„Það er fagn­að­ar­efni að þessar lyk­il­stofn­anir skuli vera í sam­starfi um eft­ir­lit­ið. Þar er sér­fræði­þekk­ing­una að finna og gögnin sem safn­ast munu geta skorið úr um það hvort að fram­kvæmd hval­veiða sé lögum sam­kvæmt,“ segir Svan­dís Svav­ars­dóttir mat­væla­ráð­herra sem sett hefur reglu­gerð um eft­ir­lit við hval­veiðar. Í henni er Mat­væla­stofnun falið að hafa reglu­bundið eft­ir­lit með veið­unum til að farið sé að lögum um vel­ferð dýra og Fiski­stofa mun sjá um fram­kvæmd eft­ir­lits­ins sam­kvæmt fyr­ir­liggj­andi sam­starfs­samn­ingi milli stofn­an­anna tveggja.

Í til­kynn­ingu um málið frá mat­væla­ráðu­neyt­inu segir að Fiski­stofa muni m.a. sjá um eft­ir­lits­ferðir við veið­ar, mynd­bands­upp­tökur veiði­að­ferða og skrán­ingu þeirra. Veiði­eft­ir­lits­menn munu verða um borð í veiði­ferðum og verður öllum gögnum komið til eft­ir­lits­dýra­læknis í lok hverrar athug­un­ar.

Fiski­stofa hefur einnig eft­ir­lit með því að þau skil­yrði sem fram koma í veiði­leyfi varð­andi veiði­búnað og veiðar séu upp­fyllt.

Reglu­gerðin tekur þegar gildi og mun eft­ir­litið hefj­ast sam­stund­is.

Á yfir­stand­andi hval­veiði­ver­tíð hefur það marg­sinnis komið fyrir að sprengiskutlar sem Hvalur hf. notar við veið­arnar hafi geigað og ekki sprung­ið. Því hafi þurft að skjóta dýrin aftur sem tekur tíma og getur lengt dauða­stríð þeirra. Dæmi er um, líkt og Kjarn­inn hefur fjallað um að fjögur skot hafi þurft til að aflífa eitt dýr. Eitt dýrið var skotið í bægsli og þurfti því að skjóta það aft­ur. Það var lang­reyð­ar­kýr sem reynd­ist kelfd og var fóstrið skorið úr henni á vinnsluplan­inu við Hval­stöð­ina.

Sjáv­ar­vernd­ar­sam­tökin Hard to Port hafa fylgst náið með og myndað löndum og verkun hval­anna í hval­stöð­inni í Hval­firði í sum­ar. Full­trúar þeirra telja ljóst að aflíf­un­ar­að­ferð­irnar brjóti gegn lögum um dýra­vel­ferð.

Kjarn­inn leit­aði við­bragða Svan­dísar vegna þess­ara mála fyrr í sumar og benti hún á að hvorki ráðu­neyti hennar né und­ir­stofn­arnir þess hefðu upp­lýs­ingar um hvort verk­lags­reglum um hval­veiðar væri fylgt. „Það er alveg skýrt í mínum huga að ef atvinnu­greinar sem byggja á dýra­haldi eða veiðum geta ekki tryggt mann­úð­lega aflífun dýra eiga þær sér enga fram­tíð í nútíma­sam­fé­lagi, sagði Svan­dís við Kjarn­ann.