Frum­varp um millj­óna­mær­inga-skatt­inn, eins og hann er kall­að­ur, var sam­þykkt á argent­ínska þing­inu í gær. 42 þing­menn stuttu hinn nýja skatt en 26 voru á móti.

Skatt­ur­inn verður aðeins lagður á stór­eigna­fólk sem á eignir metnar á 200 millj­ónir pesósa eða meira (um 315 millj­ónir króna). Um 12 þús­und manns í land­inu falla í þennan hóp.

Í kringum 1,5 millj­ónir til­fella af kór­ónu­veirunni hafa greinst í Argent­ínu og talið er að um 40 þús­und manns hafi lát­ist vegna COVID-19.

Argent­ína hefur því orðið verr úti en flestar aðrar þjóðir í far­aldr­in­um. Íbúar lands­ins eru um 45 millj­ón­ir. Til ýmissa harðra aðgerða hefur verið gripið til að hefta útbreiðsl­una. Það hefur haft áhrif á efna­hags­lífið sem var veik­burða áður en kór­ónu­veiran kom til sög­unn­ar. Þar eru margir undir fátækt­ar­mörk­um, skuldir rík­is­ins eru gríð­ar­legar og atvinnu­leysi útbreitt. Efna­hag­skreppa hófst í Argent­ínu árið 2018 og hefur aðeins dýpkað síð­ustu mán­uði.

Nýi skatt­ur­inn mun leggj­ast á um 0,8 pró­sent lands­manna. Þessi hópur mun þurfa að greiða skatta af eignum sín­um, bæði eignum í Argent­ínu og utan land­stein­ana. For­seti lands­ins, Alberto Fern­and­ez, von­ast til þess að þetta skili 300 millj­örðum pesósa í rík­is­kass­ann til að standa straum af kostn­aði við lækn­inga­vörur og efna­hags­að­gerðir ýmis kon­ar.  

Leið­togar stjórn­ar­and­stöð­unnar segja millj­óna­mær­inga-skatt­inn hins vegar eiga eftir að fæla fjár­festa frá land­inu.