Tvö ný kór­ónu­veirusmit greindust inn­an­lands í gær á sýkla- og veiru­fræði­deild Land­spít­ala. Alls voru 419 sýni greind hjá sýkla- og veiru­fræði­deild  svo hlut­fall jákvæðra sýna var innan við hálft pró­sent. Virkum smitum fækkar á milli daga, þau eru nú 117 en voru 122 í gær. Fólki í sótt­kví fækkar líka dag frá degi en nú eru 439 í sótt­kví miðað við 472 í gær. Einn ein­stak­lingur liggur á sjúkra­húsi vegna COVID-19 líkt og í gær, þó ekki á gjör­gæslu.

Á landa­mær­unum greind­ist einn ein­stak­lingur með virkt smit en þrír ein­stak­lingar bíða mótefna­mæl­ing­ar. Þar var sýni tekið frá 2.075 ein­stak­lingum en í gær tóku hert­ari reglur á landa­mærum gildi. Nú þurfa allir að fara í skimun við kom­una til lands­ins og aftur nokkrum dögum síðar eða sæta tveggja vikna sótt­kví.

Nýgengi smita hér inn­an­lands heldur áfram að lækka milli daga. 14 daga nýgengi á 100.000 íbúa er nú 16,9 miðað við 17,2 í gær og 18,5 í fyrra­dag. Á landa­mær­unum hefur nýgengið hækkað á sama tíma, er nú 12,5 miðað við 12,3 í gær og 11,2 í fyrra­dag.

Að lifa með veirunni

Í morgun hófst sam­ráðs­fundur undir yfir­skrift­inni „Að lifa með veirunni“ á vegum stjórn­valda. Svan­dís Svav­ars­dóttir heil­brigð­is­ráð­herra opn­aði fund­inn í morg­un. Hún sagði sam­ráðið nauð­syn­legt til þess að sætta ólík sjón­ar­mið í sam­fé­lag­inu varð­andi sótt­varna­að­gerðir yfir­valda. 

Klukkan hálf eitt verða pall­borðsum­ræður þar sem taka þátt Svandís, Alma Möller land­lækn­ir, Þórólfur Guðna­son sótt­varna­lækn­ir  og Víðir Reyn­is­son yfir­lög­reglu­þjónn. Beint streymi frá sam­ráðs­fund­inum er á vef stjórn­ar­ráðs­ins.