Auglýsing

Hér er hug­mynd fyrir ykk­ur, for­ystu­menn rík­is­stjórn­ar­inn­ar: farið saman inn í her­bergi, lokið hurð­inni (eða hafið hana opna – það er skárra loft þannig auk þess sem þið hafið ekk­ert að fela), ákveðið kjör­dag til Alþing­is, komið svo út og segið frá dag­setn­ing­unni.

Þetta hljómar ein­falt af því að þetta er ein­falt.

Þið getið farið inn í her­bergi á skrif­stofum Alþing­is, í Stjórn­ar­ráðs­hús­inu, heima hjá ykk­ur, farið í sum­ar­bú­stað, pantað ykkur hót­el­her­bergi, gert þetta í Þing­holts­stof­unni á Hótel Holti, á dýra­spít­ala, í Val­höll, á Lauga­vegi 4-6 eða jafn­vel ekki einu sinni í her­bergi – þið getið þess vegna verið úti í guðs­grænni nátt­úr­unni, keyrt upp í Öskju­hlíð, farið í göngutúr á Esj­una, þið hefðuð gott af því. En það skiptir engu máli.

Auglýsing

Þið getið verið tveir eða með aðstoð­ar­menn­ina með ykkur eða alla rík­is­stjórn­ina, þið getið jafn­vel boðið kon­unum ykk­ar. Þið getið sýnt beint frá þessu á net­inu. Það skiptir engu máli. Bara ekki taka Sig­mund Davíð með.

Eðli­legt vinnu­lag 101

Það sem þið vitið er eft­ir­far­andi:

a) Það verður kosið í haust. Þið hafið báðir sagt það ítrekað og splunku­nýr og ferskur for­seti Íslands árétt­aði það með mjög afger­andi áherslu í inn­setn­ing­ar­ræðu sinni á mánu­dag. Sá eini sem er enn með veru­legt vesen út af þessu er Sig­mundur Dav­íð, en það skiptir engu máli af því að hann er ekki í rík­is­stjórn og það er afskap­lega hæpið að Guðni Th. Jóhann­es­son neiti að skrifa undir þing­rof­s­til­lögu bara af því að einn hálf­út­skúf­aður flokks­for­maður er með derr­ing. Munið bara: ekki bjóða Sig­mundi með á fund­inn af því að hann mun skemma hann.

b) Haust er til­tölu­lega teygj­an­legt hug­tak. Það mætti jafn­vel með sæmi­lega góðu móti halda því fram að það verði enn haust sirka í end­aðan nóv­em­ber.

c) Flokkar þurfa minnst mánuð til að búa sig undir kosn­ing­ar. Af því, ásamt lið b, leiðir að þið hafið tíma­bilið 4. sept­em­ber til 30. nóv­em­ber að vinna með.

d) Kjör­dagur verður á laug­ar­degi, af því að kjör­dagar eru á laug­ar­dögum og þannig er það bara.

Þetta þýðir að þið hafið úr tólf laug­ar­dögum að velja. Ykkar verk­efni er að horfa á þessa tólf laug­ar­daga og velja einn. Bara ein­hvern. Þið getið dregið dag úr hatti, búið til litla miða og kastað pílu í þá, valið þann sem er næstur afmæl­is­degi ein­hvers af börn­unum ykkar (eða hest­unum ykkar eða skrán­ing­ar­degi bíl­anna ykkar eða deg­inum þegar þið mis­stuð svein­dóminn) eða þið getið gert snögg­grein­ingu á kostum og göllum hvers dags og valið svo út frá henni. Það skiptir engu máli.

Þetta er ekki flók­ið. Eig­in­lega er þetta svo lítið flókið að það er hálf­kjána­legt að skrifa þetta hérna nið­ur. Þetta er svo­lítið eins og að skrifa leið­bein­ingar fyrir hálf­tí­ræða ömmu sína um það hvernig maður skiptir um stöð á sjón­varp­inu henn­ar, nema að á nútíma­sjón­vörpum er það reyndar tals­vert flókn­ara verk­efni en það sem þið standið frammi fyr­ir.

Þegar þið eruð svo búnir að velja og til­kynna dag­setn­ingu getið þið haf­ist handa við að skipu­leggja ykkur í kringum hana, af því að mér skilst að þið þurfið að klára svo mörg mik­il­væg mál fyrir kosn­ing­ar. Það er engin ástæða til að draga það í efa, þótt allir virð­ist hafa ólíkar hug­myndir um það hver þessi mik­il­vægu mál eru og hvernig þau eigi að líta út. En ein leið til að afgreiða þetta er að raða mál­unum á graf, þar sem x-ás­inn sýnir mik­il­væg­ið, að ykkar mati, fyrir þjóð­ina og y-ás­inn sýnir lík­urn­ar, að ykkar mati, á að þið náið að koma mál­inu í gegnum þingið fyrir kjör­dag – svo takið þið þau sem eru í efri fjórð­ungnum hægra meg­in, keyrið þau áfram en geymið hin. Eðli­legt vinnu­lag 101. Þið getið þakkað mér síð­ar.

Dóna­skapur

Ég er ekki að stinga þessu að ykkur af því að ég hlakka svo til kosn­inga. Þvert á móti kvíði ég þeim óskap­lega. Ég kvíði áfram­hald­andi fréttum af ras­ista­hreyf­ingum sem þykj­ast vera að daðra við fram­boð þangað til ein­hver flokkur bítur á agnið og lætur draga sig í popúl­ískar ein­angr­unar­átt­ir, ég kvíði því að vera með Sjálf­stæð­is­flokk­inn og Diet-­Sjálf­stæð­is­flokk­inn í fram­boði sam­an, ég kvíði því þegar Píratar opin­bera fram­boðs­listana sína, ég kvíði kjána­hroll­inum sem ég mun fá þegar Sam­fylk­ingin heldur enn að hún sé stóri stjórn­ar­and­stöðu­flokk­ur­inn, ég kvíði sam­fé­lags­miðl­un­um. Mest af öllu kvíði ég því þegar Fram­sókn­ar­flokk­ur­inn kynnir stóra kosn­inga­lof­orðið sitt.

