Frá 1. júlí, um það leyti sem ný bylgja far­ald­urs­ins hófst hér á landi hefur 151 mann­eskja með COVID-19 þurft að leggj­ast inn á Land­spít­al­ann eða greinst með sjúk­dóm­inn á sjúkra­hús­inu. Nokkrar hafa þurft að leggj­ast inn oftar en einu sinni. Á föstu­dag var fjöld­inn 140 og fékk Kjarn­inn þá þær upp­lýs­ingar að af þeim voru 63 full­bólu­settar eða um 45 pró­sent. Átta voru bólu­settar með bólu­efni Jans­sen. Í hópnum eru nokkrir ferða­menn með óþekkta stöðu bólu­setn­ing­ar. Að með­al­tali hafa þessir sjúk­lingar þurft að vera á sjúkra­húsi í 7-8 daga.

Á þessu sama tíma­bili (1. júlí-29. októ­ber) þurftu 28 manns á gjör­gæslu­með­ferð að halda vegna COVID-19, nokkrir oftar en einu sinni. Átta þeirra, eða tæp­lega 29 pró­sent, voru full­bólu­settir en ekki er vitað um bólu­setn­ing­ar­stöðu fimm ferða­manna.

Aðeins einn sjúk­lingur sem fengið hefur örv­un­ar­bólu­setn­ingu, svo vitað sé, hefur þurft á inn­lögn á Land­spít­al­ann vegna COVID-19 að halda.

Þórólfur Guðna­son sótt­varna­læknir skrifar í nýjum pistli á covid.is að um 2-5 pró­sent þeirra sem sýkj­ast af COVID-19 legg­ist inn á sjúkra­hús, 0,4 pró­sent leggst inn á gjör­gæslu­deild. Hann bendir á að engin vel virk lyf eru til við sýk­ing­unni og virkni bólu­efna sé ein­ungis um 50 pró­sent gegn smiti þótt þau séu um 90 pró­sent virk til að koma í veg fyrir alvar­leg veik­indi.

Hvað sam­an­burð við svínaflens­una sem gekk yfir kárið 2009 varðar skrifar Þórólfur að þá hafi heild­ar­fjöldi gjör­gæslu­rýma á Land­spít­ala verið 20 en í dag séu þau 14.

„Af ofan­greindu má því sjá að alvar­leiki COVID-19 mældur í inn­lögnum á sjúkra­hús, er um tíu sinnum meiri en svínaflensunnar 2009 auk þess eru bólu­efni gegn COVID-19 minna virk, engin vel virk lyf eru til við COVID-19 og fjöldi gjör­gæslu­plássa er nú minni en árið 2009.

Þannig er allur sam­an­burður á COVID-19 og svínaflens­unni 2009 COVID í óhag. Bar­áttan við COVID-19 er marg­falt erf­ið­ari en bar­áttan var við svínaflens­una 2009.“

Eng­inn full­bólu­settur ein­stak­lingur innan við tví­tugt þurfti á sjúkra­húsinn­lögn að halda 1. júlí-29. októ­ber. Átján bólu­settir og yngri en fimm­tíu ára hafa þurft inn­lögn og fimm bólu­settir á sex­tugs­aldri hafa verið lagðir inn. Fjöld­inn eykst er ofar dregur í aldri. Þannig hafa 13 bólu­settir á sjö­tugs­aldri þurft inn­lögn og sautján á átt­ræð­is­aldri. Níu mann­eskj­ur, átta­tíu ára og eldri, hafa verið lagðar inn á tíma­bil­inu.

Eng­inn full­bólu­settur ein­stak­lingur yngri en fjöru­tíu ára hefur þurft að leggj­ast inn á gjör­gæslu vegna COVID-19. Aðeins einn bólu­settur á fimm­tugs­aldri og sömu­leiðis einn á sex­tugs­aldri. Tveir bólu­settir á aldr­inum 60-69 ára hafa þurft gjör­gæslu­með­ferð og fjórir á átt­ræð­is­aldri.

Frá því júlí hafa 6.727 manns greinst með kór­ónu­veiruna inn­an­lands. Um 58 pró­sent þeirra hafa verið full­bólu­sett.

Síð­ustu daga hefur fjöldi smita í sam­fé­lag­inu auk­ist umtals­vert. Í morgun lágu þrettán sjúk­lingar á Land­spít­ala vegna COVID-19 og sex þeirra voru óbólu­sett­ir. Tveir sjúk­lingar voru þá á gjör­gæslu og þurftu báðir stuðn­ing önd­un­ar­vél­ar. Með­al­aldur þeirra sem nú liggja inni er 56 ár.

Núna eru 37 börn á aldr­inum 13-17 ára með kór­ónu­veiruna og í ein­angrun en mun fleiri börn á aldr­inum 6-12 ára eru með sjúk­dóm­inn eða 148. Þessi börn eru óbólu­sett enda enn ekk­ert bólu­efnið sam­þykkt í Evr­ópu fyrir börn yngri en 12 ára. Sótt­varna­læknir sagði í pistli á covid.is á föstu­dag að Vís­bend­ingar væru um að bólu­setn­ing barna kunni að vera áhrifa­rík­ari en bólu­setn­ing full­orð­inna til að koma í veg fyrir smit af völdum COVID-19.

Frá því ný bylgja hófst í júlí hafa þrír lát­ist vegna COVID-19. Um helg­ina lést einn sjúk­lingur sem hafði greinst með kór­ónu­veiruna en hann var lagður inn á Land­spít­al­ann af öðrum orsök­um, segir í frétt á vef Land­spít­al­ans.

Í far­aldr­inum hingað til hefur sýnt sig að um 1-2 vikur eftir að smit­hrina byrjar fari það að birt­ast í tölum um inn­lagnir á sjúkra­hús.