Spurði hvort sjávarútvegsráðherra hefði áhyggjur af „áróðurs- og rógsherferð“ Samherja

Þingmaður Pírata leitaðist við að fá svör frá sjávarútvegs- og landbúnaðarráðherra varðandi nýja Samherjamálið á þingi í dag. Hann sagðist hafa áhyggjur af því ef „eitthvað óeðlilegt“ væri í gangi.

Þórhildur Sunna Ævarsdóttir, þingmaður Pírata.
Þórhildur Sunna Ævarsdóttir, þingmaður Pírata.
Auglýsing

Þór­hildur Sunna Ævars­dótt­ir, þing­maður Pírata, spurði Krist­ján Þór Júl­í­us­son sjáv­ar­út­vegs- og land­bún­að­ar­ráð­herra í óund­ir­búnum fyr­ir­spurna­tíma á Alþingi í dag hvort honum fynd­ist ekk­ert athuga­vert við það að hann sæti í þessu emb­ætti á meðan Sam­herji „stundar sínar for­dæma­lausu árásir á alla sem voga sér að gagn­rýna fram­göngu fyr­ir­tæk­is­ins“. Krist­ján Þór brást illa við fyr­ir­spurn­inni og gagn­rýndi þing­mann­inn fyrir að „vanda um sið­ferði ann­arra þing­manna“.

Þing­mað­ur­inn hóf fyr­ir­spurn sína á því að vísa í frétta­flutn­ing Kjarn­ans og Stund­ar­innar þar sem upp­lýst hefði verið að starfs­menn Sam­herja hefðu „með vit­und og vilja fram­kvæmda­stjóra Sam­herja staðið í njósnum um rit­höf­unda, stjórn­ar­fólk í sam­tökum gegn spill­ingu, plottað um hvernig megi hræða vitni frá því að vitna gegn þeim í saka­máli og farið í her­ferðir gegn fjöl­miðla­fólki bæði hér og í Fær­eyj­um. Þar að auki reynd­ust skæru­liðar Sam­herja hafa áhrif á for­manns­kjör í stétt­ar­fé­lagi blaða­manna og próf­kjöri Sjálf­stæð­is­manna þar sem leitað er að arf­taka hæstv. ráð­herra í odd­vita­sæti. Allt þetta ger­ist auð­vitað í kjöl­farið á upp­ljóstrun Kveiks um veru­lega vafa­sama við­skipta­hætti Sam­herja í Namibíu og víðar sem nú eru til rann­sóknar í minnst fjórum löndum og til með­ferðar fyrir dóm­stólum í Namib­íu.“

Auglýsing

Rifj­aði Þór­hildur Sunna það upp að ráð­herr­ann hefði hringt í Þor­stein Má Bald­urs­son, aðal­eig­anda Sam­herja, til að spyrja hvernig honum liði eftir að Kveiks­þátt­ur­inn frægi fór í loft­ið. Sagði hún að sím­talið hefði vakið furðu margra og hefði ráð­herr­ann þurft að útskýra hvað vakti fyrir honum sem hann gerði með eft­ir­far­andi hætti í Kast­ljósi stuttu síð­ar: „Ef sjáv­ar­út­vegs­ráð­herra hefur ekki áhyggjur af því ef þetta stóra fyr­ir­tæki er ekki að koma fram með þeim hætti sem menn telja eðli­legt þá finnst mér bara sjálf­sagður hlutur að ýta á eftir því að það standi við þær skuld­bind­ingar sem það hefur gagn­vart sam­fé­lag­in­u.“

­Spurði hún því með vísan í þessi orð ráð­herr­ans hvort hann hefði áhyggjur af þeirri áróð­urs- og rógs­her­ferð sem fyr­ir­tækið hefði rekið að und­an­förnu gegn fjöl­miðl­um, félaga­sam­tökum og jafn­vel nánum sam­starfs­mönnum hans á þingi. „Telur hæst­virtur ráð­herra að Sam­herji standi við þær skuld­bind­ingar sem fyr­ir­tækið hefur gagn­vart sam­fé­lag­inu eða ætlar hann að ýta á eftir því? Ætlar ráð­herra að bregð­ast við og þá hvern­ig?“

Málið ekki borið inn á borð ráð­herra

Krist­ján Þór svar­aði og sagð­ist vilja taka það strax fram að fyrstu við­brögð hans við hinu svo­kall­aða Sam­herj­a­máli og Namib­íu­skjöl­unum þegar það kom upp, hefðu verið þau að gera kröfu um að for­svars­menn fyr­ir­tæk­is­ins stigju fram og gerðu hreint fyrir sínum dyr­um. „Það voru mín fyrstu við­brögð og mér þykir það eðli­legt í ljósi þeirrar stærðar og mik­il­vægis sem þetta fyr­ir­tæki hefur og hefur haft í íslenskri sjáv­ar­út­vegs­sög­u.“

Sagð­ist hann hafa áhyggjur af því ef það væri eitt­hvað óeðli­legt í gangi, með hvaða hætti fyr­ir­tæki blanda sér í stjórn­mála­bar­áttu ein­stakra stjórn­mála­flokka, verka­lýðs­fé­laga og svo fram­veg­is.

