Lögmaður á vegum sjávarútvegsfyrirtækisins Samherja og forstjóra þess, Þorsteins Más Baldvinssonar, beindi spurningu til Ásgeirs Jónssonar seðlabankastjóra, í kjölfar birtingar viðtals við hann í Stundinni síðla í apríl. Hún sneri að því hvort rétt væri eftir honum haft í viðtalinu, um rannsókn lögreglu á kærum Samherja á hendur starfsfólki Seðlabankans.
Seðlabankinn hefur afhent Kjarnanum bréf frá Samherja og svar frá seðlabankastjóra, eftir að hafa áður sagt þagnarskyldu starfsmanna bankans ríkja um samskiptin. Þá ákvörðun kærði Kjarninn til úrskurðarnefndar um upplýsingamál undir lok síðasta mánaðar og hefur Seðlabankinn nú óskað þess að málið sé fellt niður, eftir afhendingu gagnanna.
Í viðtalinu við Stundina sagði Ásgeir eftirfarandi:
„Ég skil bara ekki hvern andskotann þessi lögreglustjóri þarf að rannsaka og af hverju þessu er ekki bara vísað frá. Ég óttast það að mörgu leyti, í svona eftirlitsstofnun eins og Seðlabankinn er, að við lendum í því að við verðum hundelt persónulega eins og farið var á eftir þessu starfsfólki.“
„Fyrir hönd framangreindra umbjóðenda minna er þess vinsamlega farið á leit við þig að þú upplýsir hvort framangreint sé orðrétt eftir þér haft?“ segir í bréfi lögmannsins Garðars Gíslasonar, sem stílað var á Seðlabankastjóra 23. apríl, sama dag og viðtalið við Ásgeir birtist.
„Hverju sem líður kæru umbjóðenda minna til lögreglu geta naumast verið um það áhöld að allt í senn dómstólar, umboðsmaður Alþingis og forsætisráðherra hafa metið það svo að starfsmenn Seðlabanka Íslands hafi brotið gegn lögum í embættisfærslu sinni gagnvart umbjóðendum mínum.
Það væri þakkarvert að fá upplýst frá þér hvort það sé réttur skilningur á tilvitnuðum ummælum þínum, séu þau rétt eftir þér höfð, að þú sért þeirrar skoðunar að þeir borgarar sem verða fyrir barðinu á ólögmætri embættisfærslu af hálfu opinberra starfsmanna, sem fara með mikið vald til inngripa og afskipta af borgurunum, eigi ekki að standa vörð um rétt sinn eða koma því til leiðar að slík embættisfærsla verði rannsökuð af þar til bærum aðilum og í samræmi við gildandi lög í landinu?“ sagði í bréfi lögmannsins.
Rétt haft eftir
Seðlabankastjóri sagðist ekki gera ágreining við það sem blaðamaður Stundarinnar hafði eftir honum.
„Seðlabankastjóri gerir ekki ágreining um efnisinnihald tilvitnaðra ummæla í viðtalinu. Þau lutu ekki að sjálfsögðum rétti borgaranna til þess að leita til lögreglu eða annarra bærra yfirvalda telji þeir á sér brotið lögum samkvæmt,“ segir í svari frá Ásgeiri, sem starfsmaður Seðlabankans hafði milligöngu um að koma til lögmanns Samherja þann 6. maí, um tveimur vikum eftir að erindið barst frá Samherja og Þorsteini Má.
Kæru Samherja vísað frá og er hjá ríkissaksóknara
Sama dag og viðtalið við Ásgeir birtist kom það fram í fréttum að lögreglustjórinn á Vestfjörðum hefði vísað kærum Samherja á hendur starfsmönnum Seðlabankans, sem lagðar voru fram undir lok apríl árið 2019, frá. Eins og Kjarninn sagði frá nýlega kom fram í samskiptagögnum innan úr Samherja sem Kjarninn hefur undir höndum að Samherji ætlaði sér að fara lengra með málið.
„Bara svo þið vitið þá vísaði lögreglustjórinn á Vestfjörðum kærunni frá a grundvelli þess að bankinn hafði brotið eins a öðrum í 18 málum. Sumsé eins og ef þú segist ekki eiga að fá sekt af því að þú keyrðir yfir 18 önnur rauð ljós. Ríkissaksóknari er með málið og hefur kallað eftir gögnum frá lögreglustjóranum. Þessi rök halda vitaskuld ekki vatni. Þu sleppur ekki fyrir það eitt að hafa brotið oftar af þér. Öðru fremur bendir það til kerfisbundinna brota,“ sagði annað hvort Arna McClure lögmaður eða Þorbjörn Þórðarson almannatengslaráðgjafi í spjallhópnum „PR Namibía“ sama dag og viðtalið við Ásgeir birtist í Stundinni.
Viðsnúningur Seðlabankans
Samskiptin á milli lögmanns Samherja og Seðlabankans bárust Kjarnanum með tölvupósti síðdegis á föstudag. Eftir að Kjarninn kærði synjun bankans á umbeðnum gögnum þann 31. maí sl. skoðaði Seðlabankinn gögnin að nýju og hefur nú „endurmetið fyrri viðbrögð sín við nefndri upplýsingabeiðni.“
„Að mati Seðlabankans felast ekki þagnarskyldar upplýsingar í gögnunum og eru þau því meðfylgjandi, þ.e. annars vegar erindi lögmanns Samherja hf., dags. 23. apríl sl., og hins vegar tölvuskeyti starfsmanns Seðlabankans, dags. 6. maí sl., þar sem erindinu er svarað,“ sagði í tölvupósti frá starfsmanni Seðlabankans til blaðamanns.
Gögnin má nálgast hér að neðan.
