Meðlimir hljómsveitarinnar Toymachine, sem stofnuð var síðla árs 1996, þá undir nafninu Gimp, hafa sett af stað söfnun inn á Karolina Fund til að safna fyrir gerð á sinni fyrstu breiðskífu.
Toymachine stefna á útgáfu um mánaðamótin nóvember/desember þessa árs og verður gefið út á vínyl sem og á öllum helstu streymisveitum.
Um tveimur árum eftir stofnun Gimp breyttu meðlimir bandsins nafninu í Toymachine. Á sama tíma þyngdist tónn þeirra og einn meðlimur bættist í hópinn. Sveitin spilaði víða næstu árin, meðal annars í flugskýli númer 4 á Reykjavíkurflugvelli árið 1999 á fyrstu Iceland Airwaves hátíðinni sem þar var haldin. Sveitinni var þá boðið að spila í kjölfarið á hinum goðsagnakennda tónleikastað CBGB´s á Manhattan í New York sem þeir þáðu, enda var stefnan sett á heimsyfirráð.
Nú hafa meðlimir Toymachine sett af stað söfnun inn á Karolina Fund eins og áður segir en þeir ætla að freista þess að safna fyrir gerð plötunnar sem aldrei kom út.
Trommari Toymachine er hinn góðkunni leikstjóri Baldvin Z og söngvari er Jens Ólafsson sem hefur gert garðinn frægan í hljómsveitinni Brain Police síðustu 20 ár, eða allt frá því Toymachine hætti formlega störfum. Aðrir meðlimir eru þeir Kristján Elí Örnólfsson gítarleikari og Atli Hergeirsson bassaleikari. Þá starfaði Árni Elliott í bandinu á árunum 1999-2001 sem meðsöngvari og plötusnúður.
Hvernig vaknaði hugmyndin að verkefninu?
„Það hefur alltaf setið fast í okkur að hafa ekki komið út okkar eigin plötu á sínum tíma. Við eigum gríðarlega mikið efni til sem okkur finnst hafa elst sérstaklega vel en við eigum aðeins til á fjölmörgum “demo” upptökum. Núna viljum við endilega deila þessu efni með öðrum enda þrusu gott stöff þó við segjum sjálfir frá. 
Eftir að hafa komið saman til að spila nokkrum sinnum opinberlega síðustu 5 árin ákváðum við að athuga hvort að við gætum farið þessa leið og safnað fyrir gerð plötunnar á þennan hátt. Við náum ennþá ótrúlega vel saman og höfum ekki þurft nema eina til tvær æfingar til að slípa allt til fyrir tónleika, þá fórum við að spyrja okkur hvers vegna í ósköpunum platan okkar væri ekki til?“
Segðu okkur frá þema verkefnisins?
„Rokk & ról að krafti og eins og það gerist best. Þetta verður um 10 til 11 laga plata sem geymir lög úr okkar smiðju aðallega frá árunum 1999-2001 hvar við vorum sem frjóastir í lagasmíðum. Okkur finnst hálf ótrúlegt oft þegar við heyrum þessi gömlu lög hvað þau eru "current" í dag þó ýmsu þurfi oft að breyta örlítið. Sem dæmi verður ekki mikið um "DJ-skratz" o.þ.h eins og mörg okkar laga innihéldu hér áður fyrr heldur verður því haldið í lágmarki og jafnvel skipt út fyrir annað. En þroski okkar bæði sem manneskjur sem og tónlistarmenn og flytjendur gefa þessum gömlu lögum ákveðna vikt og algjörlega nýtt líf."
Er eitthvað sérstakt sem þið viljið að komi fram um verkefnið?
„Við biðlum til fólks af algjörri auðmýkt enda er þetta alls ekki ókeypis að gera loksins plötuna okkar og á þann hátt sem við kjósum. Margt smátt gerir eitt stórt, svo sannarlega. Til þess að aðstoða okkur við gerð plötunnar höfum við fengið til liðs við okkur einvala lið, bæði hvað varðar sjálfar upptökurnar sem og útsetningar sem skiptir gríðarlegu máli. Við tökum okkur dágóðan tíma í verkið og viljum skila af okkur plötu sem við getum allir verið stoltir af um ókomna tíð. Við setjum miklar kröfur á okkur sjálfa við gerð þessarar plötu og fólk verður mjög líklega ekki svikið af hvorki henni né svo útgáfutónleikunum okkar sem við munum halda samhliða útgáfunni og verða allir hinir glæsilegustu.“
