„Við erum að haga okkur öðru­vísi, það er það sem er að hafa mestu áhrif­in,“ sagði Kári Stef­áns­son, for­stjóri Íslenskrar erfða­grein­ing­ar, um hverju við væri að búast af hinu breska afbrigði kór­ónu­veirunnar í sam­fé­lag­inu nú. Kári var spurður út í þetta í lok mál­þings­ins Varið land – hvað höfum við lært af COVID-19? sem fram fór í dag á vegum ÍE. Á mál­þing­inu, sem var streymt í beinni á Face­book, var farið yfir nið­ur­stöður rann­sókna sem fyr­ir­tækið hefur unnið að frá því að far­ald­ur­inn kom upp, m.a. þær sem tengj­ast rað­grein­ingum og mótefna­mæl­ingum og nú lang­vinnum áhrifum sjúk­dóms­ins á heilsu þeirra sem veikt­ust.

„Ekki gleyma því að þessi sjúk­dómur er að mörgu leyti hegð­un­ar­sjúk­dóm­ur,“ sagði Kári. Hvernig mað­ur­inn hagar sér skipti miklu meira máli heldur en af hvaða afbrigði veiran sé. Und­an­farnar vikur hafi smit lekið yfir landa­mærin og „fólki gengur mis­vel að fara eftir sótt­kví,“ sagði Kári. „Við verðum ein­hvern veg­inn að finna leið til að takast á við það. Takast á við það án þess að mis­bjóða fólki sem við setjum í sótt­kví. Þessar aðferðir sem Þórólfur [Guðna­son] og hans fólk hefur sett saman þær duga til þess að hemja þetta svo fremi sem við förum að þeim ráðum sem við fáum.“

Það var Þórólfur sótt­varna­læknir sem hafði loka­orðin á mál­þing­inu. Hann byrj­aði á því að rifja upp orð Kára frá því í upp­hafi far­ald­urs­ins. „Hann sagði að nálg­ast þyrfti svona far­aldur eins og vís­inda­verk­efni. Það þyrfti að spyrja ákveð­inna spurn­inga sem reynt yrði að svar með vís­inda­legum aðferð­um. Þetta held ég að hafi verið alveg hár­rétt hjá hon­um.“

Hann sagði að með þeim hætti þyrfti að und­ir­búa sig fyrir far­aldra fram­tíð­ar­inn­ar. „Hvernig ætlum við að fást við þá? Því þeir koma aft­ur. Heims­far­aldur inflú­ensu á eftir að koma aft­ur. Við eigum eftir að fá nýjar veir­ur. Þá þurfum við að vera í stakk búin til að taka á þessu á vís­inda­legan máta. Svara spurn­ingum og grípa til réttra aðgerða.“

Þórólfur þakk­aði að lokum Íslenskri erfða­grein­ingu fyrir þeirra þátt og þeirra vinnu í bar­átt­unni gegn COVID-19. „Þetta hefur verið algjör­lega ómet­an­legt og mjög ánægju­legt sam­starf,“ sagði Þórólfur og bætti svo við á léttum nót­um: „Svona langoft­ast. Og næstum því alltaf.“