Berglind Häsler og Svavar Pétur Eysteinsson freista þess að hópfjármagna Snakkverksmiðju á Karolina Fund. Verksmiðjan rís í gömlu fjósi á búgarði þeirra Karlsstöðum í Berufirði, en Sveitasnakkið er afrakstur þróunarvinnu sem hófst fyrir tveimur árum síðan.
Svavar Pétur þekkja flestir sem tónlistarmanninn Prins Póló en hann átti mikilli velgengni að fagna á síðasta ári með plötunni Sorrí auk þess sem tónlistin úr kvikmyndinni París norðursins gerði stormandi lukku. Berglind leikur á hljómborð með Prins Póló en þau hjónin leika einnig með hljómsveitunum Skakkamanage og Létt á bárunni. Svavar og Berglind markaðssettu Bulsur, grænmetispulsur, vorið 2012 og notuðust þá líka við Karolina Fund til að koma verkefninu á koppinn.
Bulsur hafa átt velgengni að fagna og fást nú í fjölda verslana víða um land. Berglind starfaði sem fréttamaður á RÚV á Austurlandi og í Reykjavík og Svavar er grafískur hönnuður. Þau ráku um tíma galleríið og plötubúðina Havarí í Austurstræti og hafa nú blásið nýju lífið í apparatið á Karlsstöðum.
Í snakkverksmiðjunni verða framleiddar gulrófuflögur.
Umbreyttust úr hundraðogeinn rottum í landsbyggðartúttur
Segið okkur frá þessari ákvörðun að flytja út í sveit og gerast bændur. Hvað rekur tónlistarfólk í slíkar lífsstílsbreytingar?
„Frá því við kynntumst höfum við eytt mikið af okkar frítíma úti í sveit. Upp í bústað, inni í tjaldi eða að rúnta um sveitir landsins. Við umbreyttumst því á skömmum tíma úr hundraðogeinn rottum í landsbyggðatúttur sem endaði með því að við keytpum jörð á Austfjörðum og byrjuðum að búa. Fasteignaverð í Reykjavík hjálpar líka heilmikið til við að láta sveitadrauminn rætast. Þegar fjölskyldan stækkar og maður sér fram á að eyða nokkrum milljónum í að bæta við einu svefnherbergi þá byrjar maður ósjálfrátt að leita að eign í fjarlægum póstnúmerum. Við höfum líka áhuga á matvælaframleiðslu og nýsköpun á því sviði og íslenska sveitin er kjörinn vettvangur fyrir þess konar brall."
Sveitasnakk er nýjasta afurðin ykkar. Getið þið sagt okkur frá því og frá söfnuninni fyrir því að breyta fjósi í snakkverksmiðju?
„Við byrjuðum að þróa snakk úr gulrófum haustið 2013 og eftir miklar tilraunir enduðum við með afurð sem okkur langaði að markaðssetja. Varan heitir Sveitasnakk og er úr bökuðum gulrófuflögum sem eru kryddaðar með ferskum chili og hvítlauk. Þær eru ekki djúpsteiktar. Gulrófur er meinhollar og fullar af C-vítamíni og innihalda mun minna magn af kolvetnum en kartöflur. Þegar við vorum svo sest að í sveitinni kviknaði sú hugmynd að framleiða snakkið á búgarðinum og hófumst við þá handa við að umbreyta fjósinu í snakkverksmiðju. Verkið hófst síðastliðið haust og við erum á lokametrunum núna. Eins og gefur að skilja þá kostar svona framkvæmd eyrun af og brugðum við því á það ráð að hefja hópfjármögnun á Karolina Fund. Fjármögnunin virkar þannig að fólk getur keypt sér upplifuna á þeim afurðum sem Karlsstaðabúið hefur fram að færa. Í boði er gisting í gestahúsinu, Bulsuveisla, einka tónleikar með Prins Póló í hlöðunni, heimsókn í sveitasnakkverksmiðjuna og svo auðvitað fyrsti skammtur af afurðinni, brakandi Sveitasnakk beint frá bændum!"
Hægt er að skoða verkefnið nánar og leggja því lið hér
