Þota ALC, bandaríska flugleigufélagsins sem hefur átt í deilum við Isavia, er nú farin af landi brott. Flaug hún frá Keflavíkurflugvelli korter yfir níu í morgun til Evrópu. RÚV greinir frá.
Þann 17. júlí dæmdi héraðsdómur ALC í hag í þotudeilunni. Héraðsdómur komst að þeirri niðurstöðu að ALC beri eingöngu að greiða þær skuldir sem hvíli á þotunni sjálfri en ekki allar skuldir WOW air við Isavia.
Auglýsing
Vildu tryggja greiðslur upp í tveggja milljarða króna skuldir
Í gær úrskurðaði Héraðsdómur Reykjaness að ALC væri heimilt að sækja flugvélina sem hafði verið kyrrsett í kjölfar gjaldþrots WOW. Með kyrrsetningunni vildi Isavia tryggja að hægt væri að fá greiðslur upp í tveggja milljarða króna skuldir WOW air á lendingargjöldum, sem söfnuðust upp í aðdraganda falls félagsins. Það hefur nú verið tekið til gjaldþrotaskipta, en Sveinn Andri Sveinsson hrl. og Þorsteinn Einarsson hrl. eru skiptastjórar bússins.
Íslenska ríkið er eigandi Isavia, sem rekur flugvellina í landinu, þar á meðal Keflavíkurflugvöll.