„Við erum í vanda,“ skrifar Guðni Th. Jóhann­es­son, for­seti Íslands, í færslu á Face­book í kvöld. For­set­inn hvetur lands­menn til að kynna sér allar upp­lýs­ingar um þær hertu sótt­varn­ar­að­gerðir sem hafa verið kynntar og hvetur til sam­stöðu þjóð­ar­inn­ar.  

„Við gerðum það í vor og getum það enn. Ein­hugur kemur okkur öllum til góða en lang­mest þeim sem á því þurfa helst að halda, fólk­inu sem er veikast fyrir og þeim sem sinna sjúk­um. Í strit­inu miðju stoðar lítt að velta vöngum yfir því hvað hefði kannski mátt gera öðru­vísi, ræðum það síð­ar,“ segir for­set­inn.

Hann hvetur alla til að fylgja til­mælum og leið­bein­ingum og „verða þannig að liði í þessu ágæta sam­fé­lagi okk­ar.“ 

„Sam­staða í þágu þjóð­ar, þraut­seigja í verki. Látum þetta sann­ast um okk­ur. Við erum öll almanna­varn­ir. Sýnum hvað í okkur býr,“ skrifar for­seti Íslands.

Ávarp­aði óþreyj­una í sam­fé­lag­inu í færslu í gær

For­set­inn skrif­aði einnig um veiruna á Face­book í gær, þar sem hann ávarp­aði þá óþreyju og jafn­vel gremju sem má merkja víða í sam­fé­lag­inu, nú þegar veiran hefur blossað upp að nýju af miklum krafti.

„Vissu­lega getur verið hægð­ar­leikur fyrir þá, sem ekki þurfa að axla ábyrgð á aðgerð­um, að benda á sitt­hvað í okkar sótt­vörnum sem mætti vera öðru­vísi, finna heim­ildir á net­inu um önnur við­brögð ann­ars staðar og þar fram eftir göt­un­um. Brýn­ast er þó að við gerum sjálf það sem í okkar valdi stendur til að halda veirunni í skefj­u­m,“ sagði for­set­inn í þeirri færslu sinni, þar sem hann sendi jafn­framt öllum þeim sem sýkst hafa bestu óskir um góðan bata og færði þeim sem eru að „glíma við þennan vágest í þágu okkar allra“ stuðn­ings­kveðj­ur.

„Við skulum öll reyna að létta þeim verkið með því að sinna okkar eigin sótt­vörnum og fara að eigin frum­kvæði og hyggju­viti eftir leið­bein­ingum og til­mælum sem gagn­ast sam­fé­lag­inu í heild. Verum hluti lausn­ar­inn­ar, ekki vand­ans,“ skrif­aði Guðni þá.