Kristján Þór Júlíusson Mynd: Bára Huld Beck

„Ein­stak­lingum er þetta að sjálf­sögðu full­kom­lega heim­ilt hvar og hvenær sem þeir kjósa og vilja. En ef fyr­ir­tæki taka með ein­beittum hætti ákvörðun um að fara að beita sér með slíkum hætti er það að allra mati og flestra mati ekki ásætt­an­legt. Að því leyti til get ég tekið undir áhyggjur hátt­virts þing­manns af því að ef það er að verða lenska að fyr­ir­tæki sem þykir að sér sótt fari að beita sér með þeim hætti sem þar um ræð­ir.

Að öðru leyti hefur þetta mál ekki borið inn á mitt borð. Eins og ég hef áður nefnt, meðal ann­ars á opnum fundi með hátt­virtum þing­manni haustið 2019, þekki ég að sjálf­sögðu fullt af starfs­fólki Sam­herja og hef ekk­ert nema gott eitt um það að segja og hef átt við það hin bestu sam­skipti alla tíð,“ sagði ráð­herr­ann.

Spurði hvort ráð­herra gæti setið áfram í emb­ætti

Þór­hildur Sunna sagð­ist ekki vera að spyrja hann „um neina lensku“. Hún væri að spyrja um til­greint dæmi sem fyrir lægi um afskipti, um óeðli­leg afskipti Sam­herja af blaða­mönn­um, stétt­ar­fé­lög­um, próf­kjöri og sam­fé­lags­sátt­mál­an­um.

Vitn­aði hún aftur í orð ráð­herr­ans úr Kast­ljós­svið­tal­inu forðum þar sem hann sagði: „Hvað yrði sagt ef ráð­herra sjáv­ar­út­vegs­mála hefði yfir höfuð enga skoðun á því að þetta stóra fyr­ir­tæki sem allir hafa taugar til, ef hann reyndi ekki að ýta á það að menn svör­uðu ekki þeim ávæn­ingi sem bor­inn yrði á þá og væri í gang­i?“

Sagð­ist hún velta því fyrir sér hvað ætti að segja við þessu. „Hvað eigum við að segja um sjáv­ar­út­vegs­ráð­herra sem hefur ekk­ert um þetta risa­vaxna mál að segja sökum æpandi van­hæf­is? Finnst hæst­virtum ráð­herra virki­lega ekk­ert athuga­vert við það að hann sitji í þessu emb­ætti á meðan Sam­herji stundar sínar for­dæma­lausu árásir á alla sem voga sér að gagn­rýna fram­göngu fyr­ir­tæk­is­ins? Setur það emb­ættið ekki niður að hafa þar mann sem getur ekki beitt sér, getur ekki tjáð sig með neinum mark­verðum hætti um fram­göngu fyr­ir­tæk­is­ins?“ spurði hún.

Gagn­rýndi þing­mann­inn fyrir að „vanda um sið­ferði ann­arra þing­manna“

Krist­ján Þór steig aftur í pontu og sagð­ist áður hafa farið yfir hæfi sitt til að taka á mál­efnum Sam­herja, meðal ann­ars með Þór­hildi Sunnu. „Sem fer nú ekki mjög vel að vera að vanda um sið­ferði ann­arra þing­manna. Þetta er fyrsti og eini þing­mað­ur­inn sem hefur fengið ákúrur fyrir það að brjóta þær siða­reglur sem Alþingi sjálft hefur sett sér. Fyrsti og eini þing­mað­ur­inn sem hefur fengið þá ákúru.

Þannig að ég mót­mæli því að menn beri ekki eitt­hvert skyn­bragð á hæfi sitt til að takast á við mál sem koma upp, hvort heldur sem það varðar Sam­herja eða ein­hver önnur fyr­ir­tæki. Það geri ég, og ég lýsi því yfir hátt og í heyranda hljóði á opnum fundi nefnd­ar­innar með hvaða hætti ég met hæfi mitt hverju sinni þegar slík mál koma upp,“ sagði hann að lok­um.

