Petro Porosjenkó, for­seti Úkra­ínu, segir Rússa enn ógna Úkra­ínu með öllum her­mætti sínum þó nokkrir rólegir dagar hafi nú liðið í átökum úkra­ínskra stjórn­valda við aðskiln­að­ar­sinna aust­ast í land­inu. Reuters greinir frá þessu.

Þetta lét for­set­inn hafa eftir sér eftir rík­is­stjórn­ar­fund í dag, sem hald­inn var í skugga slitn­andi sam­steypu­stjórnar og versn­andi lífs­gæða almenn­ings í Úkra­ínu. Porosjenkó segir Rússa vilja „kæfa efna­hag rík­is­ins og koma honum úr jafn­vægi“ með banni sínu á inn­flutn­ing úkra­ínskra mat­væla. Þá hefur Úkra­ínu ekki tek­ist að semja við Rússa um verð­myndun gass úr austri með þeim þeim afleið­ingum að gas­birgðir Úkra­ínu eru litlar fyrir kom­andi vet­ur.

Stjórn­völd í Kreml þrýsta nú á stjórn Porosjenkó að borga þriggja millj­arða doll­ara skulda­bréf að fullu í des­em­ber. Með því hafa Rússar skilið sig frá öðrum lána­drottnum stjórn­valda í Kænu­garði sem hafa allir slegið af end­ur­greiðslu­kröfum sín­um. Úkra­ína glímir við mik­inn erlendan skulda­vanda og hafa und­an­farna mán­uði átt í við­ræðum við lána­drottna sína. Í lok ágúst tókst stjórn­völdum að semja um skuld­breyt­ingu 18 millj­arða doll­ara.

Petro Porosjenkó var í Brus­sel nýverið þar sem hann ræddi meðal ann­ars við Don­ald Tusk, for­seta fram­kvæmda­stjórnar Evr­ópu­sam­bands­ins. Úkra­ína hefur í auknum mæli leitað á náðir vest­rænna ríkja í stað Rúss­lands. Það er meðal ann­ars ástæða þess að átök brut­ust út í Úkra­ínu í byrjun árs 2014.

Enn er haldið í vopna­hléssam­komu­lag sem gert var við aðskiln­að­ar­sinna í Aust­ur-Úkra­ínu, þó áfram hafi verið barist. Und­an­farna daga hefur verið hljóð­lát­ara; sprengjur og byssu­kúlur eru hættar að rigna yfir vígl­in­una. Porosjenkó telur sig hins vegar vita að Rússar eigi eftir að leggja til atlögu og beita her sínum í átök­un­um. „Ég er viss um að helsta ógnin nú sé stór­sókn Rúss­lands,“ sagði hann.

Aðskiln­að­ar­sinnar í aust­ur­hluta Úkra­ínu er taldir fá stuðn­ing rúss­neska hers­ins í bar­áttu sinni um yfir­ráð í aust­ari hér­uðum Úkra­ínu sem eiga landa­mæri að Rúss­landi. Stjórn­völd í Kænu­garði halda því fram að Rússar skaffi aðskiln­að­ar­sinnum vopn og að hugs­an­lega taki rúss­neskir her­menn þátt í átök­un­um.