„Ég hef áhyggjur af þessu og hef viðrað þær margoft,“ sagði Þórólfur Guðna­son sótt­varna­læknir í við­tali í morg­un­út­varp­inu á Rás 2 í morg­un. „Ef að fólk er að hóp­ast mikið saman og er í einni kös á stíg­unum og við gos­s­töðv­arnar þá er þar aug­ljós­lega aukin smit­hætta.“

Hann hefur rætt við almanna­varnir og lög­regl­una um hvort eitt­hvað sé hægt að gera í mál­inu. „Fólk er alveg hreint trít­i­lótt að kom­ast þarna,“ segir hann. „Það er álit yfir­valda á staðnum að það sé nán­ast von­laust að stöðva og banna för fólks. Það fari þá bara aðrar leið­ir, yfir erf­ið­ari staði. Klöngrist yfir hraunið og gæti lent í öðrum vand­ræð­um. Þannig að af tvennu illu eru menn að reyna að hafa ein­hverja stjórn á þessu en það er mjög erfitt. En ég deili sann­ar­lega þessum áhyggjum og hef biðlað til fólks að vera ekki að fara þarna þegar það er mikið af fólki og ef það fari að það gæti að öllum grund­vall­ar­at­rið­u­m.“

Spurður hvort að far­sótt­ar­þreyta Íslend­inga sé orðin mikil og þeir hættir að hlusta á varn­að­ar­orð sótt­varna­læknis seg­ist Þórólfur telja svo vera. „Ég held að gosið yfir­taki allt. Ég skil það mjög vel. Þetta er algjört sjón­ar­spil.“

En í því að fara að gos­inu felist ákveðin áhætta. „Þegar þús­undir manna eru að snerta sama kað­al­inn þá minnir það mig ill­þyrmi­lega á Aust­ur­ríki og Ischgl, þar sem allir smit­uð­ust á einum bar þar sem voru sam­eig­in­legir snertiflet­ir. Maður myndi helst ekki vilja sjá það ger­ast aft­ur.“

Síð­ustu daga hafa borist fréttir af því að fólk komi til lands­ins og fari beint á gos­s­töðv­arnar og virði þar af leið­andi ekki sótt­kví á milli ski­manna.

Þórólfur segir dæmi þegar sýna að fólk sem ekki virði sótt­kví hafi komið af stað hópsmiti inn­an­lands. Það þurfi aðeins einn smit­aðan ein­stak­ling til að koma af stað far­aldri. „Allt sem við erum að sjá er afleið­ing af því að fólk er ekki að fara eftir leið­bein­ing­um. Með­vitað eða ómeð­vit­að.“