Þess skal getið að Þór­hildur Sunna er ekki sú eina sem brotið hefur siða­reglur að mati siða­nefndar Alþingis en Berg­þór Óla­son og Gunnar Bragi Sveins­son, þing­menn Mið­flokks­ins, hafa einnig brotið fyrr­nefndar regl­ur.

Styrkir þú Kjarnann?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Kjarninn hefur verið til taks fyrir kröfuharða lesendur í sjö ár og býður almenningi upp á vandaða umfjöllun þar sem áhersla er á gæði og dýpt.  

Ef þú ert nú þegar styrkjandi leyfum við okkur að benda á að hægt er að óska eftir að hækka styrkinn með því að senda póst á takk@kjarninn.is


Já takk, ég vil styrkja Kjarnann!
Sigurður Ingi Jóhannsson innviðaráðherra og formaður Framsóknarflokksins á Kjarvalsstöðum í gær.
„Engin áform“ um að ríkið auki rekstrarframlög með tilkomu Borgarlínu
Sigurður Ingi Jóhannsson innviðaráðherra segist ekki sjá fyrir sér að ríkið auki framlög sín til rekstrar almenningssamgangna höfuðborgarsvæðisins, eins og sveitarfélögin á höfuðborgarsvæðinu og Strætó bs. hafa kallað eftir.
Kjarninn 29. nóvember 2021
Franskur fiskveiðibátur lokar á skipaumferð um Calais í Frakklandi.
Frakkar og Bretar berjast enn um fiskinn í Ermasundi
Enn er ósætti á milli Frakklands og Bretlands vegna fiskveiða í breskri landhelgi eftir Brexit. Á föstudaginn reyndu franskir sjómenn reyndu að loka fyrir vöruflutninga á milli landanna tveggja til að krefjast úthlutunar fleiri fiskveiðileyfa.
Kjarninn 28. nóvember 2021
Sunnlenskir sjálfstæðismenn kalla eftir skýringum frá Bjarna Benediktssyni.
Ósáttir sunnlenskir sjálfstæðismenn krefja Bjarna um skýringar
Sjálfstæðismenn á Suðurlandi eru með böggum hildar yfir því að Guðrún Hafsteinsdóttir oddviti flokksins í kjördæminu eigi ekki sæti við ríkisstjórnarborðið nú þegar. Tíu af tólf ráðherrum eru þingmenn kjördæma höfuðborgarsvæðisins.
Kjarninn 28. nóvember 2021
Bresk myndlistarkona málaði eitt hundrað málverk af eldgosinu í Fagradalsfjalli
Eldgosið í Fagradalsfjalli sem hófst í vor hefur vakið allskonar væringar hjá fólki. Amy Alice Riches ákvað að mála eitt málverk á dag af því í 100 daga. Hún safnar nú fyrir útgáfu bókar með verkunum.
Kjarninn 28. nóvember 2021
Allt sem þú þarft að vita um nýjan stjórnarsáttmála ríkisstjórnarinnar
Stefnt er að því að lækka skatta, selja banka og láta fjármagnseigendur greiða útsvar. Auðvelda á fyrirtækjum að virkja vind og endurskoða lög um rammaáætlun.
Kjarninn 28. nóvember 2021
Katrín Jakobsdóttir forsætisráðherra við kynningu stjórnarsáttmálans á Kjarvalsstöðum í dag.
Talað um að lækka mögulega skatta en engu lofað
Engar almennar skattkerfisbreytingar eru útfærðar í nýjum stjórnarsáttmála ríkisstjórnarinnar. Forsætisráðherra segir að horft verði til þess að lækka skatta á þá tekjulægstu eða til að bæta samkeppnisstöðu fyrirtækja ef svigrúm gefist.
Kjarninn 28. nóvember 2021
Álfheiður Eymarsdóttir
Kosningaframkvæmd fjórflokksins
Kjarninn 28. nóvember 2021
Ríkisstjórnin stokkast upp í dag, eftir rúmlega tveggja mánaða viðræður þriggja flokka um áframhaldandi samstarf.
Þessi verða ráðherrar
Willum Þór Þórsson og Jón Gunnarsson verða ráðherrar í nýrri ríkisstjórn Vinstri grænna, Sjálfstæðisflokks og Framsóknar sem kynnt er í dag. Guðrún Hafsteinsdóttir er sögð koma inn sem ráðherra dómsmála síðar á kjörtímabilinu.
Kjarninn 28. nóvember 2021
Meira úr sama flokkiInnlent