„Salan í Íslands­banka er svo mikið sukk og svínarí að bæði þarf að leita leiða til að rifta henni og draga menn til ábyrgð­ar.“

Þetta skrifar Jóhanna Sig­urð­ar­dótt­ir, fyrr­ver­andi for­maður Sam­fylk­ing­ar­innar og for­sæt­is­ráð­herra, í stöðu­upp­færslu á Face­book í dag.

Hún segir að ekki sé nóg með að „skúrkar úr banka­hrun­inu“ hafi kom­ist bak­dyra­megin inn heldur virð­ast dyr lána­stofn­ana hafa staðið þeim opnar til lán­töku fyrir góss­inu.

„­Fjöldi kaup­enda seldi strax og græddi millj­arða á „einni nóttu“ af almanna­eign. Spill­ingin ger­ist vart svæsnari. Nú þarf að virkja lög um ráð­herra­á­byrgð, sem Alþingi hefur heykst á að breyta þrátt fyrir kröfu rann­sókn­ar­nefndar Alþingis á banka­hrun­inu þar um.

Þeim lögum ætl­aði mín rík­is­stjórn að láta breyta á árinu 2010 en fosætis­nefnd Alþingis sagði að það væri verk­efni Alþingis en ekki for­sæt­is­ráð­herra að leggja fram frum­varp þar að lút­andi. Ég skora á Alþingi að breyta þegar í stað þessum lögum en frum­varp liggur fyrir um það frá Sam­fylk­ing­unni og Píröt­u­m,“ skrifar Jóhanna.

Margir selt sig niður að ein­hverju eða öllu leyti

Vísar Jóhanna í grein Kjarn­ans frá því fyrr í vik­unni þar sem fram kom að alls væru 132 þeirra 207 fjár­­­­­festa sem fengu úthlutað hlutum í Íslands­­­­­banka í nýlegu lok­uðu útboði ekki lengur skráðir fyrir sama hlut og þeir fengu úthlut­að.

Margir þeirra hefðu selt sig niður að ein­hverju eða öllu leyti. Heim­ild­­­ar­­­menn Kjarn­ans innan banka­­­kerf­is­ins segja að í flestum til­­­vikum séu við­kom­andi ein­fald­­­lega búnir að selja hlut­inn og leysa út hagn­að­inn af því að hafa fengið að taka þátt í útboð­inu með afslætti. Í ein­hverjum til­­­vikum hafi verið fram­­­virkir samn­ingar við þá og við­kom­andi fengið lán fyrir kaup­unum sem hafi svo verið gert upp strax á fyrstu dögum eftir að hægt var að selja að nýju. Það sem eftir sat lenti svo í vasa við­kom­andi fag­fjár­­­­­festis sem hreinn hagn­að­­­ur.

Í öðrum til­­­vikum hafi hlut­­­ur­inn þó verið fluttur á vörslu­­­reikn­inga í eign­­­ar­­­stýr­ingu við­kom­andi. Ómög­u­­­legt er að sjá af hlut­haf­a­list­­­anum hverjir færðu bréfin sín með þeim hætti og hverjir seldu. Velta með bréf í Íslands­­­­­banka, þar sem sem þau eru keypt og seld, dag­anna eftir að útboð­inu lauk var marg­­­föld það sem hún var að með­­­al­tali á dag frá ára­­­mótum og fram að útboði. frá 23. mars og til 11. apríl höfðu um 152,6 millj­­­ónir hluta skipt um eig­end­­­ur. Það er um þriðj­ungur þess sem selt var í útboð­in­u.