­anir en mörgum starfs­mönn­um þeirra líði þó þannig að þeir séu enn í hættu. Fæstir hafi efni á því að taka sér leyfi frá vinnu en þeir hafa ekki rétt á því nema að þeir finni fyrir ein­kennum kór­ónu­veirunn­ar. 

Enn fremur segj­ast starfs­menn­irnir þurfa að eiga við dóna­lega við­skipta­vini, öryggis­ótta og í erf­ið­leikum með að halda uppi fjar­lægð milli fólks. Mörgum líði þannig að þeir séu neyddir til að fórna eigin heilsu og heilsu fjöl­skyldu þeirra fyrir lág­marks­laun.