Karlmaður á sextugsaldri er í haldi Lögreglunnar á höfuðborgarsvæðinu í tengslum við rannsókn hennar á skemmdum sem voru unnar á bifreið borgarstjóra og húsnæði Samfylkingarinnar á dögunum.
Í tilkynningu frá lögreglunni segir að málið sé litið mjög alvarlegum augum og hefur rannsókn þess verið í algjörum forgangi hjá embættinu.
Dagur sagði í viðtali við RÚV að það væri „höggvið ansi nærri manni þegar heimilið er annars vegar, því þar býr ekki bara ég heldur fjölskylda mín og krakkarnir“
Lestu meira
Dagur sagði enn fremur í viðtalinu að ekki liggi nákvæmlega ljóst fyrir hvenær skotið var á bílinn eða hvort bíllinn hafi þá staðið fyrir utan heimili hans. Þessir hlutir væru á meðal þess sem lögregla rannsaki nú.
Árásirnar hafa verið fordæmdar þverpólitískt.
Ólafur Guðmundsson varaborgarfulltrúi Sjálfstæðisflokksins, sem lét þau orð falla í athugasemdakerfi Vísis eftir að málið kom upp að borgarstjóri ætti að byrja á sjálfum sér, byltingin væri „komin heim“ og því ætti borgarstjórinn bara að taka, vék í gær úr þremur ráðum borgarinnar vegna orða sinna.
Ólafur mun ekki lengur vera varamaður í skipulags- og samgönguráði, öldungaráði og innkaupa- og framkvæmdaráði Reykjavíkurborgar. Þrátt fyrir það verður hann áfram varaborgarfulltrúi.
