Síð­asta sól­ar­hring­inn greindust 933 ný til­felli COVID-19 í Þýska­landi. Það er stórt stökk frá því sól­ar­hring­inn á undan þegar ný smit voru 357. Frá upp­hafi far­ald­urs­ins hafa 170.508 smit greinst í land­inu.

Svokölluð R-tala veirunn­ar, sem segir til um hversu marga hver sýktur ein­stak­lingur smitar að með­al­tali, hefur verið yfir 1 síð­ustu þrjá daga í Þýska­landi. Það þýðir að hver og einn sem hefur sýkst er að smita fleiri en einn annan að með­al­tali.

Ang­ela Merkel, kansl­ari Þýska­lands, hefur varað við því að ef R-talan fari yfir 1 í ein­hvern tíma myndi heil­brigð­is­kerfið að lokum ekki ráða við álag­ið.

Sótt­varna­stofnun Þýska­lands, Robert Koch-­stofn­un­in, segir of snemmt að álykta sem svo að –önnur bylgja far­ald­urs­ins sé skollin á í land­inu. Til þess þurfi að líða lengri tími. Hins vegar verði nú og næstu daga, í kjöl­far fjölg­unar til­fella, að rann­saka nákvæm­lega þró­un­ina.

Þýska­land hefur gert ákveðnar til­slak­anir á aðgerðum sínum vegna COVID-19. Merkel sagði í gær að þrátt fyrir það væri mik­il­vægt að fólk héldi áfram per­sónu­legum aðgerðum á borð við að halda fjar­lægð sín á milli og við­hafa ítar­legt hrein­læti.

Nokkur hópsmit hafa orðið í Þýska­landi síð­ustu daga. Þau hafa til dæmis orðið í þremur kjöt­vinnslum þar sem á bil­inu 100-350 til­felli hafa greinst í hverri fyrir sig.

Stað­fest er að yfir 4,1 milljón manna hafa smit­ast af nýju kór­ónu­veirunni um allan heim. Að minnsta kosti 286 þús­und hafa lát­ist vegna COVID-19.