Fimm starfs­menn Háskóla Íslands, sem störf­uðu í fjórum bygg­ingum skól­ans, hafa greinst með kór­ónu­veirusmit. Í skimun Íslenskrar erfða­grein­ing­ar, sem hófst í skól­anum í gær, greind­ist þó aðeins einn af um 450 sem voru skimaðir með smit. Jón Atli Bene­dikts­son, rektor Háskóla Íslands, segir það vissu­lega góðar fréttir en að áhyggjur skóla­yf­ir­valda snúi að því að ekki séu sýni­leg tengsl milli þeirra sem hafa greinst með veiruna innan háskól­ans. Fólkið sé ekki í nánu sam­starfi. Því segir hann gríð­ar­lega mik­il­vægt að sem flestir af nem­endum og starfs­mönnum skól­ans fari í skimun hjá Íslenskri erfða­grein­ingu líkt og þeir hafa fengið boð um.

„Fleiri þurfa að fara í skimun svo hægt sé að kort­leggja þetta bet­ur,“ segir Jón Atli í sam­tali við Kjarn­ann í morg­un. Hann var þá að koma af fundi neyð­ar­stjórnar háskól­ans sem fund­aði dag­lega í fyrstu bylgju far­ald­urs­ins en hefur fundað sjaldnar upp á síðkast­ið. Það breyt­ist héðan í frá og er stefnt að tíð­ari fundum neyð­ar­stjórnar á ný. Næsti fundur hennar verður strax á morg­un.

Hann segir enn ekki full­víst hvort að fólkið sem um ræðir hafi smit­ast í háskól­anum eða hvort að það hafi smit­ast ann­ars stað­ar. Þá veit hann ekki heldur hvort að öll smitin séu ný eða hvort að um gömul smit sé að ræða.

Jón Atli segir að allt frá því að haust­miss­eri hófst hafi verið lögð mikil áhersla á sótt­varnir og fjar­lægð­ar­mörk milli fólks. Þá er reynt að tryggja ítar­leg þrif eins og kostur er. Hvort gripið verði til frek­ari aðgerða en þegar hefur verið gert er svo að sögn Jóns Atla í sífelldri skoð­un. „Við erum með  til­mæli um að fundir séu sem mest á net­inu, kennslan er svo að grunni til raf­ræn en við viljum hafa eitt­hvert stað­nám og þá sér­stak­lega fyrir nýnema. Við höfum ekki breytt þessum áherslum en við erum til­búin í það ef þarf.“

Jón Atli segir starfs­menn háskól­ans finna fyrir því að nem­endur séu áhyggju­full­ir. Háskóli sé sam­fé­lag og í ástandi eins og því sem nú ríki sé erfitt að halda utan nem­end­urna. Þess vegna hafi verið ákveðið að bjóða nýnemum í stað­nám því þeirra tengsl inn í háskóla­sam­fé­lagið eru minni en eldri nem­enda. „En málið er að þetta er erfitt og þetta getur leitt til auk­ins brott­falls sem við viljum auð­vitað ekki sjá. Við reynum að mæta þessu eins vel og við getum en við vitum að aðstæður nem­enda eru víða ekki góð­ar.“

Jón Atli vonar að frek­ari skimun geti varpað ljósi á tengsl starfs­mann­anna sem greinst hafa með veiruna. Kort­lagn­ing á því sé mjög mik­il­væg.

„Við fögnum því að þessi skimun sé í gangi og þökkum Kára [Stef­áns­syni] og Íslenskri erfða­grein­ingu inni­lega fyr­ir,“ segir Jón Atli. „En við þurfum að ná að kom­ast að því hvernig smitin tengjast, það er mjög mik­il­vægt. Ég hvet því ein­dregið fólk innan Háskóla Íslands að fara í skimun sem þeim býðst hjá Íslenskri erfða­grein­ingu í dag og á morg­un.“