Mótmæla harðræði lögreglu í Kólumbíu

Mótmæli hafa staðið yfir í Kólumbíu í á aðra viku. Upphaflega voru það breytingar á sköttum sem fólk mótmælti en síðar varð það harðræði lögreglu sem dró fólk af stað. Félagasamtök segja að hátt á fjórða tug mótmælanda hafi látist vegna aðgerða lögreglu.

Mótmælandi steytir hnefa í borginni Cali en þar hafa átök milli mótmælenda og lögreglu orðið hve hörðust í mótmælunum sem staðið hafa yfir frá því 28. apríl í Kólumbíu.
Mótmælandi steytir hnefa í borginni Cali en þar hafa átök milli mótmælenda og lögreglu orðið hve hörðust í mótmælunum sem staðið hafa yfir frá því 28. apríl í Kólumbíu.
Auglýsing

Mótmæli hafa staðið yfir í Kólumbíu síðan 28. apríl síðastliðinn. Upphaflega beindust mótmælin gegn fyrirhuguðum skattabreytingum sem Ivan Duque, forseti landsins, vildi koma til leiðar til þess að reyna að reisa efnahaginn við eftir efnahagslægðina sem af kórónuveirufaraldrinum hlaust. Í kjölfar mikillar hörku lögregluyfirvalda í garð mótmælanda tóku mótmælin ákveðnum breytingum, fleiri tóku þátt og mótmælin beindust gegn harðræði lögreglu.

Á Twitter-síðu félagasamtakanna Temblores segir að á fyrstu tíu dögum mótmælanna, fram að morgni laugardags, hefðu 39 fallið í valinn í mótmælunum vegna aðgerða lögreglu. Félagasamtökin halda utan um tilkynningar um ofbeldisverk af hendi lögreglu og hefur The Guardian stuðst við tölur frá Temblores í sínum fréttaflutningi af mótmælunum. Opinberar tölur eru lægri, þær segja að á fyrstu átta dögum mótmælanna hefðu 26 fallið í valinn. Til samanburðar segja Temblores að á sama tímabili hafi 37 látist vegna aðgerða lögreglunnar.

Frumvarp forsetans hefur verið dregið til baka

Mótmælafundir voru skipulagðir af stærstu stéttarfélögum landsins og verkafólk streymdi að. Með í hópinn slóst fólk úr millistétt sem hafði áhyggjur af því að nýja löggjöfin myndi steypa þeim í fátækt. Tæplega helmingur landsmanna í Kólumbíu býr við fátækt og hefur kórónuveirufaraldurinn einungis aukið misskiptingu þar í landi.

Auglýsing

Skattalagabreytingin sem um ræðir fólst meðal annars í því að lækka skattleysismörk. Breytingin hefði haft áhrif á alla þá sem hafa meira en 2,6 milljónir pesóa í mánaðarlaun, eða rétt um 85 þúsund krónur. Þar að auki stóð til að fella á brott ýmsar undanþágur sem standa einstaklingum til boða sem og að hækka ýmsa skatta sem lagðir eru á fyrirtæki.

Ivan Duque er forseti Kólumbíu. Mynd: EPA

Síðasta sunnudag dró Iván Duque, forseti landsins, frumvarpið til baka. Engu að síður hafa mótmælin haldið áfram enda þusti fólk út á götur til þess að mótmæla viðbrögðum stjórnvalda og hörku lögreglunnar. Fjöldi mótmælenda óx eftir því sem á leið og í hópnum má nú finna kennara, lækna, nema, verkalýðsleiðtoga og aðgerðarsinna í bland við íbúa landsins sem aldrei hafa mótmælt á götum úti áður, líkt og New York Times fjallar um.

Í frétt miðilsins er haft eftir Helenu Osorio, 24 ára gömlum hjúkrunarfræðingi að hún sé í sárum vegna ástandsins í landinu. „Það eina sem við getum gert til þess að láta raddir okkar heyrast er að mótmæla,“ segir Helena sem mótmælti í höfuðborginni Bogotá. „Og fyrir það erum við drepin.“

Annar viðmælandi miðilsins, hin 28 ára gamla Mayra Lemus sem starfar sem kennari, sagði mótmælin snúast um meira en lagabreytingar. „Þetta snýst ekki bara um breytingar á skattalögum. Þetta snýst um spillingu, misskiptingu og fátækt. Og við unga fólkið höfum fengið okkur fullsödd af þessu öllu saman.“

Kórónuveiran hefur leikið landið grátt

Mótmælin eru að hluta til framhald mótmælaöldu sem gekk yfir Suður-Ameríku á síðari hluta ársins 2019 þegar fólk mótmælti meðal annars á götum Bólivíu, Síle, Kólumbíu, Ekvador Perú og Níkaragva. Mótmæli innan hvers lands voru hver með sínu sniði en öll áttu þau það sameiginlegt að vera beint gegn spillingu stjórnvalda.

Mótmælendur ganga fylktu liði í borginni Medellín í Kólumbíu. Mynd: EPA

Síðan kom heimsfaraldur kórónuveiru sem bitnaði illa á íbúum Suður-Ameríku á árinu 2020. Kirkjugarðar fylltust, fólk lá fyrir dauðanum á göngum spítala og fólk beið í röðum fram eftir nóttu í veikri von um að geta keypt súrefniskúta til þess að halda smituðum ástvinum á lífi.

Efnahagurinn hefur tekið dýfu í kjölfarið. Samdráttur í löndum álfunnar var að meðaltali sjö prósent á síðasta ári og atvinnuleysi hefur aukist mikið, sérílagi meðal ungs fólks.

