Ein­ungis tveimur vikum eftir að heil­brigð­is­ráðu­neytið sendi frá sér frétta­til­kynn­ingu þar sem sagði að von­ast væri til þess að hjarð­ó­næmi yrði náð á fyrsta árs­fjórð­ungi kom­andi árs, hafa vænt­ingar lands­manna verið demp­að­ar. Veru­lega.

Eins og fram kom á Kjarn­anum fyrr í dag sagði Þórólfur Guðna­son sótt­varna­læknir frá því á upp­lýs­inga­fundi almanna­varna að ekki væri búist við því að hjarð­ó­næmi yrði náð fyrr en á síð­ari hluta árs­ins 2021, þar sem minna bólu­efni kemur til lands­ins en áætlað var.

Fram kom í máli Þór­ólfs að vafa­laust þyrftu Íslend­ingar að búa við áfram­hald­andi tak­mark­anir fram eftir næsta ári og halda áfram að við­halda ein­stak­lings­bundnum sótt­vörn­um. 

„Við von­uð­umst til að sjá hrað­­ari bólu­­setn­ingar strax eftir ára­­mótin en við þurfum að lifa við það að það mun ganga hægar en við von­uð­umst til,“ sagði Þórólf­ur.

Á sam­fé­lags­miðlum hafa von­brigði fólks ekki leynt sér. „Þessi tíð­indi eru nátt­úr­lega aga­leg og enn verri vegna þess að sumir hafa talað um að við verðum öll orðin bólu­sett á fyrstu mán­uðum næsta árs,“ sagði Kjartan Hreinn Njáls­son, aðstoð­ar­maður land­lækn­is, í umræðum um málið á Twitt­er.

Þar hélt hann því til haga að heil­brigð­is­yf­ir­völd hefðu varað við of mik­illi bjart­sýni um bólu­setn­ingar og hjarð­ó­næmi, sem er rétt. Þórólfur sótt­varna­læknir sagði einmitt 3. des­em­ber, í sam­tali við Vísi, að það væri í hans huga ótíma­bært að ræða tíma­setn­ing­ar, en fyrr þann sama dag höfðu vonir lands­manna um hjarð­ó­næmi, mögu­lega fyrir lok mars­mán­að­ar, verið glæddar með til­kynn­ingu heil­brigð­is­ráðu­neyt­is­ins.

„Það sem ég hef sagt er að við erum ekki með neitt í hendi um það hvenær við fáum fyrstu send­ingu af bólu­efni eða hversu mik­ið. Í mínum huga er ekki tíma­bært að ræða tíma­setn­ingar nákvæm­lega fyrr en við vitum það bet­ur,“ sagði Þórólfur við Vísi.

Loka­sprett­ur­inn verður lengri en von­ast var eftir

Katrín Jak­obs­dóttir for­sæt­is­ráð­herra sagði þann 8. des­em­ber, í til­efni af því að Bretar hófu bólu­setn­ingu, að ljóst væri að loka­sprett­ur­inn í glímunni væri að hefj­ast.

„Þetta eru tíma­­mót í bar­átt­unni gegn veirunni og við getum óhikað litið með bjart­­sýni til nýs árs. Sam­­fé­lagið okkar mun þá byrja að fær­­ast smátt og smátt í eðli­­legt horf. Við getum farið að njóta sam­vista óhindrað og efna­hags­lífið getur spyrnt kröft­ug­­lega við fótum og atvinn­u­­leysi byrjað að ganga nið­­ur,“ skrif­aði hún. 

Miðað við tíð­indi dags­ins er ljóst að loka­sprett­ur­inn hér á landi verður tölu­vert lengri en vonir stóðu til.

Rautt um að lit­ast í Kaup­höll­inni

Fjár­festar tóku tíð­ind­unum af upp­lýs­inga­fundi almanna­varna ekki vel og eru nær allar tölur í Kaup­höll­inni rauðar það sem af er degi.

Verð hluta­bréfa í Icelandair tók um það bil 12 pró­senta dýfu um hádeg­is­bil en líkt og flest önnur ferða­þjón­ustu­fyr­ir­tæki á flug­fé­lag­ið, sem farið hefur í gegnum miklar hremm­ingar vegna far­ald­urs­ins, mikla hags­muni af því að hjarð­ó­næmi náist hér á landi sem fyrst.

Hluta­bréfa­verð félags­ins hefur hækkað á ný eftir dýf­una í kjöl­far tíð­ind­anna og er verðið nú 5 pró­sentum lægra en þegar við­skipti hófust í morg­un.