En þið lof­uðuð þessum kosn­ing­um. Og það er dóna­skapur að gefa ekki út þessa dag­setn­ingu. Það er dóna­skapur gagn­vart öðrum flokkum á þingi og sam­flokks­mönnum ykk­ar, það er mik­ill dóna­skapur gagn­vart nýjum fram­boð­um, það er gríð­ar­legur dóna­skapur gagn­vart almenn­ingi og það er meira að segja smá dóna­skapur gagn­vart sjálfum ykk­ur. Það lætur ykkur líta út eins og aula.

Kannski eruð þið löngu búnir að ákveða þessa dag­setn­ingu en viljið bara ekki opin­bera hana strax til að glata ekki ein­hverri ímynd­aðri víg­stöðu hvor gagn­vart ann­ars flokki – eða þá gagn­vart hinum flokk­un­um. Treystið mér, jafn­vel þótt svo væri léti það ykkur ekki líta út eins og minni aula.

Fyrir alla muni, hespið þessu bara af, einn tveir og þrír. Þið getið til dæmis gert þetta eftir hádegi í dag. Þetta ætti ekki að þurfa að taka nema svona klukku­tíma eða tvo með öllu, í alvöru. En plís, ykkar vegna, ekki segja Sig­mundi Dav­íð.

Skiptir Kjarninn þig máli?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Við erum til staðar fyrir lesendur og fjöllum um það sem skiptir máli.

Ef Kjarninn skiptir þig máli þá máttu endilega vera með okkur í liði.

Já takk, ég vil styrkja Kjarnann!
Suðurhringþokan mynduð af WEBB-sjónaukanum í tveimur ólíkum útfærslum.
2.000 ljósár á sextíu sekúndum
Þau sem dreymir um að ferðast um geiminn ættu ekki að láta nýtt myndband geimferðastofnana Bandaríkjanna og Evrópu framhjá sér fara. Á sextíu sekúndum er boðið upp á 2.000 ljósára ferðalag með hjálp hins magnaða WEBB-sjónauka.
Kjarninn 16. ágúst 2022
Bjarni Benediktsson er formaður Sjálfstæðisflokksins.
Bjarni segir rangt að hann „vilji Sósíalistaflokkinn feigan“
Formaður Sjálfstæðisflokksins segir að Gunnar Smári Egilsson snúi út úr orðum sínum um styrki til stjórnmálaflokka. Honum þyki 120 milljóna styrkur á kjörtímabilinu til flokks sem fékk enga þingmenn kjörna einfaldlega of há fjárhæð.
Kjarninn 16. ágúst 2022
Finnur Birgisson
Saga tekjutengingar ellilífeyris almannatrygginga frá 1946
Kjarninn 16. ágúst 2022
Gunnar Smári Egilsson er formaður framkvæmdastjórnar Sósíalistaflokks Íslands.
Segir Bjarna vilja ýkja völd Sjálfstæðisflokks umfram fylgi og draga úr áhrifum annarra
Bjarni Benediktsson hefur sagt að hann vilji draga úr opinberum styrkjum til stjórnmálaflokka. Gunnar Smári Egilsson segir ástæðuna þá að Sjálfstæðisflokkurinn þurfi ekki jafn mikið á greiðslu frá ríkinu að halda og áður.
Kjarninn 16. ágúst 2022
Hér má sjá Drífu Snædal, fyrrverandi forseta ASÍ, og Sólveigu Önnu Jónsdóttur, formann Eflingar þegar betur áraði i samskiptum þeirra á milli.
Segir ASÍ hafa beinlínis unnið gegn nýjum öflum innan verkalýðshreyfingarinnar
Formaður Eflingar segir fram­kvæmda­stjóra SA ekki missa svefn yfir útbreiddum svikum atvinnu­rek­enda á þeim kjara­samn­ingum sem hann gerir fyrir þeirra hönd. Í greinaflokki, sem byrjaði að birtast í morgun, ætlar hún að rekja sögu ágreinings innan ASÍ.
Kjarninn 16. ágúst 2022
Horft niður í Hvalfjörð frá Brekkukambi í Hvalfjarðarsveit. Á fjallinu stendur til að byggja vindorkuver.
Íslenskir sérhagsmunaaðilar með „erlenda orkurisa í farteskinu“
Þótt ekkert vindorkuver sé risið hafa áform um fjölmörg slík þegar valdið sundrungu og deilum innan samfélaga út um landið, segir Andrés Skúlason, verkefnisstjóri hjá Landvernd. Hann segir vindorkufyrirtæki beita miklum þrýstingi og jafnvel blekkingum.
Kjarninn 16. ágúst 2022
Auglýsing frá upphafi áttunda áratugar síðustu aldar.
Ævintýrið um Carmen rúllurnar
Hvað gerir danskur kaupmaður sem finnst hann ekki hafa nóg fyrir stafni? Hjá Arne Bybjerg kaupmanni í danska bænum Kalundborg var svarið einfalt: að framleiða hárrúllur. Hann gaf þeim nafnið Carmen.
Kjarninn 16. ágúst 2022
Eitt og annað ... einkum danskt
Eitt og annað ... einkum danskt
Ævintýrið um Carmen rúllurnar
Kjarninn 16. ágúst 2022
Meira úr sama flokkiKjaftæði
None