Og staðan hefur einungis versnað.

Á fyrstu mánuðum þessa árs hefur P1 afbrigði kórónuveirunnar, sem kallað hefur verið brasilíska afbrigðið, valdið miklum usla í álfunni og tölur yfir þá sem létust úr kórónuveirunni fóru að hækka á ný eftir að afbrigðið fór að dreifa sér.

Fyrirhugaðar skattabreytingar voru því líkt og neisti sem kveikti í púðurtunnu enda hefði einn angi þeirra haft bein áhrif á vöruverð. Því tóku íbúar Kólumbíu ekki þegjandi og hljóðalaust, eftir að hafa reynt að draga fram lífið við krappari kjör svo mánuðum skiptir.

Stjórnvöld hafa kennt skæruliðum um ofbeldið

Samkvæmt umfjöllun BBC hafa þarlend stjórnvöld kennt vinstri sinnuðum uppreisnarseggjum um ofbeldið. Þau segja meðlimi Þjóðfrelsishers Kólumbíu (ELN) hafa kynnt undir mótmælunum ásamt andófsmönnum úr röðum skæruliðahreyfingarinnar FARC, þeim sem ekki hafa samþykkt friðarsamkomulag FARC við stjórnvöld frá árinu 2016.

„Ofbeldið var kerfisbundið, framið vísvitandi og það var fjármagnað af glæpasamtökum,“ er haft eftir Diego Molano, varnarmálaráðherra landsins, í frétt BBC. Lögregluyfirvöld halda því fram að í mörgum tilvikum hafi lögregluþjónar verið beittir ofbeldi við skyldustörf, er þeir reyndu að hindra glæpamenn frá því að hnupla úr verslunum og bera eld að strætisvögnum, svo dæmi séu tekin.

Forsetinn hefur sagt að stjórnvöld séu reiðubúinn til að eiga í samtali við þjóðina. Hann tilkynnti nýlega um að settur hafi verið á laggirnar vettvangur til að hlusta á íbúa landsins og móta með þeim lausnir á þeim vandamálum sem að landinu steðja.

Styrkir þú Kjarnann?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Kjarninn hefur verið til taks fyrir kröfuharða lesendur í sjö ár og býður almenningi upp á vandaða umfjöllun þar sem áhersla er á gæði og dýpt.  

Ef þú ert nú þegar styrkjandi leyfum við okkur að benda á að hægt er að óska eftir að hækka styrkinn með því að senda póst á takk@kjarninn.is


Já takk, ég vil styrkja Kjarnann!
Þórður Snær Júlíusson
Áframhaldandi tilfærsla á peningum úr ríkissjóði til þeirra sem hafa það best
Kjarninn 25. júní 2021
Lilja D. Alfreðsdóttir, mennta- og menningarmálaráðherra.
Viðbrögð borgaryfirvalda voru til skoðunar hjá ráðuneytinu
Mennta- og menningarmálaráðuneytið var með viðbrögð borgaryfirvalda varðandi plássleysi í sérdeildum grunnskóla borgarinnar til skoðunar. Reykjavíkurborg hefur nú mál einhverfra nemenda til úrlausnar og hefur þegar leyst mörg þeirra, samkvæmt ráðuneytinu.
Kjarninn 25. júní 2021
Mesta aukning atvinnuleysis á Norðurlöndunum
Atvinnuleysi hefur aukist um þrefalt meira hér á landi en á hinum Norðurlöndunum á síðustu tveimur ársfjórðungum, miðað við sama tímabil árið á undan, samkvæmt tölum úr vinnumarkaðskönnun landanna.
Kjarninn 24. júní 2021
Sektað vegna grímuskyldu í Ásmundarsal
Eigendur Ásmundarsalar hafa sent frá sér tilkynningu vegna máls sem kom upp á Þorláksmessu í fyrra er varðar brot á grímuskyldu. Lögreglan neitaði að greina frá niðurstöðunni fyrr í dag.
Kjarninn 24. júní 2021
Eva Dögg Davíðsdóttir
Hringrásarhagkerfið – hvar stöndum við?
Kjarninn 24. júní 2021
Saga Japans
Saga Japans
Saga Japans – 39. þáttur: Veiðiferð sjógunsins I
Kjarninn 24. júní 2021
Bjarni Benediktsson, fjármála- og efnahagsráðherra og formaður Sjálfstæðisflokksins, var á meðal gesta í samkvæminu í Ásmundarsal.
Lögreglan neitar að upplýsa um niðurstöðuna í Ásmundarsalar-málinu
Lögreglan hóf sjálf hið svokallaða Ásmundarsalar-mál með því að greina frá því að ráðherra, sem síðar var opinberað að væri Bjarni Benediktsson, hefði verið í ólögmætu samkvæmi á Þorláksmessu. Nú neitar lögreglan að upplýsa um niðurstöðuna í málinu.
Kjarninn 24. júní 2021
Drangaskörð eru stórkostleg náttúrusmíð.
Skipuleggja frístundabyggð við ysta haf
Kríuvarp, sóleyjar og jökull. Eitt sérstæðasta náttúrufyrirbrigði Vestfjarða og þótt víðar væri leitað. Þúsund ára menningarsaga. Á landnámsjörðinni Dröngum er fyrirhugað að reisa frístundabyggð. Drangar eru sömuleiðis í friðlýsingarferli að ósk eigenda.
Kjarninn 24. júní 2021
Meira eftir höfundinnGrétar Þór Sigurðsson
Meira úr sama flokkiFréttaskýringar