Í Dan­mörku tók und­ir­af­brigði ómíkron, BA.2, fljótt yfir upp­runa­lega afbrigð­ið. BA.2 er enn meira smit­andi en virð­ist ekki valda alvar­legri ein­kenn­um. Hins vegar er und­ir­af­brigðið BA.1 útbreidd­ara á heims­vísu og enn útbreitt í Dan­mörku og því hafa vaknað spurn­ingar um hvort hægt sé að sýkj­ast af þeim báð­um.

Smit­sjúk­dóma­stofnun Dan­merkur (Sta­tens Serum Institut) hefur nú birt fyrstu nið­ur­stöður sínar í rann­sókn á þessu. Sam­kvæmt þeim getur sami ein­stak­lingur smit­ast bæði af BA.1 og BA.2 stuttu síðar en það ger­ist þó sjald­an.

Und­ir­af­brigðin BA.1 og BA.2 eru bæði kölluð ómíkron því þrátt fyrir að um 40 stökk­breyt­ingum muni á þeim eru þær ekki þess eðlis að Alþjóða heil­brigð­is­mála­stofn­unin líti svo á að um ný afbrigði sé að ræða. BA.2 grein­ist nú í 88 pró­sent til­fella í Dan­mörku og er einnig að ná yfir­hönd­inni í Bret­landi, Suð­ur­-Afr­íku og Nor­egi.

Danska smit­sjúk­dóma­stofn­unin komst að því í rann­sókn sinni, sem enn hefur ekki verið rit­rýnd, að þeir sem sýkst hafa af bæði BA.1 og BA.2 séu aðal­lega ungt og óbólu­sett fólk. Það hefur aðeins upp­lifað mild sjúk­dóms­ein­kenni og eng­inn úr þessum hópi hefur lát­ist eða þurft að leggj­ast inn á sjúkra­hús.

1.739 manns í Dan­mörku greindust tvisvar með 20-60 daga milli­bili á tíma­bil­inu 21. nóv­em­ber til 11. febr­ú­ar. Á sama tíma voru 1,8 millj­ónir smita stað­fest í land­inu. Talið er að aðeins brot þeirra 1.739 sem greindust tvisvar hafi í báðum til­vikum sýkst af und­ir­af­brigðum ómíkron. Delta var enn á sveimi á þessu tíma­bili.

Sam­kvæmt upp­lýs­ingum frá WHO er ómíkron lang útbreiddasta afbrigði kór­ónu­veirunnar í heim­inum í dag og er nán­ast það eina sem rað­grein­ist. Þrjú megin und­ir­af­brigði hafa grein­st: BA.1, BA.1.1 og BA.2. WHO segir að BA.2 sé að verða útbreidd­ara en hin und­ir­af­brigðin en að í heild­ina fari þó smitum fækk­andi almennt á heims­vísu og dauðs­föllum vegna COVID-19 sömu­leið­is.

Eðli veira er að stökk­breyt­ast stöðug. Þær gera það í hverjum ein­stak­lingi og er þær smit­ast á milli ein­stak­linga. Hins vegar er nú talið lík­legt, að því er fram kom á upp­lýs­inga­fundi WHO í gær­kvöldi, að hægja muni á stökk­breyt­ing­um. Þannig að ný afbrigði muni ekki koma jafn ört fram og hingað til. Skýr­ingin er sú að ónæmi er orðið útbreidd­ara en áður var, bæði vegna sýk­inga og bólu­setn­inga.